岐阜 (岐阜城 + 墨俣一夜城 + 大垣城)

本身早一晚出黎川崎車站附近,
係諗住可以係漫畫喫茶瞓番一陣先出發的。
但睇下動畫、上下高登咁, 又睇下漫畫雜誌咁,
好快就到凌晨四點鐘,
係時候動身到車站=.=

0415到達川崎駅,
車站都仲未開閘......

0430, 終於開閘喇,
早到可以見到車站開工,
都唔知仲有冇下次機會,
所以影低左。
下圖可以見到啲人,
閘都未開晒已經入緊閘。

搭頭班車,
0445由川崎開出,
先到熱海, 再到沼津,
再到浜松, 再到豊橋。

途中經過富士山,
難得咁好天色睇得咁清楚,
所以影低左。

最後1103到達岐阜駅......
足足搭左6個幾鐘車......
鬼叫你窮呀頂硬上呀。

一出左車站,
已經即刻見到一個金燦燦o既織田信長像棟係度。

正如琴日o既BLOG所披露,
今日係去岐阜城, 然後去墨俣。
都係嗰句啦, 旅行唔係淨係得睇、玩、食,
增長見聞都好緊要,
係呢度就容小弟用僅拙o既知識講下岐阜城。

岐阜城位處o既地方, 以前係「美濃國」所屬(類似藩國咁啦),
而岐阜城原本叫稲葉山城。
唔出名o既唔講喇, 總之美濃國一個叫斉藤道三o既大臣,
同佢老豆+埋個FD, 夾手夾腳奪取左美濃o既控制權,
仲住埋入稲葉山城, 呢個就係有名o既「国盗りの物語」。

因為美濃係東、西日本之間o既重要通道,
所以有云「美濃を制するものは天下を制する」(得美濃如得天下)。
當時織田信長開始佢統一日本o既野心,
不過要衝出自己地頭「尾張」(現名古屋一帶),
就必先要奪得美濃o既控制權。

流經尾張同美濃o既長良川, 係一條四通八達,
非常重要o既水路,
但稲葉山城正正就座落係長良川傍,
稲葉山城起係金華山, 由城頂可以望到好遠。
一係附近起城排陣, 即刻會被發現而受到攻擊,
所以要攻下稲葉山城甚為棘手。

織田信長憑住手下「木下藤吉郎」(後來o既豊臣秀吉) o既「墨俣一夜城」,
終於攻下左稲葉山城。
其後, 織田信長正式打住「天下布武」o既旗號,
開始實踐統一混亂o既日本戰國,
而木下藤吉郎亦憑呢一役打響名堂, 平步青雲。

由此可見, 岐阜城係日本歷上扮演一個重要o既角色。

故仔講完,
番番黎岐阜駅。
係11、12、13號乘車處上車,
只要係經過「岐阜公園」的話, 就可以去到岐阜城。

其中12號乘車處係觀光巴士循環線,
區間均一200yen。
不過其實就咁由車站搭普通路線巴士到岐阜公園都係200yen,
咁啱13號乘車處有巴士到,
小弟廢事等循環巴士, 所以係13號乘車處上左車走人。

落車行前多兩步就會見到岐阜公園。
一入去右手邊係岐阜博物館,
不過小弟行程趕急, 所以唔得閒慢慢睇。

上圖係岐阜公園o既花圃,
係公園正門望向山上,
已經可以見到岐阜城。

岐阜公園除左有博物館之外,
仲係織田信長故居遺址, 而家仲做緊挖掘o既工作。
而上金華山山頂到岐阜城o既纜車站,
亦都係係公園內。

下三張圖就係織田信長故居遺址。

經過織田信長故居遺址之後就會見到纜車站。

來回盛惠1050yen.....
其實亦有三條登山路可以登上金華山,
不過金華山成三百幾米高,
加上真係好斜。
仲有天時暑熱, 又趕行程,
你行埋小弟嗰份喇~

搭纜車時見到三重塔(上圖)。
係喎, 唔記得睇埋先添,
落山再睇。

上圖係由纜車望番落織田信長故居遺址。



上到山一出站,
見到o既唔係岐阜城,
而係「松鼠村」!?!?

大半個藍球場左右o既地方,
入面有為數約10-20隻o既松鼠。
閣下交低200yen就可以入場。
貴其實唔係貴,
不過小弟冇乜興趣,
離遠影左幾張相之後就繼續登山喇。

啲松鼠唔多起眼,
大家搵唔搵到?

二の丸門跡。
係豊臣秀吉死後o既関ヶ原戰役中,
岐阜城主織田秀信因為歸附西軍,
被東軍攻擊。(有關東軍西軍聽日再講)
二の丸門跡係當時激戰o既地方。
最後因為戰爭中火藥庫失火,
岐阜城正式被攻落。

臨到岐阜城天守之前, 左邊會有一條小路通向一口井(上圖),
口井叫「金銘水」(下圖)。
因為金華山成座山都係一大舊石,
加上係山上, 取水至為困難。
而呢口井就係供應晒全城人使用......
雖然話係井, 但其實主要係收集雨水o既貯水池。

終於到岐阜城天守喇。
當然而家o既岐阜城唔係最初o既稲葉山城,
昭和時代曾經重建過, 不過係戰爭中燒毁。
而家o既岐阜城係1956再重建的。

因為植物太茂盛o既關係,
基本上係搵唔到地方可以影到成個城個樣......

係入口前有一個鐘樓,
當然係比較近代o既產物。
上面刻有十二時辰,
不過好似同中國o既計法唔係太一樣=.=
(子時應該係現代o既2300-0100左右, 如此類推)

入城200yen, 唔係貴。
入面同其他重建o既城一樣,
係一個博物館。
不過可能因為重建o既年份比較早,
所以design比較老土同簡陋,
不過都有唔少展品。

上圖係和式o既織田信長畫像,
而下圖係洋式。
簡直就係兩個人......

上圖係斉藤道三o既畫像,
而下圖係動畫《織田信奈の野望》o既斉藤道三。
兩者又幾似喎XP

織田信長出左名對西洋事物非常感興趣,
有傳織田信長o既房間有好多西洋o既佈置、用品,
所以呢度都展出左啲舊式o既望遠鏡同地球儀。

樓高四層,
上到頂, 可以360度無遮無檔環抱岐阜市,
因為天氣好, 可以望到好遠。



係頂樓展望台有一個叫「信長おじさん」(信長呀伯) o既義工職員。
見佢同其他客人傾偈, 似乎對呢一帶地勢好熟,
於是冒昧問下佢墨俣係邊一個方向。
呀伯果然好快就好清楚咁話俾小弟知正確方位。
下圖o既河就係長良川,
最左邊就係墨俣一帶,
仲可以見到新起o既墨俣一夜城。
放大圖o既紅色圓圈就係。

再同信長呀伯吹多兩咀,
都係話天氣好熱呀咁啫,
呀伯就係手袖入面拎左張名信片出黎送俾小弟......
咁似玩RPG o既,
同啲NPR講幾句野就有event, 或者會跌item出黎=.=

岐阜城傍邊仲有一個以前用黎儲糧o既糧倉,
不過而家改建成為資料館,
大家只要憑岐阜城o既入場券就可以入場。
不過入面面積細, 展品唔多。

行番去纜車站走人時經過一間餐廳,
時間已經係1230, 而家唔食唔知幾時先有得食,
於是入去食個便飯。

叫左個話係人氣no.1 o既信長どて丼定。
果然個味噌係「赤だし」。
呢度又講多少少啦。

織田信長係尾張出身(即係名古屋一帶啦)。
唔知點解, 名古屋o既飲食文化等等,
同日本其他o既地方有好大出入,
所以其他日本人成日覺得名古屋人唔係日本人=.=

而其中一望就知o既分別,
就係名古屋o既味噌。
名古屋o既味噌同日本其他地區o既味噌好唔同
顏色呈深紅, 味道亦較濃,
亦都唔直接叫味噌, 而係叫「赤だし」(AKA-DASHI)。
所以大家下次見到定食中有紅色o既味噌湯,
十之八九都係名古屋料理。

講番關鍵o既嗰個丼先,
其實即係牛腩飯=.=

食完搭纜車落山,
睇一睇三重塔就走人。
三重塔冇乜歷史價值,
亦都唔開放入內, 所以冇乜好講喇。

最後望多岐阜城一眼就走喇。
搭500yen巴士, 直踩落下一站墨俣(SUNOMATA)。
其實墨俣一帶景點唔多,
交通又隔涉, 又唔係出名,
小弟最都冇聽過呢個地方。
小弟認, 小弟係因為睇完《織田信奈の野望》第6話,
所以想黎睇下的OTZ

搭左45分鐘巴士,
終於到達總站墨俣。
因為未落車已經見到墨俣城,
所以唔洗睇地圖, 一落車就知道向邊個方向行。
再加上咁大個牌坊,
想盪失路都幾難。

沿途唔算清晰, 不過細心睇都見到指示牌。
然後行到河邊, 終於可以近距離見到墨俣城。

琴日提過墨俣城係不存在o既城,
點解, 咁又要講下歷史喇。



上回講到, 要攻下稲葉山城非常難困,
因為稲葉山城視野廣闊,
只要係附近排陣、紮營、起城,
就會立刻被發現, 然後大軍就會攻過黎。

搞唔掂, 織田信長於是叫木下藤吉郎搞掂佢。
(木下藤吉郎就係之後o既豊臣秀吉)
為左可以立刻起好大本營,
木下藤吉郎長人手分兩批,
係長良川o既上游收集木材,
預先將部份材料組裝好,
然後到目的地砌埋就搞掂。

深夜, 狼煙為信號,
兩批人手同時向墨俣進發,
到達之後就立即將預先裝好一定程度o既材料砌埋。

所以, 相片中嗰種城, 又石垣、又天守,
跟本冇可能係一夜間起得成。
而家o既墨俣城係無中生有的,
外型係參照大垣城天守而建。

當然所謂o既一夜城,
大概只係好似下圖咁,
有啲木柵、有守望台等。
當然, 又唔只咁細o既, 另外仲有啲土屋仔放糧、放火藥等。

第二日,
稲葉山城上o既斉藤義龍見到墨俣特然間多左堆兵馬,
(當時斉藤道三已死, 義龍係佢個仔)
故然係震驚, 即刻出兵進攻。

不過其實一夜城都唔係一夜間就起好晒,
最先起好o既只係防止騎兵進攻o既木柵。
其他野係一邊抵抗住敵軍一邊起的。

(圖片取自《織田信奈の野望》)



過橋入去呢個無中生有o既城。
係橋o既未端有一個人像,
就係木下藤吉郎喇。

因為豊臣秀吉以軍旗頂會有葫蘆o既裝飾,
所以城腳有一個掛絵馬o既架,
絵馬o既形狀都係葫蘆。
葫蘆可以係城入面買,
唔太貴, 細o既300yen, 大o既都只係800yen。
入場費200yen。

偽一夜城, 樓高五層,
第一層講墨俣一帶o既環境、生態,
第二層當然係講墨俣一夜城嗰一場仗o既始沒啦,
第三層主要介紹揚名立萬之後豊臣秀吉o既一生,
同埋豊秀吉身邊重要o既歷史人物。
第四層比較囫寡, 係一啲名人眼中o既墨俣成=.=
而最頂嗰層, 唔洗問, 當然係觀景台啦。


第二層放有一夜城模型,
不過玻璃勁反光,
小弟又冇偏光鏡......

上圖一藍一紅o既線路就木下藤吉郎兩批人手進軍路線,
而最頂頂嗰個就係稲葉山城。



最項層o既風景,
望向東北面,
可以見到金華山上o既岐阜城。

城內o既一手史料唔多,
但講解都算詳細。
不過閣下對戰國冇乜興趣的話,
唔黎都唔會有損失。



臨走見平平地,
所以買左個細o既葫蘆仔。本身應該係絵馬黎o既,
不過當做係吊飾, 亦無不可丫。

今晚係大垣落腳,
因為聽日會去関ヶ原,
但関ヶ原附近住宿唔多,
而大垣係轉車大站,
所以揀係呢度落腳。

仲有一個原因,
係因為大垣有大垣城。

本身都對大垣城冇乜興趣的,
因為個城本身唔出名,
而係歷史上, 除左関ヶ原の戦い,
石原三城用過呢度做根據地之外,
就冇乜大事件發生過。
不過到達大垣o既時候時間尚早,
於是去兜下囉。

大垣站向南行十五分鐘就到。
入城費500yen,
唔係好想俾呢個價入去,
所以只係係外面影下點就算。

其中一代o既城主戸田鉄,
講左個名都唔知係邊個......



最初PLAN行程o既時候,
打算今晚係漫畫喫茶過夜算數的。
不過上網search, 又俾小弟搵到間平旅館,
因為小弟到大垣o既時間早,
計番條數, 係畫喫茶住都要二千幾yen,
而呢間平野都只不過係2900yen,
仲要有早餐食。
於是毫不猶豫就決定舒舒服服瞓一晚。
不過平野總有缺憾架喇:
到左呢個年頭, 竟然仲有酒店旅館係冇得上網......