一路向北 四第日 --- 山形 立石寺(山寺)

琴晚結果搞到兩點先瞓,
但今朝又要0600爬起身。
本身今日應該可以瞓到九點幾的,
不過因為前日上蔵王お釜出左意外,
要編排過啲行程,
所以將去「山寺」呢一個項目放左係今日。

ANYWAY, 除左晨運咁早爬起身之外,
對行程都冇乜障礙,
反而仲因為咁, 小弟可以用青春18車票去埋山寺,
所以去山寺嗰程車錢都著數埋。

0709上JR, 0816就到達山寺。
寺如其名, 山寺係一個依山而建o既寺廟群,
原名叫宝珠山立石寺。
860年由慈覺大師開山至今。



由車站月台向山上望,
已經可以見到山寺o既鳳毛鱗角。

睇唔到?
再close up。

出左山寺駅,
過橋, 一直跟指示行。

路牌係一個和尚造形o既等身大公仔,
個造形雖然係hea左啲,
但指示清楚, 唔會話搵唔到山寺入口。

上圖係山寺其中一個入口,
不過如果想順路咁睇晒啲寺廟,
就要再行前啲,
見到下圖o既石級先好上。

首先見到o既係根本中堂。
正面有布袋和尚。

通常有啲咁o既肥和尚像放出黎,
都係話摸下佢個肚就會有好事降臨。
睇下個介紹牌......真係俾小弟估中......

唔知間廟有冇重建過或者修葺過啦,
但睇啲木, 好似都用左好耐。

穿過左手邊o既鳥居就會到日枝神社。
如果係由頭先第一個鳥居上樓梯的話,
第一個到達o既就係日枝神社。
唔好問小弟點解寺廟群入面,
零零舍舍有個神社, 小弟都唔知,

可能因為早年神佛合人, 都冇去分咁仔細。

睇牌, 話日枝神社祈求下列o既野比較靈。

你不如直接寫「全包」啦......

神社入面有舊龜の甲石,
話將自己個名寫係錢幣上,
然後放係石上,
願望就會達成......
又係呢啲老生常談,
不過要黎呃錢又幾好用。

繼續行, 會見到左手邊有兩個石像,
其中一個係 俳聖芭蕉 o既石像。
聽講名係咪好似啲甜品點o既甜品名=.=
「俳」係指排句,
類似中國o既「詩」咁啦,
不過格式唔同,
係以「五個音 + 七個音 + 五個音」o既格式組成。

芭蕉係最為有名o既其中一員,
佢遊山玩水, 除左山寺之外,
仲到過好多唔同o既地方,
有興致就會寫番兩句咁。
所以如果大家係日本旅行時見到芭蕉句碑等o既物體,
多數係講佢係當地作過o既排句。

順帶一提,
芭蕉係山寺作嗰句係:
「閑かさや　石にしみ入る　蝉の声」



再繼續行,
雖然時間都未到九點,
但有啲小食店已經開門。
而山寺其中一樣出名o既就係力苟蒻(Chikara-KonNyaku)。
其實只係用鼓油浸苟蒻......

本身諗住落山先食,
不過小食店個嬸嬸好落力咁叫小弟買番串,
搞到小弟都唔好意思,
反正都係要食, 就而家食啦。

問嬸嬸可唔可以影相,
好輕快咁答左句好之後就即刻擺晒舖士。
其實小弟只係想影嗰鍋苟蒻, 不過算啦......

其實......點講呢......
唔係話難食,
但鼓油浸苟蒻, 想可以點?
ANYWAY, 100yen又唔係貴o既。

再行就見到「山門」。
頭先除左一開始嗰條石級之外,
一直都係水平咁行,
但由呢度開始,
就真真正正咁行石級上山,
同埋由呢度開始要收費,
每位300yen, 絕對唔係貴。

行左一段石級之後,
首先見到o既係姥堂,
入面供奉o既係「奪衣婆」(DATSU-E-BA),
同埋佢老公「懸衣翁」(KEN-E-OU)。

係佛教o既傳說入面,
三途河(SanZu-No-Kawa)係「現界」同「彼岸」o既分界,
死人o既靈魂黎到, 過左河之後就冇得番轉頭。
而如果死者過左三途河, 但冇帶過河費六文錢的話,
奪衣婆就會將死者剝光豬,
然後將衣服交俾身邊o既懸衣翁。
懸衣翁會將死者o既衫掛上衣領樹,
以樹枝被衫o既重量壓得有幾低黎判斷死者生前o既「業」有幾重,
從而決定死後o既處置。
因為罪業深重o既人過河時會變得風高浪急,
全身衣服濕晒, 所以啲衫掛到上樹會將樹枝壓得好低咁話。

咁係咪即係話只要帶住六文錢的話,
生前做乜都得?



番番黎。
係呢度供奉 奪衣婆,
喻意姥堂之下係地獄,
爬石級上去就係極樂淨土咁話。
嗯~的確, 而家呢個世道同地獄冇乜分別......

再行,
見到上圖o既蟬塚(SemiTsuka)的話,
即係話已經上左差唔多一半路。
當然啦, 小弟只係放幾張相上黎,
大家唔會知道小弟行左幾多級。

叫蟬塚, 係因為芭蕉先生將係度作嗰句俳句,
寫係短冊上然後埋係度,
而最後嗰句係「蟬の声」,
所以叫蟬塚=.=

再上, 會見到右手邊o既弥陀洞。
石頭經長年累月o既風化,
蝕出一個類似人形o既凹位,
睇真啲似唔似一個舉起右手o既上身?
唔似=.=

上、下圖係仁王門,
過左仁王門, 就到達山寺建築群比較密集o既地方。

性相院

最多人逗留同受最歡迎o既影相地點,
可以話係上圖o既開山堂,
同埋再行入啲o既五大堂。
嗰種懸空o既感覺真係好好。

開山堂

開山堂旁邊o既納堂,
不過可以因為地勢比較險要,
所以圍住左唔俾外人接近。

由開山堂旁邊望出山外。

經開山堂轉入去右手邊,
會見到五大堂。
不過先要捐過五大堂堂底先。

堂底有塊石,
攝左好多1yen硬幣係度。
點解啲日本人咁鐘意攝硬弊係神社寺廟範圍!?
出雲大社條注連繩又係咁,
富士山頂o既鳥居又係咁......

五大堂

五大堂入面空框框乜都冇,
但可以無遮無檔咁望到晒出面o既景色!!!

就算係邊個國家都好,
都總有唔生性o既人。
竟然係歷史文物度畫公仔......

由開山堂旁邊好辛苦攞到盡先影到呢張相。
其實有一個位影寺廟群影得更好,
可惜因為維修緊, 唔入得......
就咁影都已經好靚,
如果係秋天, 伴有紅葉, 更加靚!!!

開山堂對面o既石壁。
話好多僧人爬呢個石壁到胎內堂作為修行,
不過死過唔少僧侶。
所以除左僧侶修行之外,
一般人唔可以進入(見下圖)。

然後山寺最最入o既寺廟,
左手邊先會見到「一切經蔵」(上圖),
然後正面係大佛殿同奧之院(下圖)。

唔洗講都知係鐘樓啦。



山寺一共有超過一千級石級。
話行完呢一千級之後,
所有塵世o既煩惱都會忘記晒。
的確, 攰到唔得閒諗......



事實上登上山寺都唔係話真係好攰,
莫講話比起張家界,
就連コミケ同ASL都絕對辛苦過上山寺=.=
不過對於老人家黎講,
又稍為高左少少o既。



睇地圖,
仲有一個三重小塔o既野未睇。
於是跟路牌行去睇。
行第一次, 見唔到, 走番轉頭。
再行多次, 望多幾眼先叫做見到個三重小塔。
真係小得交關......
都唔知有冇一米高,
仲要俾格仔窗圍住,
鬼睇到呀。

上圖就係頭先話影山寺比較靚o既地方,
工程中唔入得......

都係開山堂比較有氣勢。

小弟腳程快,
上山用左大約半個鐘就搞掂(包埋影相)。
因為小弟影相唔係淨係影前面,
後面都會間唔中睇下,
所以落山時唔洗點諗,
可以一野衝落山,
用左唔夠十分鐘就落到山腳。
上圖就係作為出口o既拔苦門。

同埋拔苦門外o既羅漢像。



寺就影完喇,
得閒無事影下啲花花草草。

沿路行番車站,
搭1036 o既火車。
今日一口氣由宮城縣衝上本洲最北o既青森縣,
連埋等車, 一共要用11個小時左右.......

附帶一提,
上圖係小弟o既行里=.=
把遮係琴日落大雨買的。
白色袋係LY先生寄過黎o既食物,
不過寄到過黎已經係七月底,
嗰時日日旅行都唔得閒食,
而住係川崎好食好住, 都冇機會食得晒。
反正預左去到北海道WWOOF應該冇咁豐富,
所以帶埋去。
細嗰袋係相機,
黑色嗰碌係腳架(使用率<5% =.=)



山寺-->羽前千歲-->新庄-->秋田-->大館-->弘前

係新庄同秋田等車比較耐,
所以有啲時間周圍行下。

上面幾張係新庄駅o既裝飾。
新庄位於秋田縣,
其中一樣出名o既就係最上川o既紅葉,
可惜小弟冇機會睇......

秋田駅

秋田最出名o既莫過於東北三大祭之一o既竿燈祭,
每年o既八月頭舉行。
上圖就係車站入面展示o既竿燈。
竿燈祭時, 受過訓練o既人會用單手or肩膊or額頭支撐住竿燈巡遊。

搭左成日車,
終於到今日o既目的地弘前喇!!!!!
到達車站o既時間已經係2149。

上圖就係東北+北海道南端o既地圖。
最下面仙台o既左邊紅色圓圈就係山寺所在。
藍色o既方框係今日搭JR轉車o既站, 由下至上係:
羽前千歲、新庄、秋田、大館,
然後今晚就係係青森縣o既弘前落腳。
而聽日會由弘前, 一日來回打星嗰個地方。
然後後日向北海道o既函館出發。



聽日0500要起身....................SHIT!!!

不過後日可以瞓得晏啲。
同埋反正車上面可以瞓過夠。