魷日記: 一路向北第三日 --- 仙台 (瑞鳳殿 + 青葉城跡 + 松島 + 瑞巖寺)

琴日都唔記得貼仙台站張圖出黎添。

琴晚同今晚都係住仙台o既一間capsule hotel,
平係平, 不過始終係因為比較多人困係一間大房度
(當然, 每人有一格仔啦)
所以比較多雜聲, 瞓得唔太稔,
不過好處係一定唔會瞓過龍......

七點半起身,
刷牙洗面出門口,
第一站係端鳳殿。

簡單黎講, 一句講晒,
瑞鳳殿就係戰國時代,
仙代一帶o既大名: 「獨眼獨」伊達正宗o既墓地。
(仲有佢個仔同佢個孫)

仙台有週遊巴士 one day pass,
一程均一250yen,
而one day pass只係600yen,
再加埋啲景點折回優惠,
只要閣下去一個收費景點,
都打番和條數(來回500yen, 收費景點折回約100yen),
何況小弟今日會去兩個景點。

不過問題係,
一來小弟琴晚到仙台已經比較夜,
售票處已經關左門,
今朝又早過售票處開門就出門口。
二來小弟住o既capsule hotel比較遠離JR站,
(週遊巴士出發點)
要搭普通路線巴士駁腳,
計番條數, 買唔買pass都差唔多,
所以都係算啦。

係瑞鳳殿巴士站落車,
不過原來個站同瑞鳳殿有一段距離,
都搵左一陣......

去到仲要發現要爬斜路=.=(下圖)

其實條斜路都唔係話太長,
但半途, 左手邊無啦啦有個介紹牌,
介紹轉入去o既一個墓地。
叫鹿皃島縣人墓地。

原來係講西南戰爭o既時候,
(簡單講, 反幕府o既新政府自己都分左兩派鬼打鬼)
打輸左o既西郷軍被捉左去坐監,
但後來有十幾人自發話去幫手開發東北,
最後係仙台長眠。
呢十幾個人對仙台等o既發展作出好大貢獻,
所以特登建墓立碑紀念佢地。

好, 繼續上瑞鳳殿。

攀山渉水(誤)之後,
終於到達入口售票處。

入場要400yen......

穿過上圖o既湼盤門,
再上幾級石級就到瑞鳳殿。

一句講晒,
超級華麗!!!

唔知關唔關事啦,
不過之前睇日本啲歷史節目,
話伊達政宗本身都勁fashion,
出軍時成隊軍都打扮得勁有飛屎。
唔知知個供養塔係咪都係按伊達政宗o既意思起得咁靚?

其實呢個瑞鳳殿都係重建的,
原本嗰個係二戰時被燒毀。
不過好在當年做過考查,
留低大量資料,
所以得以以高完成度複原。

伊達家用過好多種唔同o既家紋,
上圖o既「竹に雀」係其中一個。

啲木雕真係好那靚。

簷蓬o既轉角位有好多圓形o既圖案,

都係伊達家用過o既家紋。
有桐、三巴、菊、八星伴日(<--正式唔記得叫咩)。

係供養塔o既兩傍,
有加埋十五個塔仔,
全部都係陪埋殉主o既家臣、僕人等。

係瑞鳳殿o既旁邊,
有一條超唔起眼o既小路,
通向資料館。

入面面積都唔夠一個普通班房大,
不過就放左好多係瑞鳳殿出土,
伊達家o既陪葬物品等。

可惜博物館入面唔可以影相......
入面放左好多珍貴文物,
例如伊達政宗o既頭髮同埋骨頭o既碎片!!!

睇完呢個細細o既資料館,
即刻覺得400yen係物有所值!!!

係離瑞鳳殿唔夠一百米o既位置,
仲有感仙殿同善応殿,
分別供奉二代藩主伊達忠宗,
同埋第三代藩主伊達綱宗。

好明顯冇瑞鳳殿咁靚,
冇左窗欞上面嗰啲木雕。
簷篷轉角亦都冇家紋圖案。

放係路旁拆散左等修復o既石燈籠。

善應殿更加比感仙殿少裝飾,
除左冇左窗欞上o既木雕同家紋外,
本身係鳳凰o既地方變左一紅一白o既花,
本身係飛仙o既木雕變左鳳凰。

睇完, 離開。

其實係上瑞鳳殿之前,
仲有正宗山瑞鳳寺,
不過冇乜野好睇。

今次坐週遊巴士,
直接到青葉城跡。

講左咁多仙台同伊達政宗,
仙台青葉城當然係伊達政宗o既據點啦。
可惜, 叫得城跡, 即係已經乜都冇。
而家只係得一堆手信店, 一間資料館,
同埋一間護國神社。

以前o既青葉城係咁的。

護國神社。
小弟唔知點解見親護國神社都不抱好感,
連入都唔想入去。

唔洗講都估到係邊個啦下話。

由青葉城跡飽覽仙台市

展示城池石垣o既結構。
原來入面都係碎石。

資料館

個資料館勁細,
但係要700yen!!!
當然都有唔少歷史文物,
但其實比起其他城唔算多。

不過呢個資料館有一樣引以為傲o既野,
就係有一段自稱係超高質素o既CG影片,
重現往日o既葉青城。

如果包埋段片的話......
嗯......勉勉強強700yen都OK o既,
可惜段片全日文放送,
唔識日文o既朋友可以慳番700yen。

題外話:
片入面有三隻吉祥物負責做介紹:
一粒豆(無誤), 一隻雌雀(女皃), 一隻雄雀(父親)
如下圖

一聽粒豆開聲講野,
小弟腦裏面即刻浮現一個名: 若本規夫
而隻女雀把聲都熟口熟面。

段片完左, 小弟當然係留低睇幕後制作名單啦,
果然粒豆係若本規夫!
而女雀係高本めぐみ!
男雀唔記得係邊個喇......

點解青葉城o既手信店會有LOVE PLUS o既手信T_T

仙台出名用支豆做o既糕點,
於是小弟都買番串黎食。

唔係唔好食,
不過稍為甜左少少, 蓋過左啲豆香。
甜味淡番少少會好食好多。

都冇乜野好睇喇,
搭番巴士番仙台站,
途中經過下圖o既八幡宮,
都算出名。
不過係車入面影張相就算。

由仙台駅搭仙山線到松島海岸。
原來仙山線o既仙台駅係係地下面。
地下面o既鐵路唔係啲咩新奇野,
但地下面o既JR就幾新奇。

啱啱入仙台駅o既時候,
都只係陰陰地天。
不過當過左四個站,
列車出番地面時......

落雨落到HIHI !!!!!!
$%&^*%$#@

搭左45分鐘到松島海岸,
雨勢稍為收歛左啲,
但都係唔担遮唔得。

不過話時話,
黎左日本九個月,
旅行要担遮, 係得嵐山賞櫻嗰次同呢次。
個天待小弟都算係咁。

黎到仙台o既其中一個指定項目,
一定係黎松島遊松島海岸。
不過落咁大雨,
能見度比較低,
所以都係先睇其他景點。

其中一個比較出名o既就係瑞巖寺。
又係寺=.=

不過不愧為東北最有名氣o既寺廟,
睇下鋪路o既石咁新淨咁靚就知有米啦。

入場費又係700yen

最重要嗰個本殿,
因為311地震+海嘯 o既影響而要大修, 唔開放......

取而代之o既係係旁邊o既庫蔵做左一個臨時本殿,
將本殿o既文物放過黎。

不過可能有關方面都知咁就收700yen過意唔去,
於是開放埋平時唔會開放o既寶華殿作為補償。
下圖係通向寶華殿o既路,
可以見到建築物坎左入大石入面,
都幾特別。

再過少少係一個洞仔(上圖),
過左個洞先知原來上面有咁大棵樹!!!(下圖)

寶華殿係伊達政宗o既正室: 田村氏愛姬o既供養塔。
造形冇瑞鳳殿咁華麗,
不過都好精緻, 同埋一睇就有個感覺係for女仔。

可惜又係唔可以影相。
雖然係係戶外, 又冇人管住,
不過無謂啦。

離開瑞巖寺前,
兜一兜瑞巖寺洞窟遺跡群。
主要係以前啲人挖左啲石窟,
入面供奉有石佛或靈位,
被稱為奧羽高野山。
(奧羽即東北一帶)

時間已經係下午兩點幾,
尾班由松島開往塩釜o既觀光船1500開出。
仲有少少時間,
於是睇埋五大堂。

五大堂都係由瑞巖寺所管轄,
不過唔洗錢入場。

沿海岸向北行就會見到。
其特色係一連三個島仔,
五大堂就係係最出嗰個島,
而三個島則用紅橋連接。

唔好差錯腳,
中間空心,
而且真係足夠攝隻腳落去=.=

由五大堂望出海屽出面

其實仲有福蒲島,
不過因為海嘯影響,
仲未可以開放。
大家由上圖都可以見到,
海岸o既堤都仲未完全修葺好,
啲磚瓦都未鋪番晒。

DSC_8466
松島觀光船有兩個上船位,
上圖係離車站比較遠嗰個。
大家都係1400yen,
可能係航線同埋公司唔同掛,
但上圖嗰個睇落殘舊啲, 船亦都細隻啲。

而下圖就係比較多人光顧嗰個。