魷日記: 竹田城跡(天空之城) + 天橋立

前情請先睇番琴日篇BLOG「竹田城跡 --- 天空之城」。

由勁大風o既長凳搬左去石垣底下之後,
總算叫做可以瞓得著......
不過冇耐, 四點鐘開始就已經有人登山上黎......

咁早上黎托咩!?
小弟check過, 日出要6點半先有,
如果係睇雲海, 就仲要過多個零鐘......

ANYWAY, 俾人嘈醒左都瞓唔番.....
於是又影下相咁啦。

到左五點幾,
已經差唔多有50人聚集=.=

講下雲海出現o既條件先。
晚上要夠凍, 然後日頭太陽出黎,
日夜溫差大, 再加上冇乜風的話,
雲海就會出現。
一般黎講秋天(9-10月)發生o既機會比較大,
不過其實到2月都有機會見到。

晚上凍到HIHI, 呢個小弟已經親經歷左。
琴晚的確好大風, 但差唔多日出時已經收細左,
問題就係太陽出唔出黎喇。

琴晚好天到可以見到星星,
但今由四點幾醒左到而家,
一直都係烏雲密佈......

首先見到有山嵐。

一直到太陽出黎都係咁,
啲唔知太陽係咪真係出左黎,
但因一直都見唔到個太陽,
只係時間上知道日出已經過左......

雖然冇雲海,
但有啲霧, 都有少少天空之城o既感覺o既......
唯有咁安慰自己=.=

好似水墨畫咁, 見到呢個景都有少少安慰。

等到八點幾,
都唔見有雲海,
亦都唔覺得會有雲海,
於是唯有走人。

搭播但線北上到福知山,
然後轉近畿タンゴ鉄道到天橋立。

天橋立, 為日本三大景之一,
另外兩個係廣島厳島神社o既海中大鳥居,
同埋仙台o既松島。

可參閱小弟o既
仙台+松島
四日三夜廣島四國旅行團第一日 --- 厳島神社

事實上日本三大景係江戶時代o既日本儒學學者個人所挑選出黎,
一來時代唔同, 二來純粹個人品味,
所以事實上日本三景係咪真係咁值得睇呢? 係一個好大o既問題。
小弟去天橋立之前都知天橋立其實冇乜野好睇,
論地理學的話, 的確係幾特別o既,
但除此之外就冇乜長處喇。
今次之所以會黎,
都係因為淨係去竹田城跡唔太化算, 所以先順便去埋天橋立......

咁天橋立係咩呢?
其實天橋立係指京都宮津灣入面連接兩岸o既一條細長o既沙洲,
點樣形成, 仍然有待考察研究,
總之就係因為地形、水流等微妙o既關係,
海水帶黎o既沙係呢度堆積,
結果就形成今時今日o既一條長長o既沙洲。

要睇天橋立, 可以係南北兩面各一o既展望台睇,
不過一般正路都係過鐵路站對面岸o既傘松公園睇。
沙洲長3.6公里, 如果唔係行開路的話, 3.6公里都算係長,
所以天橋立兩岸都有好多店出租單車。
另外大家又可以坐觀光船渡過對面岸。

小弟有的是時間,
加上難得黎到就慢慢睇啦,
於是決定先行過對面, 番黎先再搭船。

行到天橋立入口之前會經過上圖o既智恩寺文殊堂。
不過今日重點唔係度, 於是skip左。

經過上圖o既迴旋橋, 就會到一個小沙洲,
然後再過埋大天橋,
就係直正天橋立o既範圍。

小沙洲上o既石碑。

大天橋

天橋立東面o既海岸,
其實係一個沙灘。
不過事實上嚴格黎講,
成個天橋立都係由沙堆積而成的。

天橋立入面長滿松樹,
不過因為一來當風,
二來冬天積雪,
三來沙土鬆軟,
所以好多松樹都東歪西倒。

從三四層樓高, 打斜瞓係度o既松樹底下行過,
你都唔好話唔驚。

天橋立沿路都有幾個「名勝」,
不過好多都係有「刻意搞作」之嫌,
所以嗰啲就唔多講喇,
但下圖o既磯清水就幾特別。

天橋立兩面都係海水,
而天橋立o既水位都幾高。
但上圖由天橋立中湧出o既磯清水,
冇半點鹹味, 實在係幾特別。

但大家唔好飲,
因為左手邊嗰個木牌仔就係寫住,
只適宜洗下手, 不適宜放入口。
但就小弟所見, 有一對日本人夫婦,
睇都冇睇就飲左啖=.=

天橋立入面都有好多特色o既松樹,
有好多都被命名, 但好多都好用牽強,
所以小弟都只係揀左啲真係特別o既介紹下。

千貫松,
日文「千貫」有「非常重」o既意思,
的確呢棵松樹應該係天橋立入面最粗壯嗰棵。

沿路都係松樹。

双竜の松。
係兩棵勁粗壯、生埋一齊o既松樹。
不過係平成16年嗰一年, 一個強勁o既颱風23號,
吹倒左天橋立二百幾棵松樹,
而双竜の松就係其中之一。
而家放係度o既就係双竜の松o既部份。
而下圖就係双竜の松o既clone。

行左45分鐘就到達另一邊,
因為附近有觀光船上船位,
所以可以見到有好多海鷗係度stand by。

行到天橋立另一邊,
倒達登山纜車之前,
會經過一個神社,
叫元伊勢籠神社。

而家三重縣o既伊勢,
最初係係皇宮入面供俸的,
但後來又係報夢呀、然後搵過更好o既地方供俸呀咁,
展轉間最後去到伊勢。
而途中暫住過o既地方,
就係呢個元伊勢。

元伊勢果然係唔同啲,
連攝神社供俸o既神都把炮過人,
近至遠分別係:
天照大神、春日大明神、猿田彦命、
同埋下圖o既真名井稲荷神社

逛完神社之後就上傘松公園喇,
有兩種上落山o既選擇,
下圖左邊入口係吊椅、右邊入口係纜車。
小弟決定用纜車上, 坐吊椅落。

唔係小弟影得唔好所以架纜車斜左,

而係特登咁設計。
因為條路o既斜率唔一樣,
開頭比較平, 上近山頂會越黎越斜,
所以係山腳時架車有啲斜,
但上到山上就啱啱好。
睇下下圖就會明。

上到傘松展望台,
咁啱出少少太陽。

一如所料,
天橋立, 果然係冇乜特別......=.=

黎天橋立o既指定動作, 股のぞき,
即係好似上圖個呀蟬咁,
由跨下望天橋立,
話會見到飛龍在天咁話喎......

上圖個呀蟬一直係咁倒轉頭睇左好耐,
為o既就係影張相。
小弟當然唔會咁做啦,
倒轉個相機影咪得囉XD
洗乜影得咁辛苦啫!

都係冇乜特別......

反而對漫山紅葉有啲興趣~

經傘松展望台再行入少少,
會見到巴士站, 係通往山入面o既成相寺的,
而巴士站旁邊有條樓梯,
話通往股のぞきo既發源地,
同埋真正o既傘松都係度咁話。
咪去睇下啦。

傳說中o既傘松,
都唔知係咪堅o既。

果然都係冇咩特別=.=

睇完,
反正有的是時間,
加上既然都搭纜車上到山,
於是順便去成相寺睇睇。

由巴士站到成相寺約1公里多,
但巴士要收成幾百yen,
貴到hihi,
小弟當然唔會俾呢啲錢佢賺啦,
於是慢慢行入山。

都係嗰句啦,
慢慢行可以慢慢影相,
上山o既路係辛苦,
但影到咁靚o既山景, 都係值o既。

成相寺, 為西国三十三箇所o既為28所。
所謂o既西国三十三箇所, 同四國o既八十八箇所一樣,
都係佛教徒巡礼o既地方。
三十三箇所都係供奉觀音o既靈場,
之所以係三十三, 原因係《法華經》中提及,
觀世音菩薩為普渡眾生而幻化成33種姿態。
ANYWAY, 唔係佛教徒, 無謂深究。

五重塔

撞かずの鐘, 意思為不敲的鍾。
相傳以前起呢個鐘樓o既時候,
係由附近募集捐款籌建,
第一次、第二次鑄鐘都失敗左,
到第三次募集捐款時(咁似黑社會迫人交保護費o既......)
去到一個都幾富裕o既家庭,
但個呀媽話因為有好多小朋友要養所以冇錢捐出黎。
到左鑄鐘當日, 嗰個呀媽又帶埋小朋友黎睇喎,
又唔知點解, 真係唔知點解, 呀媽又可以失手跌左個BB落鑄鐘溶爐度......
(干將莫邪?)

終於今次鑄鐘成功, 音色仲好好聽添。
唔理啦, 照用個鐘。
雖然音色係好聽, 但啲人聽落,
總係好似聽到有小朋友喊聲同女人o既叫喚聲咁,
最後都係決定以後唔敲呢個鐘。
所以叫「撞かずの鐘」。