七日六夜 觀禮帶團沖繩魷 --- 第二日 A&W + OUTLET MALL ASHIBINAA + 安里小店餃子

第二日行程, 新郎要打點吓啲野, 所以分頭行同,

因為小弟同行o既另外兩個麻甩佬都已經有家室&小朋友,

所以小弟車左佢地去沖繩某幾間local o既BB用品服裝店。

小弟毒拎一名, 膝下無兒女, 所以負責係架車上面瞓覺.......

到LUNCH時間, 小弟們黎到牧港o既A&W。

A&W係一間賣漢堡包o既快餐店。

小弟唔知香港啲旅遊書有冇介紹A&W,

但日本o既旅遊書就一定會介紹。

一來, 因為日本人一直都對美國有一種嚮往,

而A&W又係一間美式快餐店,

二來, A&W係日本第一間快餐店(註),

所以都有少少歷史意義。

(*A&W第一號店 屋宜原店 於1963開業,

因為當時沖繩仍然係歸美國管轄,

而沖繩於1972先歸還番俾日本,

所以如果唔計算1972年前o既沖繩A&W的話,

日本第一間o既快餐店會變成係另一間東京o既快餐廳)

小弟們黎到o既係牧港店, 因為呢間應該係比較最有規模嗰間。

上圖係設於泊車位旁o既點餐通話系統,
坐係車度, 透過系統o既通話器, 就連車都唔洗落,
就可以點外賣, 然後店員會拎埋黎俾你。
當然如果閣下係堂食的話, 就請將架車泊係冇系統o既泊位,
唔好阻礙有需要o既人。

七日六夜 觀禮帶團沖繩魷 --- 第一日 序 + 攞車攞住宿 + 地道居酒屋晚飯

舊年先黎過沖繩, 今年又黎?

事源係小弟一個大學同學結婚, 揀左係沖繩行禮。

因為係好好朋友o既關係, 二話不說,

我地一班同學就應承飛去觀禮。

今次一行, 除左有大學同學外,

仲有同學們教會o既朋友(但小弟自己非教會中人)、

一對訂婚情侶、及其家母。

有人遲啲黎, 有人stay behind, 但最多人o既時候,

一共有9位仁兄隨團, 可以話係小弟最多人o既旅程。

老實講, 黎過日本咁多次, 有咩未見過丫,

所以近年慢慢enjoy帶家人或朋友去日本,

感受另一種o既樂趣。

帶定頭盔先, 話就話小弟帶團咋,

小弟只係包辦左計劃行程同BOOK野架咋,

小弟自己都要俾錢, 冇收利益, 唔好搵人告小弟呀>.<

六日五夜 中獎免費機票魷 --- 第五日 再戰鳥取砂丘 + 姫路城

本身今日o既行程, 係輕輕鬆鬆瞓到10點check out,

然後慢慢搭車番去兵庫縣o既南面睇姫路城的,

不過小弟琴晚同同行o既友人講,

如果我地晨早爬起身的話,

都仲可以抽到啲時間再去一轉鳥取砂丘。

話晒都山長水遠一場黎到,

同行友人始終唔甘心,

所以決定今朝早啲起身, 睇下個天色再作決定。

6點幾爬起身, 打開窗簾,

天色唔可以話好靚, 但起碼見到部份藍天先,

於是二人決定起身梳洗, 再戰鳥取砂丘。

早上八點左右, 再次黎到鳥取砂丘。
皇天不負有心人總算叫做見到個似樣啲o既景色。

六日五夜 中獎免費機票魷 --- 第四日 城崎溫泉 + 鳥取砂丘

快樂o既時光過得特別快,

加上食蟹用左唔少時間,

結果琴日只係浸左兩個外湯......

八點食早餐。

平時瞓到最後一秒先check out,

早餐都唔會食o既小弟,

晨早就爬左起身, 為o既咪又係浸溫泉~

浸都甩皮都要浸啦。

稍為有質素o既城崎温泉旅館, 其實都會有自己o既溫泉,

由大浴場方式, 到獨立個室, 由預約制到有空位就攝, 各色其色。

而小弟住嗰間, 有4個獨立個室溫泉, 只要冇人就可以入去浸,

冇限時間, 不過大家通常都唔會浸多過一個鐘。

浸完之後精神爽利, 食早餐。

嗱嗱食完早餐, 爭取時間, 點都浸多個溫泉,
如果唔係對唔係江東父老。
正如琴晚所講, 今日浸o既係一の湯

一の湯特別在於佢o既溫泉係係個岩洞入面,
幾有風味的, 不過當然, 溫泉唔可以影相,
所以只有上圖o既外觀俾大家睇睇。

六日五夜 中獎免費機票魷 --- 第三日 城崎溫泉

城崎溫泉

因為小弟自己本身都未聽過,

所以小弟主觀地覺得一般香港人都未必聽過,

應該係, 除非唔係......

點解有咁多出名o既溫泉唔去, 要黎城崎溫泉呢。

因為小弟覺得好多時日本啲乜鬼「三大」都未必好靠譜,

例如下呂溫泉, 小弟就覺得有點兒名過其實。

所以今次搵溫泉o既時候, 小弟就稍為改變一下策略,

由搜尋　「最多日本人想去o既溫泉」,

改為搜尋「最多日本人想"再"去o既溫泉」,

然後排第一o既, 就係城崎溫泉喇。

另外, 再加上三月仲仍然係蟹o既捕漁期,

唔去山陰一帶食蟹仲等幾時。

又加上, 小弟個朋友想去鳥取砂丘,

以城崎溫泉為中途站都唔錯,

所以就黎左一個豪食蟹兼浸溫泉浸到甩皮o既城崎溫泉之旅。

因為小弟今次用JR關西 PASS o既關係,
所以小弟好旱有咁搭特急, 由大阪到城崎温泉駅,
但就算係特急, 都要兩個幾三個鐘先到。
點解唔搭新幹線? 因為冇囉......



講咁喇耐, 首先介紹下城崎温泉先啦。
城崎温泉位於兵庫縣, 不過同大家熟識o既神戶、姬路有好一大段距離,
因為城崎温泉位於日本本島向住韓國嗰邊。
下圖紅色圈最高嗰個地方就係城崎温泉喇,
可以見到同大阪、姬路係相反o既方向。

咁城崎温泉又有咩咁特別呢,
首先講溫泉, 城崎温泉有七個外湯,
呢度o既「外湯」, 係指唔屬於旅館獨佔,
公眾只要俾入場費, 就邊個都入得o既溫泉。

而城崎温泉七個外湯各有特色,
雖然話要一晚住宿時間浸晒都唔係話唔得,
不過考慮埋要享受旅館、同埋食晚飯的話,
要一日o既住宿時間浸晒七個外湯, 就真係唔係咁易,
而事實上今次小弟都只係浸到三個......

六日五夜 中獎免費機票魷 --- 第二日 大阪HALL ANIMAX LIVE

今日o既話題比較宅, 冇興趣o既朋友可以跳過。

琴日嗰篇都提過,

今次係先有機票, 然後先搵演唱會睇。

睇o既係3/3於大阪HALL舉行o既ANIMAX MUSIX,

對小弟黎講, 重點當然係早見沙織啦。

第一次參加ANIMELO SUMMER LIVE (ASL)以外o既DD LIVE,
果然係各有特色。

六日五夜 中獎免費機票魷 --- 第一日 序 + 香港飛大阪

去年十月中, 無啦啦收到BEA銀行信
話小弟因為用銀行信用卡購物,
自動參加抽獎, 中左免費ANA雙人大阪來回機票......

初初小弟仲以為係新款騙財方法,
但核實後, 係真的.......!!!
原來呢個世界啲銀行信用卡自動抽獎係真係存在的!!!!!

問題係, 小弟冇乜特別事做, 其實唔會去日本......
仲要無啦啦去住幾日, 住宿錢都嘥埋。
初初諗住平價讓張機票俾fd
但一來, 兩個星期內要覆實機位, 時限短
二來, 有長假期o既黃金日子當然唔會俾你揀
三來, 承上, 啲fd好難一時三刻兩公婆都請到假
結果讓唔出......

當然都諗過俾兩個老人家去, 但佢地人生路不熟,
最後咪又係要小弟陪佢地去,
結果就會變成係兩老坐ANA,
而小弟要買多張廉航去陪佢地......仲要再花多筆住宿......

最後都係搵來一位單身o既朋友,
然後小弟再係關西搵場演唱會睇,
咁啱3/3係大阪HALL有ANIMAX演唱會, 仲有早見沙織添,
正。

於是就成行喇......

不過總係覺得今次係為左去而去......
未試過去日本去得咁不情不願......

仲有, 因為ANA係日本人o既公司,
飛機o既時間都係遷就日本人,
所以香港去大阪係夜晚到, 而大阪回程則是早上......



ANYWAY第一日冇咩好講, 去到已經夜晚
食個飯就瞓了。