正如琴日篇blog小弟最後提到,
十年後重臨高千穂, 係要實現心願,
完成一件十年前做唔成o既事,
就係係真名井の滝下面划艇!
當年因為落雨, 河水水位上升, 所以划艇公司停運。
今次為左達成願望, 除左求神拜佛唔好落雨之外,
就係預先做足功課, 睇下報名o既手續。
可以walk in的, 不過小弟知道,
呢個活動o既極受歡迎, walk in的話隨時等到謝,
所以都係上網book定穩陣啲。
揸車去到真名井の滝附近o既停車場,
上圖就係停車場旁邊o既售票處。
而下圖就係船飛。
十年前只係2000羊, 今次已經加價加到4100羊。
(星期五至星期一, 以及旺季要5100羊)
以日本呢個通漲極慢(or係零),
以及旅遊活動相對便宜o既國家,
呢個加幅真係好驚人,
難怪小弟做research嗰時都見到,
唔少日本人對呢個升幅頗為不滿。
但另一方面, 亦都可以見到,
呢個係一個幾受歡迎o既活動。
而小弟划完都會話,
呢個價錢, 都仲係值回票價的。
划艇由0830開始營業,
小弟一方面想瞓晏少少, 但又唔想咁多人,
所以小時揀左1000。
九點去到攞左飛之後,
就落去山峽下面o既河邊(上、下圖)。
天氣好到爆。
碼頭已經有唔少人排緊, 不過好暢順。
船公司講明, 每艘30分鐘, 每過時10分鐘加收300羊。
不過日本人多數都係守時的,
所以小弟排左15分鐘都冇見到有人要罰錢。
等o既時候, 睇下啲野鴨游水。
所以影唔到上船o既情況。
都冇咩特別, 船伕會鈎實隻艇,
客官自己踏上船。
上圖已經係出發左到河中心,
上圖右方就係碼頭。
上船o既地方係下游,
比較空鄺, 河面亦較寬, 水流平靜,
但亦明顯感覺到水流將船帶去下游方向,
不過唔洗驚, 下游有幾重紅繩攔住,
如果真係控制唔到, 小船被沖走的話,
遊客可以拉住紅繩, 沿住繩扯番埋碼頭。
小小題外話。
因為划船呢家野, 算係啲閤家歡活動,
多數唔係一家人, 就係情侶或者一班fd。
好似小弟咁一條魷黎划船, 真係萬中無一,
至少, 小弟由黎到直到走人,
都見唔到有其他船係一個人自己划。
而小弟上船o既時候, 亦感受到好多目光XD
Anyway, 小弟呢啲「人間強度」夠高,
加上美景在前, 一於好少理。
成個可以划船o既區域, 長大約200米左右。
兩邊都係奇形怪狀o既六角柱石,
加上頭頂o既石橋、綠色植被、紅葉、仲有瀑布,
真係美不勝收, 唔知可以用咩黎形容,
所以大家都係睇相啦。
(因為小弟來來回回左幾次咁影,
小弟下面啲相係以一往一返o既順路黎排番次序,
所以可能有啲相o既日照有出入,
但全部相都係小弟影, 原汁原味冇P過,
加上, 小弟根本完全唔識P圖)
一入左峽谷, 日照就突然暗好多。
過左瀑布約100米就已經係可划船範圍o既上游盡頭 (上圖)
一如以往, 小弟好鐘意影一啲工作人員。
上圖就係係上游候命o既職員,
應該係一來防止啲人太近瀑布,
二來係防止啲船堆埋一齊打大交,
三來應該係拯溺。
不過小弟估計, 如非真係好危險,
如果唔係佢都唔會出手。
因為途中小弟見到有一家人, 好近瀑布,
基本上有部份水已經係直接打落船身入面,
啲水花搞到佢地濕晒, 但快艇都仲係按兵不動。
手機影出另一種色調。
單反我刻意調較徧綠少少,
咁樣啲草木會翠綠啲, 啲水會白啲。
草木中透出耶穌光
石橋上o既剪影, 配上紅/黃葉。
其實冇野圍住防止人駛太近,
只要係唔會搞到沈船的話,
應該近到全身濕晒都唔會有人理你。
下游有一堆亂石, 水流亦較急,
峽底之蛙
天色又好, 氣溫又啱啱好,
真係感無量。
所以唔可以駛近。
半個鐘眨眼就過,
但絕對係值得的,
小弟亦了左十年來o既心願。
由橋望番落去瀑布。
另外, 當然要係山峽上o既公園影吓紅葉。
琴晚黎o既時候黑mung mung,
而家總算見到啲顏色。
上圖, 可能小弟影得唔太好,
但由近至遠, 綠紅黃三色變化, 幾靚。
小弟成日都話, 銀杏真係冇得輸,
就算變晒秃枝, 落葉都係地上成就出黃色地毯。
由高千穂公園另一邊影落去瀑布。
奇形怪狀o既六角柱石。
去下一個景點, 順路經過高千穂神社, 順便入去行下。
講多兩句, 其實高千穂一帶都係日本神話故事o既中心,
所以附近都有好多好有歷史同好有故事o既神社,
甚至日本o既太陽神---天照大御神,
當年哩埋係山窿玩自閉唔出黎見人,
嗰個山窿, 都係高千穂一帶。
有興趣o既朋友可以睇下小弟10年前o既blog
上次黎高千穂反而冇黎過高千穂神社......
其實今晚有正正式式o既夜神樂,
不過小弟行程夾唔到, 緣慳一面......
高聳入雲o既巨木。
為左治療一棵樹而做到呢個地埗,
小弟諗只有日本人先會咁......
高千穂神社o既拝殿。
拝殿前o既銀杏
見到橫扁上用篆書體黎書寫,
可見日本都保留左唔少中國傳統。
拝殿後面o既本殿
木雕十分精細。
當然唔少得御守り。
係咁依逛過吓高千穂神社之後,
下一個地點就係高千穂鐵路o既高千穂駅。
你會問, 一條魷揸車遊九州做乜仲要黎車站。
其實高千穂線係一條廢線, 而家已經俾私人買左落黎,
改成旅遊小火車鐵路, 成為左旅遊o既活動。
當年高千穂線係一條私鐵(非JR營運的私營鐵路), 連接延岡同高千穂。
高千穂線係一條又越過山坡又越過谷o既線路,
係2005年一次颱風吹襲下,
好多路段唔係崩塌, 就係被沖毁。於是停止運作。
衡量過修複o既費用、客流量、同埋營運成本之後,
公司決定全線停止營運, 於是高千穂線正式廢線。
後來有人覺得高千穂線有一段鐵橋風景優美,
丢空左實在可惜,
而且想為高千穂帶黎多啲遊客同生氣,
於是佢買起左高千穂一段o既鐵路,
改為旅遊設施, 改名為「高千穂あまてらす鉄道」。
最初只係改裝一啲四輪單車放係路軌上,
俾遊客係鐵路上踩四輪單,
後來做起左, 仲買左啲柴油貨車改裝做觀光小火車。
越做越大。
可以話係地域文化保育及活化o既成功例子。
上圖o既票, 係觀光小火車o既票,
原汁原味咁保留左一般火車車票o既樣式。
車站亦都冇乜點改過,
當年o既時間表仲保留左係度。
車站冇幾遠有車庫,
左邊o既應該係備用o既觀光小火車,
而右邊大架啲o既就係柴油火車。
只要俾12000-18000羊,
就可以試揸柴油火車,
每人30分鐘, 係900米o既範圍內行駛。
12000-18000羊貴唔貴見仁見智,
但呢啲體驗難得, 本身小弟極之想試下揸,
但好死唔死, 撞著点検(定期檢查),
點改行程都冇可能就到......
估唔到啱啱了左個划艇o既心願,
而家又多左個揸火車o既遺憾......
只要冇車入站, 遊人可以係路軌自由活動。
近距離見識轉線o既機關結構。
車庫都可以自由參觀。
月台上有展示室, 展出鐵路o既一啲用品。
老實講小弟都唔知係啲咩黎。
亦都可以近距離睇到柴油火車o既結構。
小弟真係識條鐵,
不過如果係鉄オタ(鐵路宅)的話, 應該會好興奮。
正值紅葉季節, 唔影紅葉點得。
春天都會有櫻花, 睇下到時會唔會夾到時間再黎一次。
上一轉o既觀光小火車埋站, 小弟就上番月台霸定頭位。
月台上o既站牌。
順利霸到個頭位。
司機沿途(用日文)介紹高千穂線o既歷史同景物。
途中經過一小段隧道, 會有啲燈光效果投影。
實情係勁土炮: 佢係用嗰啲屋企開party用,
小型半球形o既發光裝置(上圖右下方燈色波),
電線插落架柴油車, 出入隧道時人手啪開關。
初初真係覺得好寒酸, 呢盞燈唔搞好過搞。
但當你知道呢條觀光線, 最初係由一個人買起,
自己一個策劃、營運、搵車番黎改裝、宣傳等等,
你就會覺得成件事好了不起,
起碼, 佢都應該係唔想條隧道咁悶,
所以先攪盡腦汁搵啲野暖下場。
就連揸車嗰個仁兄, 都係當地o既居民。
揸小弟呢程車呢位, 正職係係高千穂市內肉店o既店販。
成個高千穂あまてらす鉄道, 作為地域活化, 真係好成功。
沿路經過一啲交通交匯處,
亦都經過一啲小峽谷。
天岩戸駅, 高千穂線其中一個站,
小弟們冇得落車, 不過小火車會稍為慢駛俾大家影相。
列車時間表仍然係當年o既編排。
個站叫天岩戸,
其實距離天岩戸有好一段距離囉......
繼續進發, 就黎到呢條觀光小火車o既戲玉,
亦都係呢條觀光線o既盡頭: 高千穂橋梁。
上圖可以見到, 小火車前方有一個白色鐵閘, 係防止有閒雜人進入。
過左白色閘, 就進入下圖o既鐵橋。
豁然開朗
遠處o既行車天橋。
架小木車會停係橋o既正中央俾大家影相。
因為山峽唔係有太多楓樹, 所以唔係話好紅。
高千穂あまてらす鉄道其中一個賣點,
就係會係呢條高千穂橋梁吹番梘泡。
小弟出發前心諗, 唔係呀馬, 咁老土?
唔好阻住小弟影相。
但意外地, 影出黎又別有一番景色。
又的確係好似好夢幻咁
不過因為佢都係用一般o既玩具番梘泡槍,
加上橋上面都大風, 所以射程有限,
要坐近司機位先可以影到番梘泡。
係橋上面逗留10分鐘左右就回程了。
司機會直接走去小火車o既尾端開動嗰邊o既拖頭,
於是頭尾變左車頭, 直接回程。
1800羊, 連埋參觀鐵路、柴油火車等,
小弟覺得都算係咁上下, 一啲都唔貴。
睇下下次有冇機會試揸埋柴油火車。
想搵地方食和牛做lunch,
但去過兩三間都咁啱唔開或者停業埋......
最後黎左呢間叫「初栄」o既小店。
〒882-1101 宮崎県西臼杵郡高千穂町三田井10
店有兩層高, 但店面面積, 以小弟目測,
大約只有3分之2個standard班房咁細。
再加上有1/3用左黎做bar枱, 所以更加擠擁。
小弟冇上二樓, 所以唔知二樓有幾闊。
不過小弟就係鐘意呢種「小店」o既感覺。
全日本百名店(燒肉組別), 店舖雖小, 但來頭不小。
好大塊靈芝!
靈芝下面白色o既係門o既布簾,
比較之下可以見到塊靈芝比standard門框仲要闊。
叫左個焼肉定食。
千零羊, 有咁靚o既雪花和牛, 又飯又沙律, 乜都抵啦。
而且小弟過晒lunch o既peak hour先黎到,
成間店只係得小第一個客。
但就係因為咁, 小弟可以同老闆娘慢慢傾偈。
小弟開口讚「宮崎牛」好好食, 老闆娘立即糾正小弟,
係「高千穂牛」, 唔係「宮崎牛」!
當然, 老闆娘係用開玩笑o既語氣,
但亦都可以體現到, 佢地有幾proud of自家出產o既野。
食完野, 一口氣揸3小時o既車,
黎到熊本南端o既一個地方---人吉。
先黎到今晚下榻o既旅館check in。
雖然呢篇blog, 加左溫泉旅館o既tag,
不過呢間並唔係好似大家一般想像中o既溫泉旅館,
而係一間有住宿設施o既溫泉浴場。
先講吓點解會黎人吉。
一來, 人吉都係熊本其中一個出名溫泉o既地方,
二來, 小弟十年前搭JR經過人吉一帶,
俾九曲十三彎o既球磨川, 同埋包圍住人吉o既高山峻嶺所吸引,
三來, 自從聽過「人吉」呢個名之後,
唔知點解一直係腦中揮之不去。
今晚住o既人吉温泉おおがの宿, 一晚只係7千幾羊,
就可以源泉かけ流し天然温泉任浸, 抵到爛。
而且間旅館仲好骨子, 乾淨企理。
上圖係公共休憩空間,
下圖係客房走廊。
單人房有六畳, 仲有獨立廁所, 算係好唔錯。
Check in完去搵食。
今晚o既目標係食鰻魚飯。
距離旅館大約15分鐘路程,
當散下步, 認識吓呢個小市鎮,
途中經過人吉城跡。
頂.......小弟信錯左google,
間野唔做晚市, 但google話佢夜晚有開......
邊個咁大整蠱......
小弟應該check埋食べログ......
但小弟係呢度可以預告,
聽日小弟成功入去食。
《夏目友人帳》o既舞台就係人吉。
1-3期都幾好睇, 但第4期開始有啲悶......
Anyway, 聖地巡禮唔係小弟o既目標。
期待聽日o既鰻魚飯。
沒有留言:
張貼留言