老老實實, 小弟雖然係鐘意睇啲歷史野,
但唔知點解對於長崎o既外國樣式建築,
小弟又唔係話特別有興趣,
於是小弟計劃行程o既時候,
就搵吓有冇咩展館可以睇吓,
丫又俾小弟搵到長崎有個企鵝水族館。
仲要都有少少來頭, 於是就放左入上午o既行程。
結果兩日半stay係長崎,
只係睇左個軍艦島同大浦天主堂咁大把。
小弟冇特別研究, 所以直接就泊左係第1駐車場(上圖最左)
但原來由第1駐車場行去企鵝館(上圖紅色部份),
要行經長長o既植物園區(上圖綠色部份), 約二三百米左右。
植物園區係一個室外o既空間,
主要係模仿沼澤、溪流o既生態,
好似話夏天會有啲戶外活動例如睇螢火蟲,
不過秋天就冇乜搞作。
成日都話, 日本啲動物園、博物館啲收費真係好良心,
小弟未入去水族館入面, 唔知有幾多企鵝,
但大人先520羊, 一餐飯o既價錢唔洗(睇你食咩啦),
大佬淨係入去涼冷氣都抵啦。
香港個海水公園, 展館費逐個同你計, 都唔止呢個價。
初初只係諗住搵個景點睇下, 冇特別做研究,
但原來長崎ペンギン(企鵝)水族館來頭不小。
長崎ペンギン水族館, 前身係長崎水族館,
最初o既企鵝係黎自1959年南冰洋捕鯨船。
因為當年人類未有飼養、並繁殖企鵝o既經驗,
當時長崎水族館可以話係飼養企鵝o既先驅,
及後, 全世界好多水族館都係參考長崎水族館o既飼養方法。
時至今日, 「長崎方式」
係現今各國水族館飼養企鵝o既其中一套標準模式。
黎到企鵝館, 第一時間梗係確認一下餵企鵝o既時間表,
當然, 最好其實係出發前就確認。
唔講唔知, 企鵝都有成18種,
而長崎ペンギン水族館就已經養左9種。
老實講, 長崎ペンギン水族館唔算大,
小弟估計, 主館範圍, 可能半個足球場都冇,
樓高只有兩層, 但已經養左9種企鵝, 實在係堅。
下圖開始係第二層o既室內企鵝,
應該係比較怕熱o既品種。
餵完晒野食, 都仲跟住飼養員, 好搞笑。
偷窺到飼養員檢查企鵝。
自從睇完動畫公司PA Works
o既打工系列動畫《白い砂のアクアトープ》之後,
對飼養企鵝有更深入o既認知,
明白到呢份工一啲都唔易做。
首先最基本, 係要認得晒.每.一.隻.企.鵝......
要點先認得, 當然唔係靠樣 (雖然做得耐o既都應該真係可以),
大家可以發現, 所有企鵝o既翼根部份都會有啲顏色帶,
唔同o既企鵝水族館可能有唔同o既system,
但飼養員都係靠唔同顏色o既帶黎分別每個個體。
地面嗰層主要係室外展館,
養住啲唔怕熱o既企鵝。
係時候餵企鵝喇, 個候生仔似乎係研習生,
由另一位師姊提點住黎餵企鵝。
餵企鵝一啲都唔易的,
一來移動o既時候要小心唔可以踩親後面啲企鵝,
二來, 目光又唔可以離開前面啲企鵝,
三來, 要記得邊啲企鵝食得多, 要主動餵啲食得少o既企鵝。
大大話話都二三十隻, 你都咪話容易。
另外, 有一個位係專養企鵝BB,
好可愛。
(上一圖, 下二圖)
室外展館, 有一啲地方係可以極近距離睇企鵝,
有幾近, 可以睇下下面張相。
只係隔住一塊十幾厘米厚o既玻璃, 伸手可及。
當然, 大家唔好伸手去搞啲企鵝。
等上圖佢地一家人走開左, 小弟就去嗰個位置影企鵝喇。
真係超近, 就係小弟身前。
其實係館外面沿海仲有個沙灘,
有時會俾啲企鵝出去放風。
不過因為近排日本境內有禽流感o既report,
所以取消放風。
除左企鵝, 水族館都有其他海洋生物o既展覽,
不過當然佔比就冇咁多架喇,
始終大家o既目的主要都係黎睇企鵝。
俾小朋友觸摸海洋生物o既corner,
都係啲海星嗰啲咁囉。
唔少得o既當然有精品店,
如果小弟唔係仲有成個星期o既行程,
真係會買番一兩隻。
可唔可以唔好咁望住小弟......
係小食店食左杯雪糕之後,
就出發去食午餐。
小弟搵左間食蕎麦麵o既店, 好似係好出名的。
頂你又俾人包左場?
琴晚間ちゃんぽん麵又係咁,
今日又係咁.......
唯有即刻上網再搵。
係呢啲山卡啦, 又要順路, 又要好食, 非常困難,
不過最後都搵到, 稍稍兜路o既地點,有一間好評o既蕎麦麵店。
手打ちそば土師野尾
地址: 〒854-0056 長崎県諫早市土師野尾町1451−２
呢間店, 真係係山入面的,
最近o既市鎮, 都有幾公里遠。
睇下下圖就知, 望出去, 除左幾間屋仔就乜都冇, 只有山。
但最神奇o既係, 一間咁山旯旮o既店,
竟然有成廿架車停左係度, 有十幾個人排緊隊。
一間咁山旯旮, 又咁細o既屋仔店, 竟然有咁多客,
小弟就知道, 一定係好野。
不過代價係, 要等成個半鐘先入到去。
店員循例都問聲小弟, 要等個幾鐘, 等唔等。
見到咁多人排隊, 肯定係正野,
加上要去另一間又唔知要揸幾耐車,
所以小弟好爽快就話等。
店員入番店入面冇耐,
就棟個牌出黎, 話本日o既蕎麦麵售罄......
小弟真係好好采。
小弟後面都陸續都仲有人黎拜訪, 但都敗興而回。
等左個幾鐘, 終於入得喇。
地方唔大, 但裝修簡單, 好骨子。
只可以坐地下, 膝頭唔好o既人可能要諗清楚。
價錢一啲都唔貴。
餐牌下部有介紹,
用o既蕎麦粉, 係來自本地特產,
稱為幻の蕎麦。咁把炮?
小弟真係好肚餓, 所以叫左個定食。
雖然小弟鐘意食生冷野,
但以小弟o既經驗, 要食得出蕎麦o既香氣, 係要熱食的。
小弟唔知點講, 只可以話,
雖然唔係粗挽き, 但仍然有好濃o既蕎麦味。
另外, 個湯底亦都非常清甜, 唔死鹹, 入喉回甘。
唯一可惜o既, 係啲蕎麦麵太碎, 影響口感,
以乎佢真係好生意到啲蕎麦麵賣到渣都冇,
要將最後一啲麵碎都煮埋先夠出餐俾小弟。
兩點幾食飽左, 出發去下一個地點, 雲仙溫泉。
一如以往, 小弟平日都會住平啲,
然後留番啲錢押晒落一間高級旅館。
而今次押注o既就係雲仙スカイホテル。
〒854-0621 長崎県雲仙市小浜町雲仙323-1
好似係一間頗有歷史o既旅館。
可能因為長崎係比較早同西方多往來o既地方,
而雲仙又係距離長崎比較近o既溫泉區,
所以呢度有某啲旅館, 裝修格局都比較老套,
有啲日式又日式唔晒, 扮西式但又out晒date o既感覺,
不過體會到呢啲時代o既變化, 又係一種旅行體驗。
雲仙スカイホテル, 污糟就講唔上o既。
但有番咁上下歷史, 小毛病唔多唔少都有啲架喇,
例如走廊o既天花牆角有滲水。
不過客房完全冇問題, 而且仲好正添。
溫泉旅館, 就算最細, 基本上都係以二人為單位,
所以就算小弟係一條魷, 都會獲安排雙人房,
不過日本溫泉旅館普遍有一個bug, 就係收費按人頭計,
所以小弟一條魷住雙人房都唔會double價錢。
因為小弟係早見沙織粉,
所以見到呢間旅館有名為「楓の間」o既房,
毫不猶豫就揀左(明就明)。
完全冇揀錯,
個景勁開揚, 仲要望到雲仙地獄 (陣間再講)。
係旅館大堂見到啲二次元角色,
係度講少少動漫野。
日本o既溫泉聯盟之間有一個project,
叫温泉むすめ, 直譯就係溫泉娘 (or 溫泉女孩whatever啦)。
每個溫泉區會有一個代表角色,
角色會由聲優配音。
温泉むすめ冇動畫化, 所以知名度比唔上粒拉、班尖嗰啲,
但個project由2016年開始啟動, 都已經有6年,
定期都會有演唱會同埋活動,
都儲到有一定o既粉絲。
雲仙溫泉o既代表角色, 雲仙伊乃里,
聲優: 奧野香耶
離開旅館, 門口就係雲仙溫泉o既大街。
T字路口轉角位有間店,
買緊一樣叫湯せんぺい, 中文直譯 湯煎餅。
既然係身處溫泉區, 咁唔難想像,
佢所指o既湯, 係講緊溫泉水。
果然, 係將溫泉水加入煎餅o既粉漿入面,
標榜做「食得o既溫泉」......
透過玻璃窗, 可以見到大叔係度燒湯せんぺい。
手掌左右咁大, 盛惠100羊。
金額黎講唔算貴, 但性價比比較低。
冇乜話特別好唔好味, 打過咭就算了, 唔好咁認真。
店入面仲有其他貨品同擺設,
十分有觀賞價值。
頭先都提過, 長崎係比較早對外往來o既城市,
所以連帶雲仙以及雲仙溫泉, 都成為當時外國人遊日o既勝地。
上圖應該係當年上海經長崎往神戶o既客船宣傳物,
小弟唔知刊物確實日期, 但應該係1924年打後o既刊物。
從刊物已經可以了解到, 當年雲仙已經係西方人渡假旅遊o既勝地。
起碼就算睇唔到啲內文, 大家都可以見到左上方,
大大隻字寫住Unzen Unzen (雲仙英文音譯: UnZen)
上圖好似花露水咁o既玻璃樽, 其實係梳打汽水o既複刻版。
識日文o既朋友, 第一眼望個包裝紙會覺得唔對路。
無錯, 同早年o既華語圈一樣,
早期打橫寫字, 啲字都係由右至左寫的,
所以會見到連片假名都係寫做ドーネモレ, 都幾搞笑。
進入雲仙地獄之前, 先經過溫泉神社。
呢棵柿樹似乎有咩典故,
就連絵馬都係柿o既造形。
神社旁邊有條小路通往雲仙地獄。
講左咁耐雲仙地獄, 其實係咩黎架呢?
唉......小弟都去過唔少地獄講過唔少次,
不過為左第一次睇小弟BLOG o既看官,
都係繼續解釋。
古時日本人好鐘意將又噴熱水、熱氣、硫黃等地區叫做「地獄」。
一來以前啲人對地殼運動冇乜認知啦,
二來硫黃區寸草不生, 怪石嶙峋, 又唔難唔令人想像成地獄o既。
因為好多時溫泉區附近都會有呢啲咁o既區域,
所以好多溫泉區都有乜乜地獄。
不過雲仙地獄, 又多一重歷史背景。
之前都講過長崎係比較早對外開放o既城市,
咁就肯定有外國傳教士o既身影,
而長崎o既天主教/基督教信徒比例都係日本數一數二的。
但日本曾經有段鎖國o既時間, 係禁止信基督的,
如果你唔肯踩基督o既畫像, 就會被捉去處死。
當年長崎有啲信徒, 就係被捉左黎雲仙呢度行刑。
(唔好問我點解要行咁遠過黎)
所以無論係環境上, 定係歷史上, 呢度都係一個地獄......
嗯.......多謝提醒,
我都知地獄好危險, 無乜野我唔會入地獄,
地獄呢啲野留番俾阿"誰"去入。
意外地, 雲仙地獄範圍都幾大,
高低起伏, 而且景點相對多,
睇下啲介紹文、又影吓相咁,
慢慢行都可以行半個鐘以上。
係地獄度見到個十字架, 別有一番風情。
可能呢度夠暖, 所以黎呢度瞓,
但你sure你個鼻真係冇問題?
硫黃味咁重你都頂得順o既?
晚飯, 擺盤係日式同西式o既混合。
晚飯都食埋, 以為行程完晒?
梗係唔係啦, 其實小弟會揀雲仙溫泉,
並唔係因為佢o既歷史,
而係因為佢距離一個紅葉名勝好近,
呢個就係距離雲仙溫泉區十分鐘車程o既,
三十路苑。
加上小弟知道呢度係紅葉時節有晚間light-up,
所以小弟先會選擇雲仙溫泉,
咁小弟就可以半夜三更揸車過黎都唔怕遠。
三十路苑, 係長崎數一數二o既紅葉秘所,
不過好可惜, 雖然明明check過預報話小弟呢段時間係當紅,
但小弟今晚黎度, 都只係紅左大約30%左右,
有少少失望。
不知名o既花
三十路苑佔地都唔細, 約有半個足球場以上,
綜觀其實成個範圍都係楓樹,
全部紅晒的話一定好壯觀,
只好怪小弟黎得唔啱時候,
睇大自然o既景物就係咁, 天時、地利、人和。
本身計劃行程諗住第二日上午再黎睇紅葉的,
不過而家咁o既情況就可慳番,
番去浸多兩舖溫泉仲好。
P.S. 三十路苑守門口嗰班人(一家人?)好好傾,
吹左好耐水。
沒有留言:
張貼留言