今日第一個景點,
係黎到九州最出名o既紅葉名所之一, 耶馬渓。
作為九州最出名o既紅葉名所之一,
一到左秋季, 耶馬溪都會吸引大量遊客,
不過因為耶馬溪實際上係一個山峽,
中間夾住一條雙線雙程o既公路,
塞左條路的話實在搞唔掂,
所以係最旺嗰兩三個星期,
耶馬溪都會實施交通管制, 揸車排隊的話排到hi。
所以大家去耶馬溪賞楓的話,
真係要好早計劃同留意當日交通安排。
小弟今日黎到, 就完全冇交通管制,
事關小弟比紅葉peak season遲左個幾星期先到......
即使係咁, 淨係個停車場啲紅葉都已經夠晒打咭。
(下四圖)
停車場旁邊o既小溪。
先去訪客中心睇下有咩有用資訊,
at least影張地圖都好。
順便睇吓附近有咩好去。
事實上, 小第今日第二個景點, 御霊もみじ
就係係呢個訪客中心搵到,
所以都唔好話訪客中心冇用。
頭先都提過, 耶馬溪其實係一個山峽,
所以遊覽耶馬溪, 就要跟住啲步道行,
順道觀賞兩邊山峽o既奇岩怪石。
對面山頭o既「烏帽子岩」,
因為有啲似官員烏紗上面突起嗰棟野, 因以為名。
是但啦, 你話乜就乜。
欲窮千里目, 更上一層樓,
想睇遠啲, 就係向山上行,
上圖個路牌指示觀景台(見晴らし台)o既道路。
沿途都幾斜, 有啲地方要手腳並用先行到,
加上山峽比較潮濕, 有啲石都跣跣地。
不過楓樹紅葉同銀杏黃葉真係冇得頂。
事實上, 小弟過左peak season先黎到,
所以好多紅葉都已經落葉, 淨番枯枝。
上面啲圖, 小弟就過吓角度, 影落好似好靚咁,
實情係好似下兩圖咁......
上兩圖啲枯枝, 相信都係紅葉,
所以可以想像, 如果係紅葉當紅之前過黎,
更力加係蔚為奇觀。
唔怪得耶馬溪係九州最出名o既紅葉名所之一。
如果大家上絅search耶馬溪的話,
出現得最多o既應該就係上圖呢個岩山。
不過只緣身在此山中, 陣間會有啲遠鏡。
耶馬溪o既登山路,
好多都係當地o既商會、志願組織自己修繕,
大家欣賞美景時, 要心存感激。
落番山腳行o既主街道/馬路行吓。
都有啲觀景台俾大家打咭。
下兩圖就係頭先提過嗰個岩山。
可惜紅葉都變晒枯枝。
一堆石, 唔記得叫咩名。
看官見到係咩就係咩啦。
即使係道路, 旁邊都係一大排楓樹。
即使唔係黎睇紅葉,
耶馬溪都係一個小型郊遊o既好去處。
除左紅葉之外,
小弟見到路邊有呢棵樹, 開滿白花,
不過小弟學識淺薄, 唔知係咩花。
為左醫肚, 上網搵附近比較好食o既店,
搵到上圖右手邊呢間深瀬屋,
〒871-0422 大分県中津市耶馬溪町深耶馬3153-1
話係山かけそばo既元祖。
所謂o既山かけそば, 就係將山芋(やまいも)磨成蓉,
(即係所謂o既とろろ)
然後撈埋落蕎麥麵一齊食。
老實講, 小弟對於滑潺潺一pat pat o既野都唔係好得,
不過既然係呢度o既名物, 咁點都要試下o既。
食落......嗯.......唔係好唔好食o既問題, 只係小弟唔鐘意食......
但身邊o既顧客都食得津津有味。
另外, 呢間店promote自己醃o既冬姑,
所以小弟叫左一小份黎試。
好Q辣, 要黎送麵送飯都可以,
就咁食小弟唔係好得。
好難得係日本遇到真係辣o既野。
小弟講番清楚先, 唔係呢間野啲野唔好食,
只係小弟本身唔鐘意とろろ同埋唔食得辣。
間野本身好旺場。
因為小弟過晒peak season先黎耶馬溪,
紅葉都已經落晒葉, 可以影o既相比想像中少,
所以係呢度花o既時間比想像中少。
食完野時間都尚早, 於是就去耶馬溪訪客中心,
睇下附近有冇咩景點。
search左陣, 就搵到20分鐘車程o既距離,
有一個紅葉秘所叫御霊もみじ,
咁啱又係小弟o既行程方向,
於是就出發了。
御霊もみじ可以話係某小鎮山邊o既一個小神社,
神社o既本體真係細到一個程度, 你唔覺得佢係神社。
如果唔係紅葉的話, 小弟估平日應該都冇乜人黎。
門口有個鐵閘, 大家唔洗驚, 推開就入得,
個閘只係用黎防野豬。
入左鐵閘, 會先見到上圖o既石鳥居,
不過大家可以先行前多少少,
就會見到下圖一條長長o既石階。
絕對係一個打咭位。
石階兩邊o既斜坡都係紅葉(上兩圖)。
係石階上面影番落去,
鋪滿銀杏黃葉, 又另一種色彩。
上左石階, 有一個平台,
亦都係御霊もみじ睇紅葉最好o既位置,
正前方o既銀杏同紅葉就係主角,
再加埋片地銀杏葉, 冇得彈。
由平台後方行上少少,
就係下圖見到o既神社本體建築,
真係就咁好細一間木屋仔。
頭先提到, 石階之外仲有另一條路,
就係石鳥居嗰條,
其實沿嗰條路, 都可以欣賞斜坡o既紅葉,
不過以打咭角度黎講,
就一定係石階好啲架喇。
地方唔係話好大, 一條魷, 影大半個鐘, 乜都影夠,
點半鐘左右, 出發去下個景點,
揸大約一個鐘左右車就黎到,
桂昌寺o既極楽地獄。
睇下個停車場背景就知道有幾山旯旮,
唔揸車真係唔會黎得到。
搭巴士的話, 全日先得四班車.....
雖點荒蕪, 但有清晰o既路牌,
一定唔會話搵唔到。
呢個桂昌寺極楽地獄, 係一個江戶時代o既僧人,
為左教導眾人佛法而建o既一個主題樂園(誤)。
佢係山邊開鑿左一條隧道, 然後係入面放左不同o既石像,
按住人死後o既經歷, 見到牛頭馬面、孟婆、閻王,
唔同o既死獄官吏同神明, 最後爬番出黎, 喻意輪迴轉世。
等我地而家黎一次死亡之旅。
一黎就牛頭馬面加閻王
入面照面都唔係話好光,
好難想像江戶時代入面係幾暗。
首先行右邊o既地獄, 之後會兜個團呢番呢個分叉口。
途中有一個好低好細o既窿, 寫住胎内くぐり入口,
另一邊出口係向住洞外, 見到陽光,
喻意俾人經歷投胎轉世, 經過母親o既產道再進入世界,
都幾有心思。
成年人踎都唔掂, 真係要手肘膝頭咁爬先入到,
不過因為裏面比較潮濕, 地面啲泥都未乾晒,
小弟唔想整污槽, 所以放棄左。
繼續行有唔少乜乜明王, 乜乜菩薩。
青鬼&紅鬼, 中間個水氹係特登挖的,
叫血池地獄。
往極樂, 即係上天堂喇。
越行越光。
然後慢慢見番陽光同天空。
上圖o既下方嗰個窿,
就係頭先胎内くぐりo既出口,
爬出黎就會見到下圖o既海闊天空。
出番黎, 小弟重生喇!
岩石頂不忘整番句南無阿彌陀佛。
老實講, 呢個景點都幾特別,
正如佢o既介紹文都有講,
呢種咁o既傳教設施, 都真係十分罕見。
但因為實在太山旯旮, 小弟覺得又唔需要話特登揸車黎,
甚至等嗰一日得四班o既車過黎。
但如果係順路, 又想搵個位攝時間的話,
呢個絕對可以係一個選擇。
成個地獄主題樂園(誤), 半個鐘乜都行完睇完。
今日最後一站, 黎到宇佐神宮。
宇佐神宮, 作為日本三大八幡宮之一
亦都係全日本44,000間八幡宮o既総本社,
反正黎到大分県, 於是順便黎睇吓。
同好多大型o既神社一樣,
入到神社之前, 有一條長長o既參道,
參道旁有好多店舖。
見到上面張地圖,
就算唔知scale比例,
都大約估到宇佐神宮真係佔地極廣。
神社入面放左個火車頭,
呢個1891年來自德國o既火車頭,
首先服役於九州鉄道, 然後服務宇佐線,
最後宇佐線於1965停運,
而火車頭就放左係度作為紀念
寄藻川 o既神橋
宇佐神宮除左係全國眾多八幡宮o既総本社之外,
仲相傳係而家各式各樣神輿o既發源。
事源當年749年奈良東大寺大佛建成,
眾人就由宇佐神宮, 抬住八幡神同大神杜女, 前往奈良。
此舉成為左日後神社建造神輿o既出典。
間唔中都影下紅葉。
初沢池, 右手邊係宝物館。
御霊水, 話係八幡大神顯靈之地。
御霊水水井
話就話靈水, 不過有啲野都要忠於科學。
靈水o既水質未能達到飲到水o既標準,
所以大家可隨便斟, 但飲就唔好喇,
放係神檀度供奉下就算。
下圖係御霊水對出o既水池---菱形池。
其實一啲都唔菱形......
頭先講到話帶八幡神同大神杜女去奈良拜大佛,
唔知大家有冇覺得有啲咩唔妥呢。
明明係神社(神道教), 點解會去東大寺拜大佛(佛教)?
原來宇佐神宮亦都係神佛合一o既發源地。
當年啲人邊會分咩神定佛,
初初佛教傳入日本, 慢慢啲人就開始將兩種信仰撈埋,
而宇佐神宮亦都正式發展成為一個神佛合一o既綜合設施。
所以上面o既Banner話, 宇佐神宮係
「神和佛於日本最初相會o既地方」。
其實日本一直都係神佛合一,
神社同佛教分開,
係一直到明治初期o既「神仏判然令」先開始。
宇佐神宮分左下宮同上宮。
下宮o既樓門修復緊。
可能開始日落西山,
而下宮位置比較低, 樹木又較高,
加上唔太多人, 有啲幽靜o既感覺。
然後沿石級上去上宮
途中經過若宮神社
上宮o既西大門都係修復緊。
上宮, 入面分別有住吉神社, 北辰神社, 同埋春日神社。
參拜宇佐神宮, 同參拜其他日本神社好唔同,
一般神社都係二礼二拍一礼,
即係躹兩下躬, 拍兩下手, 最後再躹一個躬,
但宇佐神宮代代傳落黎係拍四下手的,
神社自己都話原因已經失傳, 唔知點解,
不過照做啦。
勁大碌神木
傳統黎宇佐神宮, 都會係外面參道買宇佐飴食,
老實講, 粉粉地, 有陣奶味,
唔係話唔好食, 但亦都唔係話好好食。
晚上黎到呢間好評如潮o既炸豬扒店---金の豚 宇佐店
地址〒879-0444 大分県宇佐市石田２１５
大家睇到幅相, 小弟應該乜都唔洗講。
仲要椰菜、味噌湯、醃菜都係任裝!
自行腦補, 慢慢羨慕~~~
沒有留言:
張貼留言