寄存啲行里係酒店之後,
就出發到五稜郭。
由JR函館駅搭電車。
睇地圖好似好近咁,
但事實上搭左成15分鐘,
再行多十五分鐘先到達......
未真正步入五稜郭之前,
會先見到一個好高o既塔。
陣間再講有咩用途。
詳細就唔講喇,
總之事情大概就係:
土方歲三係新撰組o既靈魂人物
新撰組擁護幕府軍
新撰組同其他幕府o既藩主對抗新政府軍
幕府軍節節敗退
最後退到函館
幕府軍最後被消滅土方歲三戰死)
日本封建制度完結, 步向民主化。
黎得塔入面,
就冇理由唔上去睇下架~
不過小弟就係唔上去,
先入五稜郭參觀先。
天氣唔多好。
因為日本開始步入秋天,
日本一轉天氣就一定落雨。
(好簡單啫, 冷暖氣流交界線移過嘛)
其實由琴日開始已經開始落雨,
不過好好彩地,
小弟由出酒店到參觀完五稜郭走人,
途中都冇落雨。
有一條用樹造成o既隧道。
係近頂端部份有石頭凸出,
阻礙敵人攀登。
路過見到啲花幾覵,
影左一兩張。
並唔係天守閣,
而係奉行所(即類似官府咁o既野)
原本嗰個奉行所,
係新政府軍控制函館之後,
全部建築物遭拆去。
而家呢個, 係兩年前先新辣辣起好。
不過旁邊o既築群仲未複原。
俾500yen入場參觀。
留有好多設計、建築時o既資料,
所以奉行所得以高完成度地複原。
主要係靠兩條長10米o既橫樑支撐住。
以燈箱o既形式簡單而又詳細地講解五稜郭o既來去脈。
五稜郭係由一個到過外國留學o既日本人(武田斐三郎),
跟據歐洲城堡o既風格而設計。
所以係日本第一個, 亦都係最後一個西洋風格o既城池。
當時日本同外國o既貿易開始頻繁,
而函館係其中一個重要o既巷口。
最初o既奉行所係函館山o既山腳,
不過後來考慮到歐洲攻打到黎的話要點應對,
所以就決定將奉行所般到離岸超過25公里o既地方,
(當時歐洲戰船o既火力可達到o既距離)
並起城牆保護。
呢個就係五稜郭冇天守o既原因喇。
1) 由外國抄番黎o既外國城堡設計
2) 五稜郭最初o既設計
3) 五稜郭最後o既圖則
出番外面,
係時候上塔頂觀光喇。
就係五稜o既形狀。
不由頭先奉行所入面o既展品中,
大家都會留意到,
五稜郭o既形狀係星形。
呢個亦都係點解五稜郭前面有座高塔o既原因。
因為不識盧山真面目, 只緣身在此山中~
唔上去高o既地方,
又點睇到五稜郭o既星形呢。
所以就算要俾850yen呢個高價上塔,
呢筆錢點都要洗的。
搭升降機會直接上到頂,
但要搭落番地面o既升降機的話,
要先行樓梯落一層。
而係嗰層, 地面有啲部份係用玻璃造的。
由玻璃向下望, 可以直望到地面。
有唔少人都驚到兜路行。
差唔多係時候走,
時間係下午十二點半。
赴之前先係塔入面求其搵間野醫肚先。
見呢間咖喱店幾光鮮, 但又講到好有歷史咁,
咪入去試下囉。
唔係真係話好好食, 唔差囉。
超碼唔係好似其他日本咖喱咁甜到嘔=.=
但始終都係有咖哩o既香料味。
不過好在份量有番咁上下,
飯o既份量同平時香港茶餐廳差唔多,
不過叻喱o既份量足夠食兩碟飯!
所以小弟都加左150yen叫多碟飯。
食完野,
係時候番酒店拎行里出發喇。
由函館去蘭越,
目的地係WWOOF o既宿主。
由今晚開始,
小弟就會係農莊住一個月。
冇人工, 但相對地, 包食包住。
用埋最後o既一次青春18,
(而夏季o既青春18亦都係用到今日為止)
準時1844到達蘭越。
WWOOF o既主人 高橋先生已經係度等緊。
坐高橋先生o既私家車,
十五分鐘左右就到達農莊。
農莊人手o既構成:
高橋先生兩夫婦(都有五張野)
佢地o既兒子(應該大小弟幾年)
一個日本人(黎自東京, 不過過多三日就走)
一個台灣人(年齡同小弟差唔多, 不過度做兩個月)
一個香港女仔(大小弟兩年, 本身係WWOOFer, 不過而家係高橋個兒子o既女友)
小弟去到,
都差唔多開始食飯。
放低行里,
由台灣人同小弟簡單講下日常生活o既野。
小弟初初仲諗住有機農莊,
仲要係北海道山卡啦,
可能會好唔方便,
甚至諗過可以要斬柴煲水沖涼=.=
不過事實上,
屋入面絕對同一個普通日本家庭冇分別。
甚至崱所都係自沖水......
另外,
小弟最掛心o既「上網」,
亦都完全冇問題......
完備o既無線上網!
ANYWAY,
因為生活時間未調整好,
加上啱啱到埗, 比較多野要搞,
所以未冇太多時間寫BLOG,
遲下再詳寫。
沒有留言:
張貼留言