搭o既係UNITED AIRLINE,
0955起飛, 0920要登機,
計番條數, 咪即係六點就要起身!?
一來, 為左唔想有瞓過龍O既危險,
二來......
二來係因為小弟表妹黎左同小弟個妹玩,
呀媽為左有床俾佢地過夜,
於是好積極咁叫小弟去機場瞓......
琴晚2200出門口, 十一點幾到達機場。
諗住搵位瞓啦, 點知terminal 1多人到hihi,
做乜勁!?, 去左旺角呀!?
唯有去terminal 2瞓啦,
反正嗰邊比較近7仔。
不過terminal 2都唔少人,
行到尾尾先搵到個位!
同人玩下LINE、WHATSAPP,
又打吓機, 點零鐘就瞓。
本來瞓得好好地的,
點知五點幾鐘有一班大陸人黎左附近,
講野勁大聲勁嘈,
聽住音槳瞓都俾佢地嘈醒!!!
ANYWAY,
刷牙洗面HEA下時間,
0730左右check in,
食埋個早餐, 就去40號閘候機。
就係行過去途中,
撞到小弟以前一個日文班同學兩夫婦!!!!!!
超神奇, 係禁區內相遇,
真係約都約唔到......!!!
上機, 原來係一架細機,
啲位都好窄吓......
係機度睇下書、瞓下、食下野,
幾個cycle之後, 日本時間1330就到成田機場。
然後一連串O既事情, 令小弟o既行程亂晒。
首先係入境等左好耐......呢個就預左o既。
然後就係手機駁上網o既問題。
向高登絲打借左將sim卡係日本上網,
不過發現要某啲啲資料先可以完成個setting,
好在成田機場都有免費wi-fi,
即刻向絲打求救。
亦因為咁, 小弟唔能夠離開機場範圍......
本來要趕1632 o既JR的, 結果趕唔切......
然後第二個問題係買車票o既問題。
今次遊東日本, 想買一個叫做北海道&東日本PASS,
只需一萬YEN就可以七日內,
任搭北海道&東日本JR所有唔洗附加費o既列車。
本來諗住係自動售票機快快手手買的,
點知售票機冇顯示有呢種票賣......SHIT
咪死死去COUNTER排隊囉。
熟識成田機場O既朋友都知,
JR COUNTER得兩個櫃位,
結果一排就排左大半個鐘。
排隊o既時候, 仲要見到顯示屏show住,
因為出現問題, 總武線等幾條線,
唔係停駛就慢駛、delay。
what the hell!?
一到埗就咁濕滯,
黎緊七日仲得了o既!?
結果只能夠上到1730開出o既車,
仲要可能因為頭先講o既delay,
架車由快速變左普通......
最切諗住去秋葉原行一轉,
然後先同FD (IY小姐)食野的,
點知而家去唔到秋葉原不特止,
仲要遲左半個鐘先到......
(最初約左1930係 北千住 等)
同朋友會合,
先係麻煩IY小姐陪小弟去便利店寄野。
其實係寄番啲錢俾幫我買飛o既人。
事實上日本同香港一樣,
係唔會接受寄錢的,
不過因為實在冇辦法,
唯有用盒月餅做裝啦......
搞掂晒,
同IY小姐求其揀左間,
比較上高級小小o既居酒屋食野。
兩個人食左6000yen。
食完野十點幾走人啦,
本身打算搭1029嗰班車到茨城o既水戸的。
不過IY好心幫小弟check多次, 但睇錯野,
fake左小弟, 搞到小弟搭唔到1029呢一班,
下一班就已經係2335......
見仲有少少時間淨, 又順路,
於是用多出黎嗰唔夠一個小時,
去附近一個地方, 叫「松戸」。
動漫迷有冇印象?
有的話你就真係一個幾宅o既人,
睇少啲動漫啦~~~
松戸,
就係《俺の妹がこんなに可愛いわけがない》入面,
黑貓新搬屋o既地方!!!
而且最後, 京介同黑貓正式決別,
(原著中) 都係係松戸, 黑貓屋企前面o既地方。
因為動畫中出現o既鏡頭唔多,
加埋最終回嗰三集, 都唔係好多資料,
所以網上o既朋友都未有指定到係松戸o既邊度。
有流言話係松戸六高台2丁目付近,
不過小弟睇完最終回,
再上google 地圖比較下, 又唔似係。
於是而家膽粗粗,
試下利用呢唔夠一小時,
去JR松戸駅旁o既中央公園碰下運氣。
好可惜, 一來時間唔夠,
二來周圍又黑, 結果無功而還,
趕番火車去茨城o既水戸。
今晚o既落腳點係水戸駅對開o既網吧,
因為到達水戸o既時候已經係凌晨1點幾,
第二朝又要6點出發。
所以揀左個5小時package,
都只係980yen。
啲人成日問小弟,
網吧o既沖涼房係點,
於是今次小弟特登影番幾張。
當然唔會有小弟o既肉照啦~
基本上間間網吧o既沖涼房都差唔多,
仲會包毛巾、肥皂、鬚刨等,
所以其實乜都唔帶, 有衫換就得。
網吧比膠囊旅館優勝o既,
除左係上網設備之外,
就係有飲品任飲, 同埋小時漫畫雜誌任睇~
好喇,
小弟埋《ロウきゅーぶ!SS》就瞓喇。
聽日開始聖地巡遊大洗市!
沒有留言:
張貼留言