名古屋城

早上一邊睇《加速世界》, 一邊執行里,
九點半出門口, SK先生渣車送小弟番番去浜松駅,
正式結束呢兩日頹廢o既屈蛇生活。
(上圖係前晚到埗時影的)

當然,
無啦啦搭幾百蚊車hea兩日就走,
點都講唔過去。
所以回程o既時候,
一來時候尚早, 二來順路,
加上小弟o既青春18全日任搭,
所以係名古屋駅落車,
一睹名古屋城o既風采。



名古屋城,
係德川家康於関ヶ原一役掃除左豊臣家勢力後而起o既城。
可惜係二次大戰中遭美軍空襲而燒毀,
只留下石垣。
所以大家而家見到o既, 全部都係近代重建o既野。
雖然係咁, 名古屋城,
仍然跟熊本城同姬路城並稱為日本三大名城。

係名古屋駅搭地鐵櫻通線轉名城線係市役所落車,
一出駅口就係隔離。
不過要去正門的話要行五至十分鐘。

名古屋城o既正門

睇啲石似係新砌o既(純粹小弟差測),

名古屋城而家有大規模o既復原工事,
所以周圍都圍晒板進行工程,
雖然唔似姬路城咁成個城封左大修,
不過有好多地方都圍起左,
路又難行(難行係指兜兜轉轉, 唔知點先去到目的地),
又難取景影靚相。

再加上唔知係咪就係有夏祭,
所以周圍都係未開檔o既店仔,
同埋掛晒燈籠。

下圖係表二之門。

名古屋城進行緊o既其中一個大工程,
就係復原本丸御殿。

順帶一提,
一般黎講, 本丸即係城主平日起居o既地方。

同高野山o既伽藍一樣,
復原工程採取開放式,
大家可以免費入場觀看。

上幾張圖係屋頂o既close up,
原來屋頂係用木片一片片咁釘上去(下圖)。
見啲工人已經好熟手, 唔洗三十秒釘好一塊,
但只見沒完沒了......

好似仲有一年唔夠就開放,
趕唔趕得切架.....

名古屋城o既標記,
就係城樓上o既金鯱。
好似係真係用真金貼上去的。
從復原完成開始,
一直都有金片被盜o既新聞。

德川家家紋: 葵



同其他復原o既城一樣,
名古屋城入面係冷氣開放o既博物館。

1:1金鯱模型

似前日本o既轎。

三樓有一角模仿江戶時代o既街道,
燈光每六分鐘循環一次,
模仿江戶一日中o既環境。

係城內o既樓梯,
沿路都有裝飾用o既鋼板,
其中上圖o既圖案實在係太耐人尋味,
令小弟不得不影低。
究竟有咩意思!?

雖然名古屋城於二戰中焚毀(上圖最大嗰張照片)
但因為有好多文獻、相片留低落黎(上圖左邊o既照片)
所以令名古屋城有機會可以100%復原。

入得天守,
當然唔少得上到天守閣o既頂,
俯瞰名古屋市啦。
其中下圖遠處o既山,
就係犬山市犬山城o既地址。

作為現存十二天守o既其中之一
(詳情見http://japsleevefish.blogspot.hk/2012/07/blog-post_27.html)
小弟都好想去睇一睇,
但一來比較遠,
二來時間好似唔多夠,
三來今日實在係熱到嘔茄,
所以放棄左。

頂樓有一個箱,
籌錢都係for重建架喇。
只見毛先生都出一分力。
其實Alexander Hamilton先生都有份。

臨走差啲唔記得影低名古屋城o既石垣。
因為係比較遲起o既城,
所以石垣o既砌法亦係比較先進(當然係以當時黎計)
名古屋城o既石垣係由加藤清正政負責(熊本城嗰個城主呢)
所以石垣o既築法一啲都唔簡單。

因為石垣o既角位最容易受破壞,
而角位受破壞, 直接影響上面o既建築物o既穩定性,
所以名古屋城用左「算木積」o既砌法,
可以見到角位係用經打磨o既石,
大面積、細面積, 梅花間竹咁疊上去。
呢個方法令石垣o既角位十分難受到破壞。



其實名古屋城仲有兩三個櫓,
同埋加藤清正送黎o既大石「清正石」睇,
不過因為工事, 好似地方都圍起左睇唔到。

其實比起姬路城同熊本城,
名古屋城明顯較為遜色,
希望本丸重建之後會多啲睇頭啦。




題外話,
今日把心一橫,
係animate買左夏コミ(NATSU-KOMI) o既catalog,
仲厚過大學啲參考書呀大佬=.=
唔知咩叫「夏コミ 」都唔洗擔心,
幾日後自有分曉。