總網頁瀏覽量

2015年8月7日 星期五

六日五夜 日本中部帶人魷 第一日 --- 名古屋

前言

會有今次日本中部帶人魷,
最主要係小弟同同事傾偈時講,
話如果有人肯包小弟機票,
小弟唔介意幫手BOOK酒店PLAN行程,
食小弟自己搞掂。

點知真係其中有人走去番去同老婆相量,
佢老婆又肯喎,
於是小弟就帶同事一家五口(兩公婆+三隻化骨龍),
去日本黎轉旅行喇。



因為機票係同事出, 所以小弟冇發言權,
不過可以講o既就係, 飛機o既時間都唔算太好,
兩點幾係香港出發, 去到日本已經係晚上七點幾。
加上三隻化骨龍要食雪糕,
同事老婆又有有啲唔舒服,
由中部国際空港去到名古屋市內,
已經係晚上0900......



一出名古屋駅就見到下圖o既雙子聖衣,
果然係無敵o既聖衣, 金光熣燦好美麗






好在酒店係車站五分鐘路程,
極速check in之後,
嗱嗱聲落去地下街搵野食。
呢度包括呢個旅程o既第一個task,
就係滿足同事個仔o既願望, 去食炸蝦。


因為一早做好晒功課,
所以知道佢未閂門,
亦都好快咁搵到間店, 叫「海老どて」,
香港同日本o既旅遊書都有介紹。




門面都幾乾淨企理,
而以位置以及格局黎睇,
個價錢都算合理。






睇個店名都估到, 呢檔野出名o既係賣炸蝦。
老實講, 佢啲炸漿其實都只係一般般,
不過勝在入面包住o既蝦夠足料, 啲蝦肉都唔錯。

呢間店有個招牌菜, 就係勁長炸蝦,
足足有30cm咁長, 可惜小弟冇影相。
又係老實講, 呢個勁長炸蝦, 都係gimmic多於味道。


介紹少少名古屋o既飲食文化。
唔知點解, 名古屋o既飲食文化, 係日本中經常被視為異類,
而其中一樣, 就係味噌。

大家未必會留意到,
日本人普遍用兩種味噌,
分別係白味噌同紅味噌,
前者用於放湯, 後者用於調味。

但名古屋放湯用o既味噌,
卻零舍紅色, 味道亦都較濃,
所以有「赤だし」呢個名。

當然, 唔係飲開味噌湯o既香港人,
未必會留意到味道上o既分別。
而上圖就係傳說中o既赤だし。



仲有仲有, 從同事老婆口中得知一個誤會,
佢一直以為味噌=味精.......可能因為音近.......

其實味噌係由大豆、穀殼、鹽等發酵而成,
含豐富蛋白質、胺基酸、異黃酮、維他命B3、E等等,
係舊時日本平民補充營養o既恩物,
跟全人工合成o既增味劑---味精, 可以話係兩個極端。

所以大家唔洗怕食味噌,
問題只係香港o既日式食店,
唔知係真係用味噌, 定係用味精架啫......



第一日只有晚上,
所以寫到呢度就完喇~

沒有留言:

張貼留言