魷日記: 北海道小樽 (附加《最終兵器彼女》聖地巡禮)

經小弟觀察,
如果下午先坐車走人,
宿主仍然會叫WWOOFer做埋上晝o既功作,
但坐太早o既JR例車, 又要好早爬起身。
於是小弟就揀左坐1015 o既車,
九點左右出門口, 起身時間同平時一樣,
而又一定唔洗做早上嗰更o既工作XD

食完最後的早餐之後, 仲有少少時間,
於是再逛多次個農場,
同呢個陪伴左小弟六個星期o既景色講再見~

唔只係羊蹄山,
連農場o既後山都積晒雪~
事關琴晚 -2 度=.=

漫山遍野都係紅葉。
(不過呢個山頭黃葉較多)

再望多眼住左六個星期嗰間屋就出發了

去車站途中,
沿途都係紅葉。
諗起要同呢個大自然講再見,
再次回到喧鬧o既都市,
心裏一陣鬱悶......(´・ω・`)

尻別川

因為要做移居o既登記,
所以要先到蘭越o既役場辦手續。
而役場外面o既公園仔,
樹都轉晒色, 靚到~

辦完手續, 鬆人。
宿主同佢老婆送小弟到車站,
仲陪小弟等車。
同一般日本旅館迎送賓客一樣,
小弟上左車, 佢地都仲係月台揮手,
揮到架車開左仲揮緊, 直至架車轉左彎見唔到月台=.=

懷住複雜o既心情向小樽進發。

呢度講少少,
由俱知安 / 二世古嗰邊直接坐JR到札幌係比較貴的,
途中落一落車, 再搭會平2、3百yen,
反正小弟一早都打算遊小樽, 賺左。

出左小樽駅, 沿住大街行會見到右手邊有條火車軌,
係一條舊線路o既遺跡, 叫「旧手宮線」,
係北海道最初o既鉄路o既其中一段。

由大街影番向車站(中間最遠「皿」字形嗰個)

講起小樽, 大家都只係會諗起兩樣野,
就係「運河」同「玻璃製品」。

其實對於近現代~現代, 人工造成o既野小弟係冇乜興趣的,
不過一場黎到, 都要賞個面睇下o既。

運河前o既特色建築,
樓頂藍色招牌寫住「白い恋人」,
不過好似話太多人買黎做手信,
係香港已經唔馨香......

由車站行十分鐘就已經到運河,
不過要到例牌指定拍攝地點,
就要向東面行多個街口。

因為仲有地方要去, 而且任務在身,
再加上......其實運河比較靚o既景就係得上幾張圖嗰段仔......
所以冇行晒成條運河。

下一站就係離運河不遠o既玻璃製品商店街,
入面有好多昭和、大正年間落成o既石造建築,
好多都係老字號o既玻璃製品商店。
小弟對玻璃製品冇乜興趣,
不過因為要買禮物送俾就黎結婚o既D先生同C小姐,
所以都逐間走入去睇下。

「硝子」即「玻璃」,
算係特別o既一個日文字,
因為「硝子」注音寫作「ガラス」, 即係glass o既日文發音。
(亦可讀作「しょうし」[SHOU-SHI], 不過極少咁樣讀)
換句話說, 係有漢字, 有英文字, 然後將兩者拉埋。
不過事實上一般場合都寫作「ガラス」算,
好少寫「硝子」出黎。

呢間都係玻璃製品商店,
不過小弟對牆上o既紅葉有興趣啲。

運河o既支流。

不得不提上圖o既玻璃製品店。
店名寫作「宇宙」, 讀作「そら」(SO-RA),
即「天空」o既意思。

小弟都講過, 對近現代~現代o既人工製品冇興趣,
不過有例外, 就係藝術作品。

見門面o既裝飾幾合小弟河尺,
於是入去睇下~
一睇, 即刻被店內o既玻璃製品吸引!!!

同其他店唔同,
其他店大部份都係量產品,
雖然係人手製做, 但花款一樣樣,
少左一份獨特感之餘圖案仲俗不可耐。

不過呢間店入面o既製品,
全部都獨一無二, 美觀、獨特之外, 仲好有創意,
冇錯, 已經唔可以叫做玻璃製品,
而係藝術品!!!!!!

其中小弟最欣賞o既,
係一系列以宇宙為主題o既玻璃球,
凝視片刻, 甚至會有種被吸入去o既感覺。

相片睇起黎, 少左一份立體感,
現場睇的話, 好似從太空中望落地球咁。

呢啲玻璃球, 靚就真係幾靚,
唔係~係超級靚先真,
不過價錢亦都超級貴,
一個要成1.2萬yen至5萬yen不等!!!!!!

小弟都有諗過一擲千金, 把心一橫買番個,
不過好彩理智戰勝左衝動。
小弟決定左, 第時發左達, 要黎買番個!!!!!!

除左玻璃球之外,
當然仲有杯杯碟碟咁。
不過都係, 全部都並非量產,
而且每一set都有個主題,
例如太陽、火星、流星雨、沙漠, 等等

小弟已經係腦入面BOOKMARK左呢間舖,
如果其他店舖冇啱的話,
就係呢間買結婚禮物。

大家真係要認住呢間舖,
有機會入去睇下,
小弟極力推薦!

再繼續逛其他店。

賣音樂盒o既老字號。

係轉角位(上圖)有一間雪糕屋(下圖),
如果係平時, 小弟一定會唔為意, 直行直過。
不過咁啱睇左動畫《ひだまりスケッチハニカム》第二話,
講主角們畢業旅行去北海道, 當中就提及呢間野。

有咩特別? 都唔知算唔算係特別:
薰衣草味雪糕......

以小弟o既認知,
薰衣草係花o既一種,
經常被作為香料用於化妝品等。
氣味, 相信好多人都唔陌生,
至於味道, 就真係好難想像......

食落第一啖......好似食肥皂咁......
不過食落第二啖之後......都係好似食肥皂咁........
然後第三啖開始, 唔知係咪因為desensitized左,
除左甜味之外, 已經唔知係咩味......

結果都係頭先嗰間「宇宙」最印象深刻,
於是走番轉頭揀。
不過講明先呀D先生&C小姐,
小弟一貧如洗, 冇錢買貴野,
所以唔好咁大期待。

買完禮物,
再去下一站, 就係上山喇。
一般人黎小樽, 都係上天狗山, 俯瞰小樽市,
不過一來天狗山比較遠, 加上特別o既原因,
小弟選擇左去旭展望台。

行左3公里路, 總算趕得切係日落之前上到展望台......
本來差唔多要成粒鐘o既路程,
小弟以競步o既速度, 30分鐘就行完,
不過亦因為咁, 即使溫度得10度, 小弟都行到身水身汗......

係展望台有隻貓,
唔知點解係咁黐埋黎,
睇個勢似係流浪貓討飯吃.......

由車站通往展望台,
名為「地獄坂」o既長命斜......

落到山, 個天已經暗左好多,
差唔多係時候再去運河,
因為晚上會亮燈,
又係一個拍攝o既好機會。

途中經過上圖o既「レンガ横丁」,
「レンガ」即紅磚頭。
不過其實有紅磚頭o既部份,
就只有上圖見到o既地方......
甚麼鬼橫丁=.=

入面係有好多居酒屋o既後巷。

番番到頭先拍運河o既例牌地點,
個天已經黑晒,
但時間只係1730=.=

靚係幾靚o既,
不過, 就是這樣而已......

頭先講過,
因為一啲特別o既原因,
小弟唔去天狗山, 而係上左旭展望台,
原因係咩?

---聖地巡禮---

咩係「聖地巡禮」?
講o既係動畫、漫畫出現過o既現實地點,
FANS到訪當地, 影下相、懷勉一下咁。

其實小弟最初冇諗過黎小樽要咁做,
再者, 以北海道為舞台o既動漫真係比較少......

不過唔係零~

事源小弟前日同人傾開呢個話題,
於是屎忽痕上網搵下,
真係俾小弟搵到小樽有「聖地」,
仲要係小弟最愛o既作品之一
《最終兵器彼女》!!!!!!

反正有的是時間,
於是上旭展望台影下。

一般人會問, 去番動漫o既場景影相有咩意義......
不如先問下係星光大道影手掌印o既人先啦~
小弟旅行高興就得啦, 要你管?

好, 睇下小弟真真正正第一次聖地巡禮o既成果啦。