Animelo Summer Live 2012 第一日

除左上富士山同埋去Comic Market之外,
參加Animelo Summer Live (ASL) 係小弟今次黎日本最想做o既事!!!
(唔知咩係ASL o既可以參考番之前o既BLOG
 http://japsleevefish.blogspot.hk/2012/06/animelo-summer-live-2012.html)

琴日check完唔同牌子螢光棒o既spec,
出發到會場之前先到川崎駅o既TOKYOHANDS買。
買左一支KINGBLADE MAX (UO色) 同埋一支瞬色瞬光,
其實想買 KINGBLADE TEN, 不過該店冇出售......

俾錢之後走人。
臨走前諗起琴晚睇嗰個網頁,
話一定要check貨。

小弟平時係唔會做呢啲野,
不過唔知點解今次會突然記起,
又突然想check。
於是行埋一邊拆開黎試。

唔試由自可,
一試, 支瞬色瞬光 o既藍色係壞的!!!!!!
即刻拎去換。
真係好采屎忽痕走去拆開黎睇啫,
如果唔係去到先知就大損失!!!!!!



因為呢一番折騰,
本身今日去ASL之前去鷲宮神社的,
而家都去唔切......

唯有直接去會場喇。

不過錯有錯著,
咁啱有班車係由川崎直到さいたま新都心。
直搭到去さいたま新都心,("さいたま"即埼玉)
時間都只不過係1430左右(1600開場)。
不過車站已經有唔少人。

さいたま新都心駅
右手邊圓形建築物就係會場: さいたまスーパーアリーナ
(直譯就係 埼玉SUPER ARENA)

さいたま新都心駅



到埗後, 先到對面商場買野,
買咩? 三軍未動, 都要糧草先行啦。
買左一支2L o既寶抗力同埋兩個飯團。

呢個時候有人打電話黎。
打黎o既係讓聽日張門券俾小弟o既日本人,
同佢約好地點之後,
就向會場: さいたまスーパーアリーナ 進發

さいたまスーパーアリーナ 

順利交收。
入場之前,
先係場外o既販賣店睇下有冇野買先。

咁啱T-shirt唔夠著,

而大會件T幾靚,
於是買左一件,
不過好那貴, 成3000yen......

仲有螢光棒賣,
呢啲強力o既螢光棒,
光係好光, 不過欠持久力,
只可以作加持, 唔可以作為主戰力。
因為小弟都買左電螢光棒,
所以只係賣左一Set七支UO色就算。



買完野,
1515左右, 早少少入定場唔洗同人迫。

小弟坐o既係400 level,
簡單啲講就係山頂位啦。
不過算啦, 有得睇仲想點。
需知道前排o既飛炒到成3萬yen以上......
(原價8500yen)

唔洗講都知上圖係會場內o既相。
因為唔可以帶相機入內,
所以只可以用手機仔影。

上圖有三串字,
舞台就係較遠嗰兩串字o既前面,
冇雷公咁遠=.=



同香港唔同,
因為日本o既交通比較早收工,
所以演唱會開場時間都比較早。
1600就開始,
5個小時, 2100左右完場。



開波喇!!!!!

超壯觀。
小弟都去過香港o既演唱會,
不過都未見過咁空前o既盛況。
係香港o既演唱會,
發光o既野可能只係要黎吸引表演者望過黎,
所以比起螢光棒, 發光字牌會仲多。

但日本o既演唱會, at least, ASL,
螢光棒係觀眾參與o既一環,
大家用螢光棒, 跟住歌詞或節奏一體化咁揮動,
成個會場o既觀眾都成為表演o既一部份,
所以觀眾亦都可以份外投入。



呀宅o既演唱會有好多潛規矩,
其中一項就係螢光棒o既顏色。

之前提過o既UO色 (UO即係Ultra-Orange),
係一般熱鬧o既歌用,
而慢歌多數都係藍色。

另外, 唔同歌手有唔同顏色o既喜好,
最多人知o既, 當然係田村ゆかり一定要用粉紅色。

再細微啲o既, 同一歌手, 唔同歌要用唔同顏色,
以水樹奈々為例, 雖然水樹奈々o既顏色係藍色, 但
《ETERNAL BLAZE》: UO
《POP MASTER》: 藍
《深愛》: 白
《夢幻》: 紅
《夜桜お七》：粉紅

再麻煩啲, 同一首歌唔同段落用唔同o既顏色o既都有。
不過一般有UO、藍、粉紅 都已經夠用。



聽落你會話「睇演場會啫, 洗唔洗咁煩呀」
不過事實上, 全場用同一隻色o既時候,
氣氛真係會唔同晒~



講番演唱會內容先。
詳細唔講喇講重點:

1)
最HI o既當然係啲當紅動畫, 而又熱鬧o既歌啦,
例如《Accel World》、《SAO》《夏娜》《F/Z》等,
不過新人真係新人, 三澤紗千香啲唱功係差少少, 冇辦法。

2)
小弟隔離嗰個人,
好明顯係小倉唯o既fans,
ゆいかおり出現嗰下超級興奮之外,
其餘時間都好靜.....

3)
小弟斜前方有個女仔,
隻身一人, 不過超級落力,
每一下都係由腰黎發力fing螢光棒,
仲要有1/3時間係跳住黎fing。
小弟連續fing三首歌已感不支=.=

4)
年齡層真係好廣, 十零歲o既當然見唔少,
但亦都不乏四十歲o既叔叔。

5)
AKINO with bless4真係超正,
《創聖之NTR》o既歌氣氛又高漲,
AKINO with bless4唱得又好,
全場「あいしてるるるるるるるるるる」真係超感動,
神曲果然係神曲。

6)
不得不提o既當然係田村ゆかり啦。
一開場打頭陣唱左一首,
然後壓軸再唱四首(五首?)

點解唔提田村ゆかり唔得?
田村ゆかり出名在有一班超級忠實&專業o既fans,
每次有田村ゆかりo既歌, fans o既螢光棒都fing得勁齊,
歌詞對答部份又唔會甩拖,
所以田村ゆかりo既fans被稱為ゆかり王國民。

小弟以前都係網上睇唔少短片,
但身歷「奇景」, 真係不得不讚嘆田村ゆかりo既影響力!!!



fing左五個鐘螢光棒,
Animelo Summer Live 2012 第一日正式結束,
超爽~

上圖係今日買o既T-shirt同埋兩支螢光棒,
左邊係KINGBLADE MAX (UO色),
右邊係「瞬色瞬光」, 一支包含有三原色o既燈,
換句話說可以發出紅、綠、藍、黃、綻、紫、白, 七種色。
不過冇最重要o既粉紅色......



仲有聽日!!!!!!