梳洗完落樓食早餐,
然後繼續第二日o既行程。
第一站係関ヶ原。
有睇琴日o既BLOG都應該記得,
関ヶ原係一個戰場。
又係講歷史故事o既時間喇。
織田信長係將近平定日本前,
埋門一腳俾親信 明智光秀 圍攻,
自知走頭無路, 結果織田信長自己放火燒死自己,
呢個就係非常有名o既「本能寺の変」。
至於點解明智光秀無啦啦作反,
到而家都未有一個有力o既解釋。
得知織田信長死左,
本來係中國(日本本州最西面)圍攻緊高松城o既豊秀吉,
隱瞞冇同人講話織田信長死左,
放棄攻城, 但迫高松城o既毛利氏投降。
然後大軍由中國番番京都,
織田信長死得嗰三日就討伐左明智光智。
呢個就係有名o既「中国の大返し」同「三日天下」。
其實上文完全唔關関ヶ原事,
下明開始先係。
豊臣秀吉繼承織田信長,
統一日本, 正式成為「天下人」。
當然啦, 總有唔据豊臣秀吉o既原信長親信架喇。
唔据o既人於是就跟左德川家康。
呢個時候德川家康都仲係豊臣家o既家臣,
但德川家康其實已經開始唔据豊臣秀吉。
豊臣秀吉死後, 由佢個仔繼位。
因為豊臣家影響力唔及最初,
加上豊臣家內政o既人事鬥爭問題,
當中有又人過檔德川家康。
豊臣秀吉死後, 德川家康就借啲依打豊臣家。
而最重要o既一役就係「関ヶ原の戦い」。
関ヶ原, 幾乎係日本東西兩邊o既正中間。
1600年, 德川家康率領74000軍進攻, 統稱為東軍。
而因為受豊臣秀吉賞識其才華並愛到重用o既石田三成,
係豊臣秀吉死後仍效忠豊臣家, 率領8200軍對抗德川家康,
統稱西軍。
兩軍係関ヶ原對恃, 早上屒霧初散,
大戰一觸即發。
西軍因為一早利用地勢佈好陣,
加上戰略運用得宜,
所以一開始時西軍比較佔優。
德川家康見形勢不利,
於是將本陣由戰場o既較後方,
移到戰場較中央位置。
東軍即時士氣大振。
雖然係咁, 東軍仍處於不利之中。
但過左中午之後,
德川家康命令部下向西軍o既小早川秀秋開槍,
給予小早川秀秋壓力。
最後小早川秀秋叛變,
連同東軍一舉襲擊西軍。
(次次見到小見川祐忠呢個名,
小弟都會諗起早見川千明=.=)
雖然石田軍表現英勇,
但仍敵不過叛軍及東軍o既夾擊,
最終敗走。
西軍o既敗退, 決定左德川家同豊臣家力量上o既失衡,
德川家康其後攻打到去大阪,
係「大阪夏の陣」獲得勝利,
德川家康奪得天下,
而豊臣家亦正式沒落。
故事就係咁喇。
一出関ヶ原駅,
就會見到有觀光案內所,
而左手邊就有單車出租店。
要行主要o既景點, 距離唔係話太遠,
但亦都唔近 (講晒啦~)。
不過租左單車, 就可以去遠啲o既景點,
加上單車有籃, 可以放行里,
唔洗孭住個死人背囊行。
500yen租四個鐘抵啦,
起碼平過以前遊安土城, 500yen租兩個鐘。
拎左地圖, 租左單車,
由近至遠, 第一站係東首塚+德川軍最後陣跡。
嬴左之後,
戰營中o既女人會用上圖o既井水洗乾淨啲死人頭。
而德川家康就係係下圖o既最後陣跡,
逐一檢視啲死人頭。
見唔見到啲死人頭↑
係德川軍最後陣跡旁邊就係関ヶ原町歷史民俗資料館。
入場費唔係貴, 只係350yen,
地方亦都唔算大, 只有兩層高,
不過入面有頗多o既第一手史料,
值得一看!
(所謂o既「第一手史料」,
唔係啲某某週刊嗰種「第一手猛料」時間上o既第一手,
而係primary sources, 即係例如真現場實用過o既物品、
現場實況o既紀錄, 甚至係當事人[當然資料館入面冇「當事人」])
上圖係日本戰國o既儲葛亮---竹中半兵衞
點解同小弟認知o既(下圖)差咁遠T_T (誤)
睇完資料館之後,
下一站係戰地o既中央。
再過少少就係石田三成陣跡。
現場搭有木柵。
沿小路再上, 有展望台。
講過啦, 西軍利用地勢佈陣,
而最好就係由山坡上攻落黎。
展望台仲有圖示, 表示當時陣營o既分佈。
德川陣跡、石田陣跡、同埋資料館係関ヶ原主要o既景點。
睇完呢幾個景點, 時間尚早,
加上反正租左單車, 就用到佢盡,
於是決定踩單車到兩三公里外o既関ヶ原鐘乳洞。
路程遠都唔係問題,
問題係啲山路又上又落,
踩得好辛苦, 再加埋天時暑熱......
不過沿途綠色風光明媚。
踩下停下搵下路,
踩左差唔多成25分鐘,
終於到達目的地,
関ヶ原鐘乳洞o既售票處......
入場費700yen。
同其他山洞一樣啦,
都係好似開左凍氣咁凍......
洞內氣溫約15度左右。
一開始係比較整齊o既水泥洞,
行左100米左右就得番人手挖掘o既路。
再行入啲, 明明路牌話已經係鐘乳石o既範圍,
但都係唔見有鐘乳石。
後面一路跟住行o既小朋友,
係度嘈話洞頂俾綠色網圍住嗰啲鐘乳石好靚好犀利,
小弟先發覺原來嗰啲就係鐘乳石......
對唔住, 小弟知道唔係関ヶ原鐘乳洞o既錯,
但小弟第一個反應係「吓!? 咁就叫鐘乳石呀!?」
皆因小弟去年四月去過中國張家界o既黃龍洞,
個鐘乳洞行成粒鐘都行唔完不在話下,
啲鐘乳石碌碌都成米長, 粗過大脾,
睇到関ヶ原o既鐘乳石,
小弟只有失笑......
ANYWAY, 姑且欣賞下呢啲鐘乳石BB啦。
縱使後面o既家長係咁話好勁, 好大碌,
小弟都只有將回應放係心入面......
不過最後都有番啲特別少少o既野睇。
臨出洞嗰幾十米, 路邊有溪流,
住左一種比較少見o既魚,
話只有13度水溫,
超級乾淨而又流水不斷o既溪流先搵到,
叫「虹鱒」。
又再踩番N咁長o既山路番番車站,
真係踩死人=.=
今朝由大垣站塔黎関ヶ原,
並冇用青春18, 而係買飛,
因為小弟想留番係関ヶ原駅及印仔,
不過而家入閘走人時......
站長唔係度......
啲細站就係咁, 冇人睇住個站都唔出奇=.=
車到, 冇辦法啦。
下一站係國寶犬山城。
之前都講過, 犬山城係現存十二天守之一,
同姬路城、松本城、彥根城並稱為四大國寶城。
而犬山城亦都係日本唯一私人所有o既城。
由関ヶ原搭到岐阜, 轉車到鵜沼, 然後步行過去。
本身搭名鐵去會近好多, 不過小弟用青春18嘛~
上圖o既船可能係睇鵜捉魚o既船,
除左京都宇治之外, 岐阜、犬山等其他地方都有鵜飼睇,
不過以京都宇治o既鵜最方便同化算啦,
有關鵜飼可以參考15/7 o既BLOG「宇治川鵜飼」
http://japsleevefish.blogspot.hk/2012/07/blog-post_15.html
犬山城, 最初由織田家所建。
除左係現存十二天守之一、四大國寶城之外,
仲係唯一一個由私人名義擁有o既城,
不過冇幾耐之前, 都交左俾財団法人所管理lu。
被例為四大國寶城o既原因好簡單,
因為犬山城除左修複過之外,
機本上係原來咁o既樣留番落黎,
非常珍貴。
同樣, 穿過神社係上犬山城o既捷徑, 但冇針綱神社咁快。
不過一場黎到, 行乜鬼野捷徑丫。
經過兩個神社o既後門, 就到達本の丸門前,
買飛入場, 500 yen。
一望到犬山城天守,
就已經感覺到嗰種古舊o既氣息,
始終水泥石屎建成o既城,
同全木造o既城樓係冇得比~
只有玩存先守先可以睇到, 斜到無倫o既樓梯,
起碼都成60度以上掛
放左日本名城o既相。
同下面嗰層只係一塊木板之隔。
上到樓頂, 份外開掦,
一來因為犬山城係小山丘o既上面, 傍邊又有小河相伴,
不過最主要o既原因係......睇下圖, 留唔留意到?
同其他天守起晒欄杆包晒安全網唔同,
犬山城天守頂樓外o既欄杆,
只有到兩歲小朋友耳仔咁高。
小弟173cm, 欄杆高度連股骨都唔過......
亦因為比較危險, 所以參觀者只可以順時針步行。
有畏高o既一定唔敢行出去,
而事實上有好多人行行下都話好驚,
行左四份一圈就縮番入天守入面。
加上木板因為多人行, 著襪會有啲滑,
更叫人驚心。
最後飲住威士己o既大叔o既相想點=.=
走人, 因為時間尚早,
於是順道過去隔黎o既針綱神社睇下(下圖)。
不過神社有好多地方都咁啱修揖緊。
而針綱神社有小路直接通向傍邊o既三光稲荷神社(下圖)。
三光稲荷神社有個池要黎淺錢,
話洗一洗之後, 會賺個雙倍咁話。
呢啲咁o既玩兒小弟都見唔少次,
所以都係影下相算數。
得番去鵜沼駅o既時候,
聽到有啲唔尋常o既呠呠聲。
原來係有人賣豆腐! (下圖)
呢個年頭仲有好似賣白糖糕o既流動販賣!!!
本身應該搭1603 o既JR走人,
如果搭唔到就番唔到屋企,
因為1603 呢班一路搭落去, 要十一先番到川崎。
但早左到, 所以搭早左一班。
不過真係超級超級好采,
因為咁啱有事故, 班次延誤!!!!!!
如果小弟真係等1603嗰班的話,
延誤左就番唔到川崎!!!!!
係岐阜有少少時間,
於是求其搵左間連鎖店食飯,
所以青春18任出入閘~~~
上圖o既定食只係690yen,
抵到爛!!!!!!
後記,
小弟呢一趟旅行,
如果對日本戰國冇乜興趣的話, 意義不大。
而其實小弟亦都唔係一個戰國拎,
不過始終想去下呢啲古戰場、城池,
實地睇下, 黎一個「赤壁懷古」。
関ヶ原之前都經過唔少次,
一直都想去,
今次終於都去得成,
總算了左心願。
其實岐阜除左啲呢啲咁鬼悶o既城池、戰場之外,
都仲有其他野好睇。
東邊有妻籠、惠那,
前者係古僕o既和風街道, 後者係風景漂亮o既山峽。
東北面有出名o既下呂溫泉,
北面有白川鄉、飛彈。
不過除左下呂之外,
小弟係一年前o既旅行已經去過,
所以今次有再去呢啲景點lu。
沒有留言:
張貼留言