上賀茂神社+下鴨神社+ 祇園祭

今日係小弟逗留係京都o既第二日啦。

HKY小姐因為要番學,
所以八點就出左門口。
小弟則瞓到十點幾先起身。

十一點半出門口,
向HKY小姐o既大學進發,
同佢共進午餐。

不過俾HKY小姐點左一鑊甘o既。
HKY小姐俾小弟o既短訊, 明明係:
202號巴士, 祗園轉207
不過上左車發覺唔對路,
再三發短訊問HKY小姐,
原來唔係207, 係201......

小弟冇怪佢,
但好想知點解1可以變成7???
點睇個電話鍵盤,
都唔覺得係一個正常o既打錯字方式=.=

轉車時經過祗園八坂神社,
因為時正祇園祭,
爆多人.......

同HKY小姐食完午飯之後,
就出發去上賀茂神社。
由HKY小姐間大學行到去巴士站,
只不過係十五分鐘,
但已經係「成吉思汗打仔」......
不過咁藍o既天咁白雲,
已經好耐冇見過,
係香港直頭已經見唔到=.=

上賀茂神社,
原名叫「賀茂別雷神社」,
所祭祀o既神就係賀茂別雷大神。
「別雷」, 即係分開啲雷。
相傳呢個神有強大o既能力,
連雷都可以分開。
所以要拜祭佢,
好讓賀茂別雷大神用佢o既能力幫人消災。

經過上圖o既鳥居,
就會見到下圖廣闊o既草地。

再過多個鳥居,
就會見到上圖, 左手邊o既細殿,
中間o既橋殿, 同右手邊o既土屋。

相傳賀茂別雷大神係神社後兩公里左右o既山上降臨過,
所以細殿前有兩堆「神沙」(無誤)
就係模仿嗰兩座神山......

上、下圖就係橋殿。
殿小弟見得多,
但以橋o既形式起,
真係第一次見,
幾特別。

過左橋殿之後,
就到達樓門,
過左樓門先係真正o既本殿。

上賀茂神社同下鴨神社,
社內都有好多雙葉葵o既圖案。
因為自古以黎,
上賀茂神社同下鴨神社都係負責「葵祭」。

平安時代, 祇園祭係比較平民o既節日,
而葵祭就係皇親貴族o既節日。
遊行o既隊伍皆會以雙葉葵為裝飾。

八坂神社祇園祭,
上賀茂神社同下鴨神社葵祭, 同
平安神宮時代祭,
並稱為京都三大祭。

見唔見布廉上o既雙葉葵圖案。

之前去宇治上神社,
神籤係用兔仔為吉祥物,
而上賀茂神社就用龍。
小弟特然諗,
行完全日本, 有冇可能搵齊十二生肖?
(可惜春日大社o既鹿唔係十二生肖......)

又係啦,
大神社入面都有好多小神社,
而上賀茂神社就有十二個小神社(攝神社)
而上圖嗰個就係要黎祭祀龍神。

不過入去之前,
見到路傍有個牌:

伊勢神宮遙拜所......唔識日文都估到九成啦~
咩事? 連神社都好似「大家落」咁有分店?

兩絛龍又畫得幾型。

係上賀茂神社入面,
又搵到小弟鐘意o既稻荷神社!

睇得七七八八,
走人o既時候見到下圖o既奇景~
嗯, 都唔算奇景o既,
可能對日本人黎講好平常。

係神社入面o既小河入面,
家長帶埋小朋友,
著晒泳衣玩水消暑!

你話「神社」唔係應該神聖不可侵犯o既咩?
不過可能係日本人心目中,
神社除左係要黎品神o既地方之外,
同時亦係社區中心+生活廣場。

由上賀茂神社向南行去下鴨神社,
都有成4km有多, 加上晒到HIHI,
真係好X熱 @﹏@!

不過見到河堤兩岸咁風光明媚,
心境都平靜啲。
沿途有人除晒衫晒太陽、
情侶係度終成扣肉、
又有人練樂器、瞓覺,
完完全全o既自由、公共o既空間。

突然間諗番近期單新聞:
嘿~老子有「全世界第一」o既城市都唔住,
係要走黎日本, 吹咩!

初初冇留意,
原來因上賀茂神社行到落下鴨神社,
都有成4km以上路程,
行左差唔多成粒鐘=.=

同上賀茂神社一樣,
下鴨神社都係世界文化遺產。

就連樓門o既建築模式都同上賀茂神社好似。

兩個神社咁friend底,
連葵祭都一齊搞, 係有原因的。
下鴨神社, 原名叫賀茂御祖神社,
供奉o既係賀茂別雷大神o既呀媽「玉依姫命」,
同埋玉依姫命o既老豆「賀茂建角身命」。
所以兩間神社都係供奉緊同一個族系「賀茂」o既神。

穿過中門,
入面有幾個細神枱,
大家可以搵番自己o既生肖嗰個黎拜。
(不過要識日文)

係日文, 「地支」同相對應o既「生肖」發音一樣, 或者取頭嗰個音:

鼠　　牛　　虎　　兔　　龍　　蛇　　馬　　羊　　猿　　鶏　　犬　　猪
子　　丑　　寅　　卯　　辰　　巳　　午　　未　　申　　酉　　戌　　亥
ね       うし      とら       う        たつ      み       うま   ひつじ   さる      とり      いぬ      い

經南面走, 會經過河合神社。
如果係以前o既小弟, 未必會有興趣入去睇,
不過因為之前係日本o既電視睇過葵祭o既特輯,
介紹過河合神社, 所以入去走一走。

不過好可惜,
神社好似大修緊, 冇野好睇。

正如下圖所寫,
「女性守護, 日本第一美麗的神」
所以年中有好多女性入去參拜,
而河合神社o既「鏡絵馬」十分有名。

鏡絵馬 o既形狀好似一支柄好短o既波板糖,
外型模仿小型o既化妝鏡。
而女生們就會用晒全副私伙化妝用品,
係塊圓滾滾o既絵馬上面畫人樣,
越畫得靚越靈咁話。

可惜今日睇唔到......

晚上, 約左兩個日本朋友逛祇園祭。

其實正確啲講,
祇園祭係一個由七月第一日就開始o既祭典,
不過一開嗰啲, 都係祈求順利呀、神輿先後次序抽籤呀咁,
所以比較有氣氛o既係14~17/7

14 ~ 16/7,
搭好左o既神輿會放係路上俾人觀賞,
當然唔少得o既有街邊檔啦。
基本上祗園一帶, 小弟用泛民式o既粗略估計,
隨時都有過千個檔攤。
不過小弟黎左日本大半年,
有o既檔攤都見過晒, 冇乜特別。
不過人多o既程度,
比得上年三十晚o既花市。

下面show左其中幾個神輿。
正確啲講, 其實唔係叫「神輿」, 而係叫「鉾」(HOKO)。
兩者有咩分別?
小弟都唔知......

鉾有大細兩種,
上圖o既係細鉾,
而下圖o既係大鉾

大o既鉾,
上面會坐有人, 負責奏樂

上圖o既鉾仲可以供遊人上去參觀。

平時, 一般神社o既巫女係唔俾人影相的,
就算冇寫到明, 一般人都唔會影佢地咁冇禮貌,
而且又阻人地做生意。
但今次, 上圖嗰幾個巫女, 擺到明係外展part-time巫女,
(其實大時大節啲巫女好多都係part-time)
任影唔嬲, 仲會同你搓枚=.=
上圖o既巫女就同一個西洋人搓緊.......

其實每個鉾都有一個主題,
唔少仲係以中國傳統故事為主。
例如有個「郭巨山」為題o既鉾,
講o既係廿四孝故事其中一個........
等陣......小弟上網搵, 搵極都搵唔到中國廿四孝入面有郭巨山呢個人=.=

一共有32台鉾,
14 ~ 16/7 晚, 祗園一帶o既地方,
唔難搵到有人派導賞o既地圖,
有興趣o既人可以逐個鉾去搵去睇。

不過一來小弟行左成日, 攰到HIHI,
二來真係冇佢地咁好氣,
於是收工番番HKY小姐度。

就咁擺晒啲鉾係度,
當然就冇乜野好睇啦。
祇園祭o既重頭戲,
就係聽日(17/7)o既鉾巡遊!!!