魷日記: 六日五夜日本中部帶人魷第三日 --- 下呂溫泉 + 上高地

補番張相先,
上圖就係小弟同事一家下榻o既酒店,
酒店名叫オテル・ド・マロニエ下呂温泉。
(由小弟下榻o既停車場影)
而下圖就係酒店對出o既景觀,
可以飽覽下呂市。

由此可以得知酒店距離下呂市中心有少少距離,
亦因為咁, 酒店o既收費比市中心o既溫泉旅館稍平,
但其實渣車都只係五分鐘路程,
所以渣車o既朋友, 呢個都係一個唔錯o既選擇。

LOBBY

小弟琴晚其實係冇沖涼的, 留番日頭先沖。
瞓車, 咁可以係邊度沖呀,
因為酒店係用小弟個名預約的,
所以小弟可以利用酒店o既溫泉,
只要俾1000yen就得。
(當然, 住係度真頭唔洗錢啦, 酒店錢包左)

上圖就係酒店o既室內浴場 (即: 風呂)
當然啦, 浴場唔suppose你影相的,
不過小弟晨早流流去, 一個人都冇, 所以偷雞影,
好孩子唔好學。

下圖就係室內浴場推門出去o既露天風呂喇。

由露天風呂望出去個VIEW真係好正!!!

呢度講多少少,
香港人唔識分, 咩係風呂、咩係溫泉。
其實風呂(視乎情況)係指浴缸、浴槽、浴場,
有熱水, 但只不過係普通煲熱左o既水。
而溫泉, 係日本有好嚴格o既規定, 籠統黎講:
係指天然被加熱至25度以上o既地下湧出水。
因為好多時溫泉係被地殼運動o既原因所加熱,
所以好多時(唔係絕對)溫泉都係伴有硫黃味。

下次大家見到, 酒店話有「風呂」喎正喎, 就唔好大驚少怪喇,
就算係「露天風呂」, 都只不過即係露天浴場,
你浸o既只係白開水......
真係寫住「溫泉」o既先係正品。

另外再講多啲,
旅館、酒店o既溫泉,
大至可以分為「循環」式或「掛け流し」式。
循環式, 即係真真正正o既溫泉水,
加入浴槽後會保留並持續使用一段時間, 直至換新o既溫泉水。
而掛け流し式, 即係由泉眼直接取水注入浴槽, 單向流走。
由始可見, 掛け流し式溫泉係正過循環式溫泉。
當然當然, 最正最正, 係直接浸落泉眼水享受啦!!!!
不過旅館、酒店擁有自己泉眼的話,
其收費可想而知......

插序少少先, 其實係酒店沖涼前,
小弟仲晨早流流走左出去行下下呂市中心一帶。

下呂o既水無八幡神社, 冇乜特別, 只係一個小神社。

琴晚夜店一帶o既河畔,
真係執得好乾淨, 一啲垃圾都冇。

有爬文o既看官, 應該記得小弟提過日本有三大溫泉。
日本人好鐘意乜三大、物三大, 咁三大溫泉係點定架呢,
其實係由以前比較有名氣o既學者、偉人所提出的,
而比較受人認知o既, 就係上圖雕像, 一位叫林羅山 o既江戶時代日本人。
佢係幕末至江戶o既一位出名儒學家,
而係佢著作中, 提到日本有三大溫泉(下圖),
包括係「草津」、「有間(馬)」同埋「下呂」,
於是呢三個地方聲名大噪。

老老實實, 林生用咩準則黎決定三大溫泉,
泉質? 景點? 氣氛? 人文? 實在係不得而知。
小弟去過草津, 的確係幾好睇又幾好玩,
(八日七夜北首都圈毒撚魷第四日 --- 草津溫泉)
相對之下, 下呂就比較遜色.......
可能林生所講o既係泉質掛.......恕小弟膚淺。

下呂溫泉神社,
聽個名好似好爆咁,
其實只係一個建築物底下o既一個小社,
與其叫神社(JINJA), 倒不如叫社(YASHIRO)......

當然, 流出黎o既水係熱水~

琴晚影過o既公眾浴足池

再次睇下琴日提過嗰個噴泉池,
咁啱進行每日清掃中

可以見到, 抽乾晒池入面o既水,
再進行打掃, 然後加番水。
所以對於呢個噴泉池o既衞生狀況, 大家絕對可以放心。

等埋同事一家起身出發,
轉移去下一個城市之前,
最後點都要去下下呂溫泉博物館。

館內唔算大, 但資料非常豐富,
仲有好似互動教學o既展示品。

溫泉噴出口, 因結晶化/沈積作用等形成o既岩塊(仿製品)

(上圖)右手邊係由日本唔同溫泉搜集番黎o既溫泉沈澱物,
有啲石灰質較重、有啲硫黃較多、有啲鐵質較豐富。
中間冚左蓋嗰幾支水, 係日本唔同溫泉o既水,
小朋友可以用旁邊o既儀器量度各水o既導電度(conductivity)。
而最左手邊o既幾支插左棒o既水樽, 都係日本唔同溫泉o既水,
小朋友可以用pH試紙驗測酸鹼值。

有好多唔同溫泉搜集番黎o既礦物,
甚至台灣o既都有。

↓介紹日本唔同o既溫泉

館內當然唔少得有浴足o既地方啦,
小朋友玩過不亦樂乎, 唔捨得走。

睇番轉頭, 小朋友真係好簡單,
一個小小o既水池已經夠玩樂半日。

跟住就要由下呂, 渣80km車到平湯溫泉,
然後再轉巴士到目的地---上高地。

上高地係日本中部其中一個郊遊、行山o既好地方,
附近仲有穂高、乗鞍等可以行,
不過以交通便利性同考慮到小朋友o既體力,
所以揀左上高地。

先係平湯溫泉泊低車, 一日只係600yen, 抵到爛。
然後就轉下圖遠處o既低公害巴士入去上高地,
因為上高地一帶係受保護o既郊區, 普通車係唔可以駛入的。

搭低公害巴士進入上高地

途中望番落平湯溫泉市中心,
冇錯, 上圖嗰個已經係成個市中心!

搭左半個鐘車, 首先見到o既會係下圖o既大正池。

總站, 上高地訪客中心

小朋友肚餓, 要慢慢食,
小弟嗱嗱聲扒左幾啖飯,
就趁呢個時間出去行下。

訪客中心有售, 上高地特有o既小動物飾物,
野鼠o既一種

提提大家, 日本境內少垃圾桶, 大去過日本o既朋友可能都知,
但有好多地方, 真係連垃圾桶都冇一個,
上高地呢啲受保護地區就係一個好例子,
真係成個地區, 一個垃圾桶都冇!!!
大家要預備膠袋, 裝走自己製造o既垃圾~

小朋友食飽, 係時候去check in。
時間已經係下午三點半, 比預定遲左兩個鐘......

上高地代表物之一: 河童橋 (上一圖, 下四圖)

同事一定下榻o既旅館, 白樺莊。
上網book o既時候, 睇人地啲comment, 都知道呢間野服務好差,
但係上高地一帶住宿好少, 而呢間又比較就腳,
所以只好照book。

果然, 啲服務態度認真麻麻,
唔知係咪太辛苦, 啲服務員唧都唔笑,
呢個都算, 想追加多一個小朋友o既和服(浴衣),
問都唔洗問front desk就即刻話今日全館好爆, 唔會有衫多咁話......
你做樣都係我面前問下丫......
其他仲有的, 不能盡錄。

好, 1617, 終於出發行山喇。

初初仲以為啲小朋友會好快悶,
但出乎意料之外, 啲小朋友o既友應都唔錯,
諗番轉頭, 香港o既小朋友又真係冇乜機會咁樣接觸大自然。
你問下, 有幾多個小朋友曾經落過溪流玩!?
唔係海灘, 而係淡水o既河流。

兩條木板路, 下面其實係沼澤地,
一個錯腳就會唔見左個小朋友www

睇住呢三個小朋友,
覺得佢地真係幸福。

成條初級者行山徑, 係沿住一條河兩邊o既round trip, 慢慢行約2小時。
但帶住小朋友, 實在係唔行得快,
行左round trip唔夠四分一, 已經用左成粒鐘,
時間係1725, 大陽開始西斜
考慮到行晒round trip,可能已經天黑,
所以同事一家決定及早回頭是岸。

小弟因為另有住處, 所以要係度同佢地分道揚鑣。
小弟o既住處, 就係呢個round trip距離起點最遠嗰point,
所以唯有繼續行, 不過冇左小朋友, 行得快好多。