魷日記: 北海道 (定山溪 + 豐平峽 + 藻岩山)

晨早0600就爬起身,
為o既就係去札幌近郊o既地方睇紅葉,
小弟今年第一次真真正正o既睇紅葉!!!

0645去到札幌駅o既巴士站,
搭0700開後定山溪o既巴士,
搭一個鐘鬆啲就到, 車費比之前係歧阜平得多,
搭粒幾鐘都只係750yen。

離開左市中心,
沿途都已經滿山紅葉。

到左定山溪,
本身打算先到「白糸の滝」,
不過搵極都搵唔到,
而觀光案內所又未開,
於是唯有先逛下溫泉區。

溫泉區入口有個池同埋有兩隻河童(KAPPA)。
河童係日本傳說中o既生物,
外表有啲似青蛙咁, 善泳。
傳說中河童頭頂上盤狀o既皮膚乾涸的話就會死。

而溫泉區入口o既河童,
就係要大家將池中溫泉水注入河童o既頭頂,
水會係口中流出,
然後大家用河童o既「口水」洗手......

都幾得意

湯の滝,
呢個小型瀑布o既流水都係溫泉水。
係瀑布下面仲有一隻好嘆o既河童。

咁啱啲樹葉遮住左啲重要部位XD

上圖o既定山源泉公園,
係溫泉區入面o既其中一個公園,
不過如下圖所見,
除左個浴足區之外, 都冇乜野特別好睇,
風景亦都唔係話特別靚。

繼續搵靚景影相。
老實講, 其實定山溪個景都唔錯,
不過太多酒店旅館, 破壞晒個景觀......

上圖係溫泉區另一個公園(比較知名的),
亦都係比較多景點o既公園,
園內紅葉亦都好靚。

上、下圖係二見公園o既招牌: 二見橋,
可以話係定山溪o既代表物。

二見橋

二見橋o既view

睇完定山溪一帶,
再兜個大圈出番幹道,
觀光案內所都差唔多開,
係時候搵下條白糸の滝。

兜左超大個圈,
終於搵到傳說中o既白糸の滝(下圖)。
不過超搵笨, 睇相好似好靚咁,
但實際上似係人工瀑布多啲=.=
如無必要, 大家可以唔洗花時間黎。

都係出番定山溪o既小河靚景啲。

黎得定山溪,
多數都會去埋附近6公里外o既豐平峽水庫。
由定山溪觀光協會對面, 坐免費巴士,
20分鐘就到達通往水庫o既隧道口。

較啱時間,
唔洗得好耐, 免費巴士就按時出現。
等車o既途中, 聽到一對夫婦用香港廣東話交談。
巴士出現, 車前寫住前往水庫,
不過寫住o既係水庫~Dam~ o既日文拼音 (ダム),
嗰對夫婦可能唔識睇所以唔肯定係咪要上車,
於是就係小弟開聲搭訕o既時候了~

話晒係異鄉遇到同鄉,
幫得就幫。

到左隧道口,
原來仲要駁巴士,
來回要成600yen!!!!!!

一個正常o既香港人思維模式,
都應該係會先考慮自已o既能力, 能否步行到去,
而唔洗俾錢搭佢架車,
更何況係小弟呢啲死窮鬼。

於是問免費巴士o既車長,
可唔可以行過去水霸。
個車長話有路可以行。

再問佢要行幾耐、遠唔遠o既時候,
車長就以為難o既神色話,
其實呢架免費巴士主要係載大家去搭佢架來回600yen巴士,
所以佢唔適合話俾小弟知遠唔遠路。
(又係好似蔵王免費巴士嗰種路數......)

ANYWAY, 小弟落左車之後用手機check,
發覺只係短短o既1.6公里路。
咁就想收小弟300yen!? 嘿! 太天真喇。

咁啱同車嗰對港人夫婦都有同感,
於是一邊傾偈一邊行,
慢慢行都唔洗半個鐘。

不過就算唔講金,
小弟都建議大家自己行吓,
因為一來唔係遠,
二來, 雖然有七成路都係隧道內,
但其餘o既三成, 風景都幾靚,
不妨邊行邊慢慢欣賞。

下面幾張圖係隧道中露天o既部份,
如果坐巴士的話, 會稍為停一停介紹下,
係但嗰架迫滿人o既巴士入面,
想慢慢影到好o既相,
又或者係慢慢欣賞風景,
完全係冇可能。

繼續行隧道。

行左唔夠半個鐘,
一出隧道口就見到好廣闊o既風景。

頭先定山溪睇到o既滿山紅葉係靚,
但係豊平峡嶙峋山石上生長o既紅葉,
更有一番風味。

係落車o既地方旁邊,
有免費o既小型纜車載乘客上展望台,
不過其實行上去都唔洗五分鐘。

展望台旁邊o既餐廳「だむみえ～る」。
名字係由「ダム」(DAM) 跟「見える」(MIERU; 看得見) 組合而成,
再將「見える」拖長變成「「見え~る」,
感覺就好似啲意大利、法國名字咁......
不過小弟聯想到o既係《氷菓》入面o既「千反田える」......

わたし、気になります！

湖乜鬼丫, 咪只不過係水霸o既儲水。

豐平峽o既隧道。

早上8點幾到達定山溪,
11點左右到豐平峽水庫,
食埋野, 搭1320行番出車站搭接駁巴士出番定山溪,
咁啱係隊道口又撞到頭先嗰對夫婦BUT 男 ONLY。
於是一齊行番出外面

出番到定山溪。
因為今朝早上太陽未升得高,
而定山溪o既美景多數都係係山峽中,
再加上啲死人酒店起到鬼咁高,
擋住晒啲陽光, 搞到早上影o既相唔係好靚,
於是再去補番幾張相先走人。

臨走前, 同嗰對夫婦交換左e-mail contact。

番番到札幌市中心, 時間係下午3點左右。
爭扎左一輪, 考慮上唔上藻岩山,
因為連日來比較夜瞓, 加上行足兩日, 都幾攰=.=
不過最後都係決定去埋啦。

搭巴士係すすきの落車,
轉札幌市電鉄到藻岩山纜車站口。
話就話電鉄站係纜車站口,
實際上有400幾米o既距離=.=

有免費巴士接送,
不過小弟都係行下啦。