今日會由西向東, 橫跨三個縣,
分別係長崎県、熊本県、同埋宮崎県。
本身諗過好唔好經過熊本県o既時候,
順便睇下熊本城修復好未, 不過時間好似有啲趕,
所以最後都係skip左。
起身食左個豐富o既早餐就出發喇。
小弟成日都話, 去旅行o既生活係最健康的,
食又食得好, 瞓又瞓得好。
本身諗住早上去三十路苑睇紅葉的,
不過琴晚睇完夜楓, 發覺未係好紅, 再去都無謂,
所以上雲仙o既官網, 求其search左個景點,
叫「白雲の池」, 不過好似冇乜特別......
好快咁就離開白雲の池, 去下一個景點喇。
因為雲仙位於比較高o既海拔,
所以揸車路上o既湖光山色都唔錯。
例如上圖呢個山頭,
就係產生自比較近期o既火山運動(1990-1991)。
因為係日本平成時期, 所以叫平成新山。
由雲仙溫泉揸半個鐘車,
就到達雲仙仁田峠, 雲仙ロープウェー(纜車)。
雲仙仁田峠, 都係一個好有名氣o既紅葉勝地。
可惜就好似大家見到o既咁,
小弟稍為遲左啲, 紅葉都落晒變秃枝......
所以睇花睇樹呢家野真係好講天氣同運氣。
琴晚嗰個三十路苑反而早得濟未轉紅,
但一山之隔o既仁田峠就已經過晒期......
得番少量紅色......
Anyway, 唔黎都黎左, 搭纜車上山遊覽一下。
琴晚都仲落緊毛毛雨, 今日好天都爆。
展望台全景。
對面應該係九州本島範圍, 即係熊本嗰邊。
俾著小弟係古時o既人, 見到遠處山峰雲霧繚繞,
小弟都會相信世界上有神仙。
再行少少樓梯可以上到雲仙妙見岳o既山頂,
標高1333米。
山頂有個小神社, 不過冇乜特別,
全水泥, 入面供奉左啲清酒係度。
睇唔到紅葉都冇辦法。
下一站小弟要一口氣由長崎県到熊本県。
你會話咩一口氣呀, 熊本県係長崎県隔黎。
無錯, 係隔離, 不過中間有個海......
如果按陸路行的話(藍色), 要兜多兩個幾鐘......
咁淨番o既選擇, 就係坐船。
無錯, 揸架車上船。
年輕o既朋可能會懷疑, 車都可以坐船架咩?
其實廿幾三十年前o既香港, 係有船可以載車過維港的。
Anyway番番黎, 係日本揸車坐船, 係小弟一直想試下o既野,
今次基於行程o既便利性, 終於如願以嘗。
小弟先由仁田峠揸十零分鐘車到島原市o既碼頭。
利用o既熊本フェリー(熊本Ferry) 公司o既船運。
同一個碼頭好似仲有另一間載車客船o既服務,
不過小弟plan行程嗰時係search到o既係熊本フェリー,
所以預約左熊本フェリー。
初初諗住今日上午會有好豐富o既行程,
所以本身預約左當日五點幾o既船,
點知三十路苑啲紅葉又未紅,
而仁田峠啲紅葉又落晒, 結果十二點幾就到左島原碼頭。
泊低車, 去左辦理手續,
同職員講cancel番傍晩個booking,
然後登記黎緊1340 o既船。
4500羊連司機, 又唔算貴。
如果車上有其他乘客, 要另按人頭收費。
仲有成粒鐘, 有咩好做?
咁大個碼頭設施, 實有野做o既。
先係食個烏冬定食做lunch,
然後行吓啲手信店, 睇吓有咩啱買。
因為呢度係往來熊本同長崎o既碼頭,
所以兩地o既特產都可以買得到, 一箭雙鵰。
小弟有一半o既量產手信都係係呢度買。
小弟架車排第一,
梗係啦早左成粒幾鐘到, 啱啱黎嗰時全場得小弟一架車咋。
夠鐘上船,
會有職員清楚指示開車, 而路就得一條,
所以絕對唔會有問題。
因為揸緊車, 都影唔到船o既全貌。
工作人員會係後碌攝舊木防止架車溜前溜後,
乘客就可以直接上客艙。
不過上到客艙, 實在係喜出望外,
唔知以為自己上左鐵達尼 (咁又冇咁誇)。
有各種o既坐位:
小圓枱、bar枱、卡位。
全冷氣。
上圖係二樓o既最前方, 要另外俾錢先可以坐入去。
(即場磅400羊)
仲有一個貨品齊全o既小賣部。
小弟買左個吉士蛋糕夾雪糕o既甜品。
好正。食完再encore左一個。
嘆住冷氣, 欣賞住海景,
大半個鐘o既船程, 4500羊完全係抵,
有機會小弟都想再搭。
差唔多埋岸, 會有廣播同大家講可以上車開定引擎。
睇住塊橋板放落黎, 就好似啲西方城堡放橋門咁,
令小弟好興奮。
小弟唔知係日本人真係咁均真丫,
定係艘船o既設計使然,
小弟係第一個上船, 停架車最前,
落船正正就係第小弟嗰邊,
所以小弟亦都係第一架車落船。
因為入秋o既關系, 天黑得比較早,
即使只係三點幾, 但陽光都已經開始偏黃。
最初小弟o既計劃係直接飛車去高千穂。
不過係呼子同個小販呀叔吹水嗰時,
佢推薦小弟去幣立神宮,
咁啱都係往高千穂峡o既路上,
所以順便睇埋。
幣立神宮, 又或者叫幣立神社,
其實並唔係啲咩出名o既神社,
佔地面積唔係話好大, 亦都冇話有啲好有意義o既歷史建築。
不過勝在夠靜。
經過上圖o既鳥居, 再登上下圖o既石階,
就到達主神社建築。
鳥居比較新, 小弟估計係近年重新修建的。
正如頭先講, 呢個神社冇乜好特別o既野,
不過因為身處阿蘇山、高千穂附近,
而阿蘇山、高千穂一帶係日本神話o既舞台,
所以作為文族傳說研究, 呢個神社都有唔少價值。
神社入面o既檜木,
好似話係全日本最大。
同埋話當天神降臨時, 係呢度休息過。
幣立神宮, 比想像中少啲睇頭,
小弟覺得可以唔洗特登過黎,
但如果順路的話, 睇下都無妨。
黎到高千穂。
book住宿嗰時, 揀左間最方便, 但又好平o既旅館。
好舊o既裝修同格局,
樓宇結構o既風格同氣氛,
有啲似80, 90年代內地o既旅館。
不過一個人, 3舊水可以霸晒9疊連2疊玄關,
仲有獨立廁所, 泊車免費, 仲想點。
〒882-1101 宮崎県西臼杵郡高千穂町三田井1099-1
今晚本身諗住係黎呢間「高千穂牛レストラン 和」食焼き肉的,
話晒宮崎牛都係出名o既頂級和牛之一。
但黎到先知, 原來如果要食焼き肉要預先預約......
不過都唔係完全無野食。
仲可以叫一啲牛扒set dinner。
啲牛的確係好靚o既, 唔靭, 好香牛油,
但因為小弟本身諗住係黎食焼き肉,
所以有少少失落(唔關食肆事)。
食完野, 晚上黎到高千穂峡,
為o既就係影真名井の滝晚間light-up。
其實同樣o既事, 十年前小弟已經做過一次XD
當年高千穂峡仲有夜神楽(可以理解做日式神功戲),
今年都想再睇的, 不過因為疫情影響, 仲未復辦。
上次黎, 條瀑布係就咁打白燈的,
今次就打左藍燈。
小弟覺得打白燈靚啲啫......
不過今次配有紅葉, 又另一種o既色彩配搭。
除左真名井の滝之外,
都仲影左吓真名井の滝涯上o既公園。
感覺係咪大執過黎, 好似惢十年前大左又靚左,
十年前黎嗰時冇咁多野。
Anyway, 今次黎高千穂峡o既主要目的,
並唔係話影真名井の滝, 話晒十年前都黎影過。
今次黎, 係要做一件十年前做唔成o既事,
就係係真名井の滝下方o既河划艇!
大家留意聽日o既post~
沒有留言:
張貼留言