魷日記: 竹田城跡 --- 天空之城

今日o既目的地係兵庫縣o既竹田城跡。
話就話係兵庫縣,
但因一來距離大阪都幾遠(下圖中「朝來」o既地方),
二來個城係山卡啦[地方,
要去的話話, 車錢同時間都幾大負擔,
所以雖然一直都好想去,
但一直都安排唔到去。
今次終於如願以償喇。

但如果專登搭車淨係去竹田城跡, 然後番番大阪,
又實在係太過唔化算,
於是行程中加入另一個唔化算o既景點,
就係非常出名, 但小弟一直都十五十六唔知去唔去好o既,
日本三大景之一 : 天橋立。
呢個就係小弟呢兩日一夜o既行程。

朝早0530起身=.=
搭地鐵到大阪駅, 轉車到姬路駅,
再轉播但線到寺前駅,
然後再繼續搭去竹田駅,
到達竹田駅o既時候已經係差唔多9點。

係竹田駅o既西面有啲屋(上圖),
起得幾有味貌之外,
啲紅葉都幾靚。

同望向屋後o既山上,
已經可以見到竹田城跡o既一角。

係旅遊案內所搜集完必要o既資訊,
再係附近買左個飯盒之後就出發喇。
有四條路可以上山,
其中一條係車道, 有一條登山徑封鎖中。
小弟簡最短嗰條路登山,
不過要先橫過鐵路,
因為車站出口係東面,
但竹田城跡係西面.......

出左車站沿住路軌向北行,
一直留意住左手面,
話係咁講, 不過都差啲睇唔到有一個小入口,
如果唔係有個牌仔寫住竹田城跡登山口的話,
仲以為係一個排水口......

隧道? 得三個人左右o既寛度,
仲有有大半用左黎做排水道,
高度比小弟啱啱好高小小(小弟高173cm),
但JR火車軌o既地方得番小弟心口咁高,
要踎低行......

出左呢個隧道之後,
向南行去車站背面,
就會見到登山口。

一上左登山道冇幾耐,
就會見到屋敷跡,
係當年城主住o既地方,
城主主要係係有政事、軍事o既時候先上城,
如果唔係一般都留番係呢個地方居住。

石屎路就只係黎到呢度,
之後o既都係山路,
間唔中見到有啲地方有石階、木階,
但可能因為日久失修,
所以有等於冇......

好似話以前o既人上城都係行呢條路。

途中o既紅葉唔多,
但都值得影下相。

相信只係行左四分一都唔到,
但已經幾攰......加上未食野,
有啲血糖唔夠o既感覺。
幸好小弟買便當時都買左個お萩餅,
正好補充血糖。

食完就繼續上路喇。
因為時間關係,
下一張圖已經係到左竹田城跡門口......

短800m左右o既山路,
就已經登上250m到達竹田城跡(標高353.7m),
大家可以計下條路有幾斜......

入去之前講下竹田城。
竹田城係室町時代已經有,
關於築城o既事, 仍然有好多地方未明。

山城東西寛約100m, 南北長約400m。
相信早期o既竹田城石垣並不多,
石垣係比較後來先修築。
而石垣o既建築方法, 同安土城、姬路城一樣,
係用穴太積み o既方法築成。

竹田城看守住山陰(日本海嗰邊)、山陽(太泙洋嗰邊)之間o既通道,
為通道o既要塞。
出名o既戰爭唔多, 不過要數o既話,
就係羽柴秀吉(之後改名叫豊臣秀吉)按織田信長命令,
攻打山陰一帶勢力o既毛利氏, 途中攻落竹田城。
點解o既打毛利氏?
一來織田信長要統一天下,
二來, 睇開小弟BLOG o既人仲記唔記得,
毛利氏係島根一帶有個當時世界第一o既銀山?
http://blog.yahoo.com/japsleevefish/articles/610663

可見竹田城係歷史舞台上並不突出,
但點解今時今日竹田城跡會咁出名?
原因之一, 竹田城係日本咁多山城入面保存得最完整o既一個,
規模亦都幾大。

但最出名o既係有「天空之城」o既美譽。
標高353.7m唔算得上「天空」咁高,
但踏入秋天, 冰冷o既晚上, 同溫暖o既日照,
令竹田城被山嵐形成o既雲海所包圍,
就好似浮係空中o既城堡一樣,
因此有「天空之城」之稱。

雲海發生係早上7、8點左右,
小弟到達時已經係10點左右,
所冇雲海, 反正小弟都唔打算今日睇,
所以冇所謂。

城內o既標記唔多,
頂多得大手門、武之門、二之丸等,
不過其實都唔洗點去考察,
因為淨係見到成個山頂都係城o既石垣, 已經好有氣勢。
石見銀山嗰個山吹城簡直係蚊比同牛比。

由城上望番落竹田市。
不得不再次引用《天空之城》ムスカ大佐o既名言,
「見ろ! 人がゴミのようだ!」

鷹都係腳下飛

竹田城o既最高點, 天守o既遺跡。

天守o既trigonometrical point。

由天守望向北翼。

由天守望向南翼。

12點左右, 係時候開餐。
拎個飯盒拎得咁辛苦,
就係為左係天空之城食!!!
坐係天守石垣o既邊邊食。

大地在我腳下 XD

富士山係高,
但竹田城跡另有一番風味。

天守o既石垣

因為個view實在太正,
所以係城上逗留o既時間長左。
點半鐘左右離開竹田城。

不識盧山真面目,
要睇竹田城全景,
就要到竹田城跡對面o既立雲峽展望台。

一般黎講應該係渣車去的,
不過小弟冇國際牌啦><
只好落山, 再走4km路過去。
問題係放行里o既地方1600就收工,
落到車站已經係1400,
要趕係兩個小時內來回......

由車站望向立雲峽

好喇, 到左立雲峽o既停車場入口喇~~~

實際上行到趴係度......
仲辛苦過上次係小樽上旭展望台。

過左停車場,
仲要行山上o既小徑上展望台。

係第一展望台望過去竹田城跡,
呢個高度同竹田城差唔多
不過細到睇唔到。

zoom埋去~

時間上好似仲有少少,
於是嘗試上第二展望台。
不過路不成路, 仲要有好多地方都分差。
上圖係途中o既照片。
見唔見到條路有幾斜?
係平面o既照片都覺得斜o既話, 實際上可想而知.....
路上都係碎石、樹葉, 勁滑。

得到時間o既上限,
都唔見第二展望台,
應該係話途中已經唔見有路牌等=.=
於是只好影番張, 然後回程。

啱啱好趕得切係1555番到拎行里......
不過對腳已經好痺......

小弟一開始講過,
今次係一個兩日o既行程,
目的係為左睇朝早o既雲海。

今晚瞓邊間旅館? 冇訂喎~

於是, 係N咁遠o既便利店買左食物同飲品之後,
小弟就再次登上竹田城跡過夜。

其實例牌影天空之城,
應該係係頭先o既立雲峽展望台影過黎。
不過一來, 立雲峽展望台山路比較危險,
二來如果有薄霧的話, 咁遠zoom過去會好矇,
三來係竹田城跡的話, 可以有唔同角度影, 但係對面展望台只可以影一個角度,
基於以上考慮, 小弟就決定係竹田城跡睇雲海。

食完野冇野做, 咪影下相囉。