今次點解揀黎九州,
就係因為十一月正正係九州紅葉o既檔期。
冇錯, 京都都係咁上下時間,
但因為京都大致上都去過了,
所以今次特登揀九州,
加上有兩星期, 可以慢慢揸車玩。
早上九點去左攞車,
一條魷, 洗乜咁大架, 加上日本啲路彎多路窄,
最平最細架就OK。
話時話, 小弟黎過日本咁多次,
第一次自己一條魷自駕魷。
希望唔會炒落山死左冇人知。
一攞左車, 就飛奔四十幾公里,
黎到福岡県邊垂o既雷山千如寺大悲王院。
呢度係福岡出名o既紅葉景點之人,
寺院主持話, 最高峰時,
啲車由山腳排到上黎, 最少要等兩粒鐘先入到寺。
不過一來小弟係平日一早(十點左右)過黎,
加上而家其實稍稍過左呢個寺紅葉最靚o既時期,
所以唔洗點等就入到停車場。
(都要等少少)
由山腳到寺院有最少4、5個停車場。
沿路已經有唔少紅葉,
小弟黎到o既2停車場,
更加係泊正係紅葉下面。
沿石級上去寺院主建築群,
已經見到下圖圍牆啲紅滿到瀉。
平時雷山千如寺大悲王院好似係唔收錢的,
但作為紅葉名所, 而家唔鑿你一筆, 更待何時。
門票分400羊同100羊。
100羊就淨係可以參觀opea area,
如果淨係想影紅葉的話, 100羊已經可以。
而400羊就包括進入寺o既幾個建築進行參拜,
同埋有僧人向大家講解歷史、植物同埋進行簡單祈福。
建築入面有一啲文物展示,
不過因為大部份地方唔可以影相,
所以可以影俾大家睇o既唔多。
因為寺院係依山而建,
所以有啲地方要行樓梯, 都幾斜吓。
以上拍攝到o既, 都係要俾400羊先可以進入o既地方。
難得俾左400羊, 講吓俾大知小弟聽到o既一啲歷史背景啦。
以前呢個山頭有成十間神社寺廟,
又拜佛, 亦都有拜日本一啲神,
但因為後來明治時期實施神佛分離,
所以呢間寺院就變成左拜佛。
好在呢間寺院有紅葉加持,
加上售賣o既護身符有啲gimmic, 所以得以維持。
但成個山頭得番兩間比較大規模o既寺,
其他都已經丟空。
Anyway, 歷史講住少少。
紅葉之旅, 就由下圖呢個由落葉打掃而成o既心心開始。
諸位六根清淨o既佛家憎人, 咁樣真係冇問題嗎......
上面呢五張相, 主角都係一株好大o既紅葉,
亦都係呢個寺院紅葉o既賣點。
只可惜因為時期稍為晚左少少,
所以開始呈啡褐色, 不過仍然可以感受到嗰種氣勢。
成個寺院範圍好大,
除左上面嗰株大紅葉之外,
都仲有好多地方可以參觀影相。
紅葉, 有時都唔係話得個紅字就叫靚,
有紅有黃, 更加精彩,
所以小弟十分喜歡紅葉當中夾雜有銀杏。
其實日本o既秋天都係一個天氣反覆無常o既時節。
今朝出門口時天陰陰, 但冇落雨, 小弟已經覺得係執到,
影影吓相仲要出太陽, 真係天公造美。
事實上之後長達兩星期o既旅遊,
除左移動途中落少少雨之外, 到親景點都冇落過雨。
小弟真係超lucky。
遊覽完福岡県o既雷山千如寺大悲王院之後,
小弟就駕車進入佐賀県。
普通o既香港人, 可能冇乜點聽過佐賀県,
最多都只係聽過佐賀牛。
而事實上, 好多人都未必認識佐賀県,
成日開玩笑話佐賀県係魔境,
而日本人最唔熟識、又或者感到最冇魅力o既排行榜,
佐賀經常都係位處三甲。
不過近年一套動畫, 帶紅左佐賀県,
就係《ゾンビランドサガ》。
一來小弟黎個九州深度遊啦,
二來黎個動漫聖地巡禮,
三來小弟最終目的係日本47都道府県制霸,
所以點都要黎一轉佐賀。
由福岡揸車過黎佐賀県o既唐津,
會利用到国道202号, 其中一段約4.5公里o既路,
道路兩邊都係高大茂密o既松樹,
被稱為日本三大松原o既虹の松原。
十分壯觀, 一路駕駛, 十分心鄺神怡。
可惜揸緊車唔可以影相。
大家經過一定要留意吓。
黎到唐津, 去唐津城之前,
先祭一祭五臟廟。
黎到叫はた寿し o既壽司店。
地址: 佐賀県唐津市西寺町482
一個小小o既鎮仔, 一間小小o既壽司店,
都可以泊滿晒車就知道有幾出名。
叫左一個比較貴(但唔係最貴)o既壽司set,
賣點係上面嗰條長到拖晒地o既穴子。
不過小弟最鐘意o既,
係上圖中排右手邊嗰舊鮑魚壽司。
十分爽甜, 超有咬口,
實在忍唔住要叫多一貫 (貫, 係日本壽司o既量詞)
其實海鮮, 尤其是魚類, 小弟真係唔太識分,
但食呢餐壽司, 真係食出壽司師父o既功架。
啲壽司飯唔太鬆唔太實, 咬落口好鬆軟但唔會話好散,
加上啲飯煮得啱啱好, 成件事好balance。
食完壽司, 就到唐津城。
唐津城, 又叫舞鶴城,
因為由城池兩邊延伸開去o既沙灘,
好似白鶴展開雙翼咁, 因以為名。
由山丘下望上去天守(主城樓)。
開始進入城池o既山丘之前, 有一個小花莆,
啲花都幾靚。
另外, 會見到下圖o既石碑,
介紹歷代城主o既家紋。
上左小山丘到城樓主建築群時,
會見到上圖o既棚架,
其實係用以支撐紫藤, 下圖可以見到紫藤o既主幹。
紫藤就係會開出一抽抽紫色花o既攀緣植物,
相信到左5月, 呢度o既紫藤花一定好壯觀。
都差啲唔記得左, 唐津其實都係《ユーリ!!! on ICE》o既聖地。
到主城樓。
而家o既唐津城, 其實係用水泥建成o既物館。
因為明治初期, 廃藩置県, 下令拆卸全國大部份城樓,
而唐津係其中之一。
需然後來重新用鋼筋水泥起番成樓,
但石垣因為日久失修, 所以開始變形, 有崩坍o既危險,
於是政府將石垣拆左, 整理過後重身再裝番,
順便做埋抗震補強, 最後成就今時今日o既唐津城。
好多時城樓主建築物都會有神社。
另一棵紫藤。
城樓o既西門
西門上十分矮小o既門戶, 僅夠一個士兵通行。
一來以前日本人比較矮小,
二來防止敵人湧入。
由廣場望向天守。
而右手邊就係一片櫻花林。
櫻花林前面o既石碑。
留下買路錢, 進入五層高o既唐津城,
不過博物館入面唔可以影相,
所以之後o既相, 已經係上到頂樓觀景台o既事。
唐津城雖然係後來用水泥重建o既城,
但仍然有咁上下名氣, 係因為佢o既景觀在太正。
幾乎可以話係三面環水。
用全景模式反而拍唔到嗰種三面環水o既震撼。
唐津城o既小賣部。
近排《ゾンビランドサガ》咁heat,
當然唔少得佢地o既動漫精品。
臨走前打番吓咭先。
以下落黎就係真真正正o既動漫聖地巡禮喇。
對《ゾンビランドサガ》冇興趣o既朋友,
可以拉右邊個scroll bar直到下一個景點。
有睇過《ゾンビランドサガ》o既朋友,
應該對上圖o既建築物一啲都唔陌生,
因為就係主角們o既大本營。
而建築物o既真身係,
唐津市歴史民俗資料館（前身旧三菱合資会社唐津支店本館）
雖然而家博物館冇外開放,
但入面仍然留有《ゾンビランドサガ》o既足跡。
聖地到過了, 時間都尚早,
於是用手機睇下仲有邊度好去。
見到有個鏡山公園, 於是立劇揸車過去。
自己揸車就有呢個好處,
話去就去。
係山腳有個大鳥居。
上到山上o既停車場,
有兩三間好簡陋o既手信店,
以及一間好細好細o既訪客中心。
到展望台之前,
小弟先參觀旁邊o既鏡山稲荷神社。
其實鏡山呢度有一堆神社,
其中就包括佐用姫神社。
上圖就係講關於鏡山呢一帶關o既三個愛情故事,
帶出呢度o既神社對守護愛情好靈驗。
除左上圖o既神社建築之外,
小弟後來仲發覺鏡山有啲好爆o既野,
不過小弟當時唔知, 冇去到,
不過就算去到影左相都唔可以係度放俾大家睇,
因為係18禁o既野。
有興趣o既看官可以search吓鏡山道祖神o既圖片。
參觀完鏡山稲荷神社, 出番停車場,
沿住上圖兩間小賣店中間o既路(下圖)行出去,
會到鏡山展望台。
展望台個空地都仲有兩三間店,
不過唔知係小弟黎得晏, 定係真係冇乜遊客,
全都部都冇開。
上圖呢個雕得有啲肉酸o既石像,
就係之前提過o既佐用姫, 呢度講多少少。
話說當年日本天皇派大伴狭手彦去攻打新羅(位於韓國半島),
黎到松浦(今九州西北)出發前, 同佐用姫墮入愛河。
最後不得不出發遠征, 佐用姫黎到鏡手一邊目送一邊揮手,
但仍然按捺不住追出去, 一直追到去呼子(聽日小弟o既目的地)。
至於結局, 眾說紛云, 有happy ending,
亦都有話佐用姫變左望夫石,
不過應該就唔係上圖呢個石像囉。
上圖就係展望台, 可以望到成個唐津灣。
上圖中央o既尖啄, 就係唐津城o既所在。
180度panorama
夕陽無限好, 係時候走。
今晚留宿唐津。
之前都提過, 因為行程plan得比較趕,
加上好似話呢期佐賀県推多左好多吸引國內遊客o既優惠,
所以小弟完全book唔到酒店,
最後最後先見到有人cancel booking,
free番間guest house 出黎, 唔理, 照殺。
本身諗住唐津都算係稍有名氣o既成市,
夜晚搵野食應該唔難丫, 點知係小弟錯了......
上圖應該係唐津最熱鬧o既商店街,
時間只不過係七點幾......
而下圖係JR唐津駅o既對面馬路,
唔好玩啦大佬, 小弟想食飯......
上圖係車站o既店, 乜都閂晒.......
而下圖係車站o既唐津觀光案內所。
打個咭, 繼續搵野食。
成個車站o既商場(其實得一層, 十間店左右),
得番兩間野有開, 一間係冇客o既居酒屋,
另一間就係上圖o既拉麵店。
比起無人o既居酒屋, 呢一間咁地道o既拉麵店更吸引小弟。
店入面除左bar枱之外, 就得兩三張枱,
裝修十分簡陃, 但真係好有小店風味。
坐左兩枱中學生, 感覺似係完左課外活動一齊係度食野。
一切都好本土風味。
小弟叫左個角煮拉麵同埋一碟餃子。
唔可以話非常好食, 但已經贏左大部份香港o既濕鳩拉麵,
起碼啲湯底都真係豬骨淆出黎, 唔係得個死鹹丫,
而且可能因為唔係大城市, 價錢一啲都唔貴。
不過唔知小弟係咪因為年紀大了,
食完個拉麵, 覺得唔太健康, 去便利店買左盒沙律番guest house咬。
沒有留言:
張貼留言