九州第二日 熊本 (草千里/阿蘇火山博物館 + 阿蘇火山)

琴日編野花左好長時間寫,
瞓得覺黎已經成點鐘=.=

check天氣報告,
仍然係話今日會落雨的......
噢...我o既阿蘇呀T_T
(再一次強調, 唔係蘇施黃!)

早上六點鐘爬起身,
半個鐘梳洗好check out埋就出發去阿蘇。
先將背包放係JR熊本駅o既locker。
成日都諗, 香港係咁話自己係旅遊天堂,
但就連鐵路站一個locker都冇......
locker真係好幫得手架! 背包客o既恩物

正如琴日所講,
因為天雨關係,
由肥後大津駅開始, 列車行駛唔到,
於是要係肥後大津駅落車,
轉搭JR安排o既接駁巴士去阿蘇駅。

天氣一直都唔多穩定,
成個天都係雲,
仲間唔中落毛毛雨添,
再望上群山之中,
啲山頂都係俾厚厚o既雲遮住......

我o既阿蘇T_T



落左接駁巴士,
去到阿蘇駅登山巴士站,
更加得到一個令人咀喪O既事實:

因為天雨關係,
部份路面被沖毁,
加上遊客少,
一日只有四班車來回!!!!!!
(本身都有十零班架......)

不過因為預左時間搭早車,
所以比起改左時間表o既第一班巴士仲要早到,
算係不幸中o既大幸。
可惜因為回程班次時間所限,
要比原先o既計劃提早完結阿蘇旅程,
如果唔係搭唔到車去下一站「鹿兒島」!



之前一直都陰天落雨,
不過係等頭班登山巴士嗰個零鐘,
竟然出太陽!!!

出太陽小弟係歡迎,
不過可唔可以留番小弟上左山先出太陽呢?
(下圖見到o既山已經係阿蘇山一帶)

本來由阿蘇駅到山頂只需四十分鐘左右,
但因為上星期九州史無前例o既大雨,
加上阿蘇係受災最嚴重o既地區之一,
部份路面被沖毁, 巴士要兜路行,
結果要成粒鐘有多先上到山。

實在係因為近排天氣唔多好,
加上小弟係搭九點幾o既頭班車,
全車得小弟一個。
專車接送, 正!

如果係上山頂的話, 搭住巴士到尾站就得,
但小弟先係前一個站落車,
「草千里/阿蘇火山博物館」

冇錯,
小弟係咁講o既「阿蘇」,
其實係一個活火山,
如果唔係洗乜專登黎日本睇丫,
睇山的話香港都唔少啦。

不過上到山,
誠如下圖所見,
真係十萬個SHIT!!!!

大霧到hihi!!!
唔洗問都知,
而家去到火山口都唔會睇到啲乜架啦.....

唯有係火山博物館睇住頂住當先啦,
順便打發下時間, 希望陣間會好天。

博物館有單車出租,
兩個鐘都只係600yen左右,
一啲都唔貴!
不過咁o既天氣, 踩乜春單車丫......

入場券成人840yen。
呢度要提一提,
係JR阿蘇駅同阿蘇巴士站,
都有博物館o既優惠券免費任攞=.=
可以平100yen。
不過小弟回程先發現 T_T

館入面o既展品,
一睇就知唔係新野,
由design同樣式黎估,
可能係八十年代o既產物,
但係資料尚算豐富。
主要介紹阿蘇火山(廢話!)
同埋附近一帶o既自然生態等。

可惜英文解說欠奉,
就算係識日文,
睇到去啲地理專有名詞, 都係唔知佢講咩。
例如「モホロビチッチ不連続面」, 講你都唔知係咩。
(小弟有幸睇動畫《這就算是殭屍嗎OTD》時學識呢個字=.=
 自已查下「莫氏不連續面」啦~」

三樓有個小型影院,
定時播放介紹阿蘇山o既影片,
不過字幕lag左成十幾秒=.=

總括黎講,
除非係地理撚,
如果唔係可以唔洗俾錢入去。






奇蹟地,
出左博物館,
雖然都仲係陰天,
但起碼啲霧唔見晒。
見到對面個山之餘,
仲見到最左手邊o既阿蘇山!!!
(見下圖。唔知點解像素咁低,
 遲啲得閒再up過)

其實博物館前面仲係一個騎馬o既地方,
可以俾錢, 逐草四方~
不過今日停業......
但小弟打從一開始就冇諗過做啲咁高消費o既活動。

上圖遠處出白煙o既就係阿蘇火山口,
而下圖就係CLOSE UP。
難得冇霧, 唔上山頂等幾時!?
咁啱第二班車黎到,
即刻上車啦。

其實巴士o既總站仲未係火山口,
仲要再轉纜車,
不過先會見到一間好醒目o既神社。

纜車乘車處。

望過對面山,
可以見到深啡色o既坑,
就係上星期大雨水土流失o既證據,
真真正正感受到咩叫weathering。

纜車來回為1000yen,
約15分鐘一班,
其實有路可以自己行上山慳番啲錢,
不過一來小弟唔夠時間,
二來今日咁o既天氣......

入閘前會見到上圖o既牌(中間嗰個地圖),
著左燈即係話由於天氣 / 有毒氣體 / 火山活動影響,
該區不予開放。
列如可以見到上圖黃色同粉紅色area著左燈。

上圖係由纜車中拍攝o既上山o既路

落左纜車出左站,

會見到上圖o既牆壁同埋窿窿。
唔好似為係gimmic,
其實係萬一火山爆發,
要黎避難的。

過左個窿, 眼前一亮!!!
同頭先一直都係綠油油有天淵之別。
更難得o既係冇啲死人霧遮住!!!

左手邊啲屋仔都係避難用。

可以見到啲岩石一層層唔同顏色。
詳情唔好問小弟,
小弟geography CE拎D架咋。

最重要o既火山口,
係睇到架!!!!!

火山口積左水。
如果平時火山唔活躍的話,
應該清清楚楚見到一個湖。
不過今日一來火山稍為活躍, 二來潮濕,
所以不斷有蒸氣冒出。

水o既顏色係綠色。
咁係因為呢一帶o既土質較多鐵質,
Fe2+ 令到啲水變綠。
不過點解唔會變Fe3+, 小弟都唔清楚,
可能因為硫黃掛???

火山口o既遊步道

主火山口o既旁邊仲有一個凹左入去o既地區,
好似本身都係火山口。
不過而家又係積晒水。

有告示牌話俾大家知而家o既有毒氣體濃度。
頭先唔記得講,
有心臟病、哮喘等疾病o既人, 請避免上火山口。

啱啱係遊步道兜左一個圈,
突然霧開始大,
仲落起雨黎=.=

於是小弟走番入纜車站入面。




同好多日本境點一樣,
有印仔俾大家吸印。
小弟當然冇儲開,
但難得上到黎火山口,
都想吸番個印。

好多唔同語言,
警告你有病唔好上山。

本身打算再睇多次火口的,
不過雨比頭先落得仲大......
加上差唔多係時候回程如果唔係趕唔到去鹿兒島......

ANYWAY,
小弟已經真係超級非常好彩。
全日都咁惡劣o既天氣,
正正就係小弟上黎嗰唔夠半個鐘,
稍為清個場俾小弟睇到火山口!

等巴士o既時候,
買番個「火山灰雪糕」食。
當然, 白痴o既都知, 係用黑芝麻黎做。

因為一日得番四班車o既關係,
小弟比原定早左成個鐘出番熊本。
唔緊要, 早少少出發去鹿兒島。

睇地圖一睇就知熊本同鹿兒島有幾很遠=.=
如果就咁俾錢搭車, 肯定會破產。
呢個時候,
青春18車飛登場喇!!!
2300yen, JR一日任搭。
其實頭先來回阿蘇都係用佢。

1649,
先由熊本搭到去八代,
再轉肥薩線。

問題出現了!!!

原來小弟之前check o既路線,
由八代開始係私鐵(總之唔係JR公司啦)
JR o既春青18不適用!!!!!!
如果真係要搭呢條私鐵要俾多二千幾yen!!!!!!!!!!!!

不過再詳問之下,
原來JR都有一條平行o既路線,
只係風境冇咁靚, 同埋時間長啲,
轉多幾次車......

唔理啦, 用到青春18就得啦。

而且咁啱, 十分鐘之後就係尾班車!!!!!!
如果唔係因為阿蘇巴士班次得番四班,
小弟提早完結阿蘇之旅的話,
今日小弟一係要俾多二千幾yen,
一係就去唔到鹿兒島!!!!!!!

完完全全真係塞翁失馬!!!!!!

於是小弟就坐JR肥薩線,
沿球磨川(下圖)到人吉,
再轉車到吉松, 再再轉車到準人,
最後到達鹿兒島......

到達鹿兒島,
時間已經係2309=.=
即係話小弟已經坐左超過六小時JR.....

因為就算唔係check錯路線,
本身都預左今晚好夜先到鹿兒島。
只係因為瞓幾個鐘而BOOK幾千yen酒店好唔抵,
所以小弟冇book今晚住宿o既酒店。



先係便利店買個便當街邊食。
聽落好似好慘咁,
其實係街邊食便當好平常。

今晚點過?
小弟已經預先搵定,
鹿兒島中央駅附近有一間上網&漫畫喫荼店。
話就話「喫荼店」, 但唔係好似大家想像中o既「星桶」嗰隻。
而係一人有一間房仔(下圖),
上網、睇漫畫、食野*, 任你做乜都得。
(*2012年新法例, 好似話所有上網&漫畫喫荼店,
o既獨立房仔內都唔可以食野)

小弟呢一間比較平,
本身都不抱期望,
但估唔到環境都比想像中好!!!
六個小時1500yen有找,
其實真係好唔錯。

有啲大型少少o既上網&漫畫喫荼店仲有沖涼房添,
不過小弟呢間冇。
算啦, 唔要求得咁多架喇。

好眼瞓呀,
聽日又要一早起身,
所以瞓先, BYE。