川崎大師

今日本來冇乜野做的,
不過見得閒, 於是去散下步,
目的地就係而家住o既地方十五分鐘路程o既川崎大師。

聽個名好似好型咁,
其實係佛廟一個。
當然呢個地方對海外遊客黎講,
並唔係話咩值得黎o既地方,
不過係日本裏面都算係比較有名o既寺廟。



川崎大師,
正式名稱叫平間寺,
為真言宗智山派大本山o既寺。
主要係供奉日本最出名o既僧人弘法大師(法號空海)。
冇錯, 就係高野山創山人,
同埋今日四國八十八ヶ所 o既始作俑者。

川崎大師附近o既駅

川崎大師o既參道

有大量「達磨」賣。
達磨(DARUMA), 就即係佛家o既達摩祖師。
日本有傳統, 就係許個願,
然後係呢個圓滾滾o既達磨上填黑一隻眼,
然後願望達成之後, 再填黑另一隻。
傳統係紅色的,
不過而家名式其式乜都有。

唔講大家都未必留意到,
川崎大師其實都係動漫o既聖地,
係《真剣で私に恋しなさい!》o既舞台......
不過小弟唔係為朝聖而黎, 而係咁啱。

弘法大師像。
話向草屐淋水,
就可以身體健康, 健步如飛咁話。

「力石」
話係建川崎大師o既時候,
啲人要黎比力氣時用的。
左邊兩舊較細o既,
話係要黎挺舉用,
而右邊三舊大o既,
只要捧住企直就可以......
成百幾KG, 以前o既人都幾得閒。

川崎大師o既名產「久壽餅」,
參道兩旁有售,
而上面嗰間住吉屋, 係日文老師媽媽托小弟買的。

因為未搭過京急,
所以試下搭,
冇乜特別。