今日最重要o既一個行程,
就係重遊阿蘇火山。
11年前o既夏天, 小弟黎過阿蘇火山,
不過嗰時陰天又大霧, 草千里 就連半里都睇唔到。
今次陽光普照, 諗住實冇死啦, 點知......
Anyway由早上開始講起。
晨早空氣清新開朗,
望住個無敵阿蘇山山景食早餐,
然後就出發, 先到阿蘇神社。
緊貼日本o既朋友應該都知道,
2016年o既熊本大地震, 為熊本一帶帶來唔少破壞,
除左熊本城有部分石垣崩塌之外,
阿蘇神社亦有唔少建築物倒塌。
而上圖俾四四方方外殼罩住o既,
就係阿蘇神社完全倒塌左o既正面建築物---樓門。
上圖係拜殿,
係地震時局部倒塌, 而家已經修復完畢。
可以明顯見到左邊o既建築物較深色, 係老舊o既木材,
而圖片另一邊(拜殿中央部份)則較光鮮, 係修復部份。
下圖係拜殿o既另一邊。
上圖係拜殿中又央部份, 全新。
通過拜殿o既空間, 可以見到後面o既神殿。
三個神殿都冇受到破壞。
由則面睇拜殿(左)及神殿(二の神殿, 右)
有2000幾年歷史, 鎮守阿蘇火山,
亦都係全日本450幾間阿蘇神社o既總本社,
受到地震破壞, 實在有啲可惜。
不過亦因為呢一次o既破壞,
研究人員有幸一睹建築材料o既內部, 隱藏住唔少資訊,
包括榫卯o既結購、木材上o既記號、以及木材加工o既痕跡等。
透過歷史圖片, 還原番神社o既細節。
係解體倒塌物時, 發現木材上唔少野,
包括工匠寫係木材上紀錄出處o既資訊、
畫係木材上o既頭像、甚至係和歌(日式詩歌)等等。
透過木材上o既痕跡, 推斷番當年加工木材o既工具同埋步驟。
上下圖都係講緊榫卯。
好驚訝以前o既人點樣可以做到咁複雜又精準o既榫卯。
正面o既樓門雖然被罩住,
但旁邊有一個小窗,
大家可以窺看入面修復o既進度。
工作人員亦都放左一啲模型,
展視一啲簡單o既建築結構。
小弟好欣賞日本人呢一種想法,
當年參觀名古屋城都係,
其實佢地大可以閉門造車,
拿拿聲起好開放俾人參觀早啲賺錢,
但日本人就會將教育o既元素融入其中,
一來令遊人有更多見識, 同埋唔會乜都睇唔到咁失望;
二來, 亦都係對自己工程管理o既信心表現。
如果個工地亂七八糟又偷工減料o既,
我諗冇人會主動去公開參觀囉。
為左黎緊過新年, 公開招募巫女(神社女職員)。
神社前o既水池,
啲水好清。
係便利店買左幾個飯團同埋一支麥茶,
就正式開車出發上阿蘇火山。
沿途環境開揚, 心鄺神怡。
上圖同下圖都係草千里,
春夏o既時候都真係一大片草地o既,
不過而家係秋天, 所以係一片棕啡色,
不過都好過10年前黎嗰時, 大霧到乜都見唔到。
繼續上山。
小弟初初都奇怪,
點解上到黎, 設施同10年前完全唔同,
以前係可以坐吊車上山頂,
而家就只可以步行或者坐接駁巴士。
上網check番, 原來因為幾次o既火山活動,
已經令阿蘇山ロープウェー停過好幾次,
而2016 o既熊本大地震更加破壞左吊車設施。
到而家, 就只可以步行或者坐接駁巴士到火山口參觀。
一般人可以揸車到阿蘇山上ターミナル(Terminal),
上圖就係一個案內設施連巴士站,
買手信、買火山口接駁巴士票,
同埋落山巴士都係係呢度搭。
Terminal入面有各樣手信,
而上圖呢個所謂o既酒杯尤為吸睛.....
叫做おっぱいそらきゅう,
唔番譯喇, 誠如佢個外觀, 日文名只係將佢文字化。
當然, 就咁睇唔似杯, 係因為而家佢地都係杯口向下。
話因為呢種形狀o既杯唔可以好好放係枱上(咁就梗係),
所以有人斟酒就一定要乾左佢。
係一種迫人飲酒o既神器。
另外, 用火山灰做o既貓形擺設。
日文「灰」字同「輩」字諧音,
攞日本文學作家 夏目漱石 o既名作《吾輩は猫である》黎玩食字。
Terminal旁邊o既神社。
就連神社都同當年完全唔同晒。
上圖呢個係新起的。
下圖就係10幾年前o既樣貌↓
小弟留意到, Terminal o既北面有道路工程進行緊。
似乎係起緊新o既路兜去火山口o既北面, 以至東面。
小弟諗住, 今日好天到爆,
一定可以睇到火山口實冇死啦。
殊不知天意弄人, 因為風向問題,
有毒火山氣體都吹晒向西面,
亦即係Terminal呢邊, 所以實施上山管制,
唔能夠上山........
%&^&@#*$^@%()
小弟上網Search左一大輪阿蘇山o既天氣同風勢,
似乎今日全日都唔會轉風向,
所以由terminal上山o既念頭可以打消。
無錯, 由terminal上山的話。
既然啲風吹向terminal呢邊西面,
咁小弟只要由東面上山就得啦~
其實有一個荒廢得更加耐o既吊車設施,
仙酔峡ロープウェイ。
而小弟深明, 好多時有吊車的話,
下面都一定會有parallel o既登山徑。
於是小弟上網search過吓之後,
就揸車兜過黎火山口東面o既
仙酔峡インフォメーションセンター(Information Centre)。
泊低車, 睇熟地圖,
帶上飲淨2/3支o既麥茶,
小弟就踏上征途。
沿住 仙酔峡ロープウェイ跡ルート。
(仙酔峡rope way跡route)
好在時值秋天, 天氣乾爽唔熱。
不過一開始已經係無限石級,
而且斜率頗高又冇乜平坦路段唞,
好快已經腳仔軟......
可能因為比較開揚, 一開始望落山頂好似唔太遠,
不過行極都好似冇乜接近到......
上下圖可以見到當年吊車o既石屎柱
沿途有唔少火山石。
由中段開始, 就唔再係石級,
而係上圖呢種石春路,
一如所料, 呢啲石春路仲難行,
勁易拗柴又嘥力......
令小弟諗起當年行箱根古道......
用左差唔多一個鐘,
行完仙酔峡Rope Way跡Route,
見到一片人工平地進行緊工程,
似乎當局真係想再起一個觀光點係火山口東面。
小弟本身係想行「火口東展望所Route」,
進一步接近火山口。
不過小弟可能搞錯左眼前一條登上山丘o既碎石路,
結果小弟就半行帶爬咁爬上碎石山丘。
受破壞及廢棄o既臨時火山躲避shelte。
遠處可以見到零散o既鳥居。
好辛苦咁上到山丘上, 終於見到火山口,
但好似有啲遠(當時小弟仲未知行錯路)
大家會見到火山口之外,
仲有一兩層o既同心圓結構,
咁係因為經歷過幾次爆發,
唔同o既威力會做成唔同直徑o既同心圓。
Zoom盡個鏡頭仲可以見到草千里o既設置及停車場。
呢個時候小弟向山丘下方望,
先發覺原來仲有一條路,
(上圖o既中下方可以見到個shelte)
小弟先意會到, 呢條先係真正接近火山口o既火口東展望所Route。
不過實在太攰喇,
小弟已經再冇力行多1小時來回火口東展望所Route,
加上時間上亦都唔容許, 所以決定落山。
今晚住宿o既地方係別府,
日落前仲有少少時間,
兜少少路可以趕係四點前去多個景點,
就係 九重夢大吊橋。
不過呢個景點又啱啱好係我o既路程中間,
所以順便去行吓。
下面就係吊橋o既相片。
正值日落西山,
就係停車場旁邊有一系列小店。
除左吊橋本身之外,
似乎附近都有啲野睇吓,
不過小弟唔夠時間, 所以行左條橋就算。
落雨o既時候唔可以擔遮, 要著雨褸,
如果冇帶的話, 可以去啲小店買。
係吊橋o既中央有一版金屬板,
比較吊橋同其他野o既高度, 包哥斯拉www
吊橋望出去o既景色。
其實, 真係冇乜特別......
係有條瀑布咁囉。
當然要利用吓個鹹蛋黃黎影相。
醒起大分出名冬菇,
其實仲有一個原因增加左小弟會黎九重夢大吊橋o既意欲,
就係因為小弟知道吊橋同《咕嚕咕嚕魔法陣》有個collaboration,
係園區內四個溝渠蓋換上左《咕嚕咕嚕魔法陣》o既人物同魔法陣。
不過小弟只係搵到兩個。
後來先知道, 另外兩個圖案係大橋另一邊o既出口外面。
臨走前去左啲小店睇吓有咩賣。
所以買左包乾冬菇番屋企。
不過唔知係小弟唔好睬定係呢度啲貨唔太靚,
事後番到香港呀媽煮黎食之後話,
以個價錢黎比, 啲乾冬菇唔係話特別香。
沒有留言:
張貼留言