北海道 洞爺湖花火大會

今日仍然係執薯仔,

不過執左一整日之後,

終於執晒喇!!!!!!

由小弟黎到第三日開始剪草,

到今日執晒啲薯仔,

足足用係薯仔田花費左16日=.=

不過今日o既重點唔係呢度。

1615完左工作之後,

小弟+台灣男仔(Y先生)+台灣女仔(A小姐)+北海道女仔(FA小姐)

四條拎出去red。

事源係咁的,

因為聽日放假,

所以一早打算今日完左工作之後,

派Y先生去租車, 然後今晚去睇煙花,

之後聽晚再去觀光。

不過呢幾日一直落雨,

日日留意住天氣,

總算叫做每一日都落雨o既當中,

撞著小弟要去o既地方 / 時間停雨。

正如頭先所講,

本來打算叫WWOOF屋主開車載Y先生到車站,

再搭JR到租車o既地點,

Y先生再開車番黎, 載我地三個去睇煙花。

不過屋主話咁樣來來回回,

未必趕得2045睇煙花,

於是四個一齊去租車,

然後直接去睇煙花。

點解要搭JR去租車?

以前都講過啦,

北海道呢啲不毛之地,

鬼影都唔多隻,

莫講話租車。

最近有得租車o既地方---俱知安駅,

要由小弟附近o既蘭越駅坐30分鐘JR (530yen)......

上圖係北海道廣域,

下圖係上圖紅框放大。

靠左手邊紅色圈o既地方就係蘭越駅,

中間最高藍色圈o既就係租車o既俱知安駅,

而右下角就係睇煙花o既地方---洞爺湖。

租最平o既PLAN, 四人私家車,

24小時, 合共7800yen,

除番四個人都唔洗2000yen。

1830租左車就向洞爺洞出發。

因為A小姐睇錯地圖,

以致小弟set左自動導航去左藍色星星o既地方。

七點幾到達, 係間便利店買晚餐食。

因為見唔太對路,

於是大家再睇多次地圖,

先發現真正睇煙花o既地方係紅色星星o既地方=.=

好在仲有時間淨啫......

問便利店o既員工,

介紹小弟到「洞爺サンパレス」呢間酒店睇煙花,

個VIEW比較好。

當然小弟們唔會比錢住酒店啦。

係酒店東面o既便利店泊車,

然後沿湖邊行。

其實都冇話特別想係酒店入面睇,

不過因為酒店遮住左,

所以小弟們沿湖邊向西行。

行下行下唔知點解會行左入酒店對出o既花園。

見個環境唔錯,

時間又差唔多,

於是求其坐低等睇煙花。

FA小姐、Y先生、同A小姐

坐係岸邊,

一放低腳, 已經浸左落水=.=

好在及時發現抽番起隻腳,

如果唔係應該會濕到腳眼......

超清o既水

初初都懷疑呢個係咪睇煙花o既筍位,

因為酒店附近都黑漆漆冇乜店,

距離港口又遠。

應該係專門for睇煙花o既觀光船。

2045,

酒店好配合咁熄左主要o既照明,

湖邊o既路燈亦都關燈,

煙花正式開始。

開始放煙花之後,

發現呢個真係一個好位置,

因為煙花係係上圖黑色圓圈範圍放,

而且大概係以酒店為圓心咁放,

遠係遠左少少,

不過個view幾好。

都係嗰句啦,

小弟都唔係好鐘意就咁睇煙花,

不過今次同志同道合, 又傾得埋o既朋友睇,

個氣氛都唔錯o既。

就係為左呢20分鐘o既煙花,

來回用左三四個鐘=.=

臨走,

影番相真係証明呢度真係洞爺湖先。