魷日記: 藤子・F・不二雄博物館 (多啦A夢博物館)

「多啦A夢」,
呢個名字應該冇人唔識,
就算唔係動漫迷, 就算對次文化冇興趣,
都一定會聽過呢個名。

而家o既世代, 小弟唔清楚,
但對於小弟80後呢一代,
多啦A夢(叮噹)的確係陪伴住我地成長,
為我地帶黎快樂o既回憶。

不得不承認小弟係有啲失敗,
之前係川崎住左三個星期,
都唔知原來川崎有個多啦A夢博物館。
(正確黎講係「藤子・F・不二雄博物館」)
直到之前九月, 因為係多啦A夢生日(100年前o既=.=)
有好多話題, 新聞亦都有題及,
小弟先知道川崎有藤子・F・不二雄博物館。

不過遲到好過冇到,
總算可以係番香港之前到訪藤子・F・不二雄博物館一次,
而呢個亦都係小弟先到關東, 然後先番大阪o既原因之一。

講多少少, 80後或以前o既年代,
大家應該聽開叫「叮噹」多過叫「多啦A夢」,
一來第一次接觸已經係聽「叮噹」,
二來「叮噹」兩個字比較鏗鏘、簡潔、順口,
亦都好符合角色o既印象(頸上o既貓鈴)。

其實「多啦A夢」先係原名,
「多啦」, 日文「ドラ」,
係由「ドラ猫」(貓o既種類) 衍生出黎,
絕對唔關「銅鑼燒」事。
而「A夢」, 日文「えもん」,
有一說係話係日文名字「衛門」,
而事實上藤子・F・不二雄老師亦都有「21エモン」這一作品。

不過因為早年中港台盜版猖獗,
未得授權已經用「叮噹」呢個名出版,
所以大朋友們都聽開叫「叮噹」。

及後, 將漢字圈入面「多啦A夢」o既名字統一,
成為左藤子・F・不二雄老師o既心願,
而經過各界o既努力之後,
藤子・F・不二雄老師亦都最終如願以償。

講番番黎,
同宮崎駿o既三鷹の森ジブリ美術館一樣,
藤子・F・不二雄博物館o既門票係預約制的。
香港要點買小弟就唔清楚喇,
係日本, 大家可以係LAWSON便利店o既售票機買到,
門票為1000yen。
不過唔識日文, 同埋唔熟識便利店購票機用法的話,
可能有少少難度。
ANYWAY, 因為真係有好多人o既關系,
小弟四日前係札幌已經買定飛。

由川崎駅搭南武線,
半個小時左右係登戸駅落車。
其實可以早一個站係宿河原駅落車行過去,
不過登戸駅有專巴直達,
快唔係快好多, 不過一場黎到,
睇下巴士都好丫。

一出站左手邊樓梯落就係巴士站,
不過落樓梯之前, 行前少少, 會見到上圖多啦A夢o既銅像。
而落左樓梯之後, 就會見到下圖o既多啦美 (叮鈴)。

小弟張飛個time slot 係1400,
1320左右到巴士站, 已經係上圖o既光景,
多人到丫......

冇幾耐巴士黎到,
一睇就知唔會上到車,
所以都係影下巴士,
然後先再排隊等下一架。

等10分鐘,
第二架巴士黎喇,
係小弟鐘意o既藍色。

車入面o既扶手、落車用o既鐘,
都有多啦A夢個頭。

因為路窄車多燈又多,
所以其實行過去同搭車過去,
時間上唔係話差得好遠,
不過坐專用主題車都係一種樂趣。

落車, 補番架車o既幾張相先。

其實唔只得頭先嗰兩款,
如果小弟冇睇漏,
係仲有另外兩款車。

因為都未夠鐘入場.
反正都係排隊等,
不如周圍影下相仲好。

唔只係巴士同博物館境內,
博物館附近都有好多以多啦A夢為主題o既裝飾。
例如下圖, 係博物館對出o既橋o既欄杆,
大家見唔見到係咩?

另外, 明渠o既欄杆, 亦有多啦A夢o既剪影。

影得七七八八, 又差唔多夠鐘,
係時候番去排隊喇。

開頭都覺得博物o既外牆玻璃設計有啲特別,
後來參觀完博物館, 番番住處, 從日文老師口中先得知,
完來博物館o既外牆玻璃間隔,
係參照《多啦A夢》第一話o既コマ黎分割!!!
(コマ即漫畫o既分格)

以為係冇乜特別o既外場,
睇真係, 全部都眼仔碌碌。

埋去戶外o既counter,
展示出之前買左o既票,
就可以得到一張小冊子。
然後就乖乖排隊等入場。

當然, 室外都有少少展品

上圖左邊嗰隻多啦A夢好似怪怪地咁,
但絕對唔係海賊版多啦A夢!!!
反而係真真正正o既多啦A夢,
第一話o既《多啦A夢》, 就係以呢個形象示人,
及後一邊連載, 一邊微調畫風,
先變成右手邊大家見開o既多啦A夢。

之前多啦A夢o既「100年前生日」,
川崎市授予多啦A夢o既住民票。
(日本人o既住戶登記証明)

如果小弟認知冇錯,
第一個獲授住民票o既動漫角色,
係《らき☆すた》 o既柊氏一家。
詳情可以參考小弟之前o既一篇BLOG:
http://japsleevefish.blogspot.hk/2012/08/blog-post_27.html

排左15分鐘左右啦,
職員姐姐分批帶遊客入館入面,
一入到館內, 係一個比較大o既玄關,
不過仲未真正入得館內,
因為要先睇電視簡介。

唔識日文o既朋友, 抱歉...... 因為只有日文廣播。
簡單黎講有以下幾點。
---館內唔可以飲食呀、攝影呀(2F展覽館外, 以及3F除外) 就例牌架喇。
---館內有導賞, 博物館會借播音器俾遊客, 有日文、英文、中文(普通話)、韓文, 不過冇廣東話......
---如果想睇小劇場的話, 借播音器時, counter職員問你野, 你點頭示意話睇, 就可以得到入場券
---3F茶室1700收工 (博物館及賣物店開到1800)

由於館內展覽廳唔可以影相,
所以小弟都俾唔到啲咩大家睇喇。
都係介紹藤子・F・不二雄老師o既生平、
漫畫、動畫o既製作、
藤子・F・不二雄老師作品o既概要等。
大家有機會自已參觀下啦。

係2F室外, 有一個井,
好多小朋友排隊, 將井前o既槓桿上下拉動,
就會見到靚仔版o既胖虎(技安)冒出黎,
好似係多啦A夢其中一話o既題材。

2F亦都有漫畫corner,
放有大量藤子・F・不二雄老師作品o既漫畫。
仲有多啦A夢食住豆沙包陪你睇漫畫。

漫畫corner對出,
牆上有個大電視,
不停播放藤子・F・不二雄老師經典作品o既OP同ED。
(「OP」即「片頭」, 「ED」即「片尾」)

原來毛查查都係藤子・F・不二雄老師o既作品,
真係而家先知。

頭先都提過, 今年係多啦A夢100年前生日,
展館特設一個corner俾大家同多啦A夢慶祝。

當然唔少得扭蛋。

小弟扭中左多啦美。

2F同3F外面有一個小花園,
當然充斥住藤子・F・不二雄老師創作o既角色啦。

太奇~太妙~望著誰亦笑~

大家仲記唔記得上圖多啦A夢法寶之一, 叫咩名?
(唔好掛住望黑絲啦!)

上圖應該冇人唔知掛

茶室有好多以多啦A夢等角色為賣點o既食品。

「暗記麵包」做型o既零食。
(日文「暗記」, 即係背誦、死記入腦 o既意思)

胖虎用o既咪, 入面裝o既係曲奇

當然唔少得豆沙包啦!!!
一個200yen

上圖就係小劇場o既入場券,
即係入博物館, 借導賞時,
要示意睇嗰個劇場先拎到飛嗰回事呢。

小弟睇o既係《多啦A夢》x《21エモン》
20分鐘o既短劇, 幾有趣~
可惜只有日文, 唔識日文o既朋友唯有以神會。
當然, 小弟絕對冇問題啦。

最特別o既係離開劇院o既方法~~~
因為做介紹o既職員姐姐都預告過會用好特別o既方法離場,
所以都唔係話估唔到, 不過實際試一次, 又真係幾得意~
起碼好切合藤子・F・不二雄老師作品o既風格!!!

至於點樣離場,
呢度小弟賣個關子,
留番大家有機會就黎體驗下啦。