執好野先到樓下食早餐,
因為今次住呢間酒店有免費早餐。
(其實咪又係包埋係住宿度=.=)
食個夠, 再撻佢幾個麵包,
0930出發, 由出雲市駅搭到去大田市駅。
放低個背囊係車站個locker度,
然後就坐巴士入去石見銀山範圍喇。
因為反正得閒,
諗住睇多啲野,
所以早左少少落車。
(代官所跡)
代官所(上圖),
即係類似府廳咁上下o既地方啦,
係江戶時代政府係呢度設置o既管理機關。
不過入場費要500yen,
加上如果真係要睇,
回程都睇得,
所以skip左冇入去。
沿路向入行(西南方)
好快會見到當地地圖介o既第一個景點: 勝源寺(上、下圖)
不過事實上冇乜野好睇。
再繼續行。
之後會見到 熊谷家住宅,
係以前一個富商住o既大宅,
展示以前富商o既生活。
不過又要俾500yen入場,
加上經過琴日嗰個冇乜野睇o既武者屋敷之後,
有少少陰影, 唔係好想入去......
係石見銀山一帶, 唔難搵到有單車租(上圖),
因為要由呢個旅遊區o既一邊行到另一邊,
拉直線都成4公里, 莫講話啲路彎彎曲曲。
不過小弟考慮過之後都係決定唔租, 因為:
1) 呢個觀光區係一個山地, 實有好多上落斜, 落斜都還好, 不過上斜就......
2) 呢度租車呢度交車, 限制左移動o既彈性
3) 要睇個礦坑, 有四分一路程要落車, 即係攞黎搞
4) 小弟今日時間多的是, 慢慢行冇乜所謂
下一個景點, 井戸神社,
不過都係冇乜野好睇......
只係有個背景故事,
話江戶中期, 呢一帶曾經鬧飢荒,
井戸呢個代官(即係管理該區o既政府官員),
引進左紅蕃薯黎呢度,
挽救左食糧危機。
平常一般寺廟神社都有o既洗手o既地方,
好一條水喉, hea得佢丫。
不過又冇講點解喎。
進入石見銀山公園之前,
先去五百羅漢睇下,
睇下呢個世界遺產有咩咁把炮。
不過入場係要先係對面馬路o既羅漢寺買飛。
又係500yen......下下都咁那貴o既。
入場門口嗰個姐姐話係呢個池洗下啲錢,
財源滾滾來咁話喎。
小弟係鎌倉都洗過一次,
不過好似唔係好覺有效.......
然後過番對面睇500羅漢。
有三個大窿,
中間嗰個供奉釋迦三尊石佛,
而左右兩個窿則各安放左250個羅漢。不過洞內唔可以影相,
所以冇辦法俾大家睇。
門上o既花紋幾細緻。
講真嗰句,
俾500yen入黎好似唔係太抵......
除非閣下係非常有心o既善信,
又式者對佛像好有興趣。
捐完山窿之後,
就過番去銀山公園o既案內所嗰邊。
有一大個停車場,
然後見到有一隻吉祥物。
小弟想話, 呢幾日係日本今年暫時最熱嗰幾日,
全國八成以上觀測站錄得30度以上o既氣溫。
係咁o既溫度之下仲要著住件咁o既野=.=
真係白鱔上沙灘......
未行到黎銀山公園,
係頭先嗰條「必見石橋」o既時候,
一直都覺得好嘈,
而家終於知道點解喇。
原來係銀山公園停車場呢度,
有神樂表演。
都係嗰句啦,
成三十幾四十度天氣,
真係替佢地辛苦。
話時話,
左手邊嗰兩個巫女好似幾靚女。
睇左陣, 唞夠,
今次真係出發行入銀山遺址範圍。
石見銀山, 故名思意即係有銀鑛o既山,
據文獻記載, 係鎌倉時代已經被人發現,
但去到正式o既開採,
要去到戰國初期先有記載。
睇日本o既歷史節目,
都唔少會提及戰國時代,
當時管治山陰一帶o既毛利氏,
因為呢個銀山而富甲一方。
傳說毛利氏將部大部份由銀山得來o既財產,
收埋左係一個秘密o既地方。
收埋左係邊? 知道o既話仲唔上頭條咩。
呢個銀山有幾把炮?
好似話銀山產業o既高峰,
出產世界三分之一o既銀。
就連16世紀歐洲人製作o既地圖上,
都標有呢一個銀礦o既位置。
當然啦, 銀山最後一次開發,
已經要數明治初期。
而家已經全面停產。
如果唔係日本仔就唔洗發動二戰,
亦都唔洗為釣魚台一帶海域而瓜瓜嘈啦。
路程唔算長,
大半個鐘至一個鐘乜都行完,
只係天時暑熱比較難頂啫。
行到黎第一個,
叫做真正同採礦有啲關係o既景點:
清水谷冶煉所遺址。
呢個冶煉所其實比較新,
係明治初期o既產物。
因為話發現銀脈所以開發,
可惜因為銀量不多,
加上純度唔高,
結果開業一年半就關門大吉。
其實呢個冶煉所遺跡範圍好大,
翻過左上圖o既地方,
仲有路向入行。
不過啲路都已經不成路,
加上行左成六七分鐘都未見到有野。
天時暑熱, 撤退。
上圖係小弟最後行經o既地方。
繼續進發。
正常人的話, 下一個目的地,
應該係成個銀山o既觀光熱點:
龍源寺間步(「間步」即「礦洞」)
不過有的是時間,
加上小弟一聽到有城池睇就會中個頭埋去。
見到兜少少路有個山吹城跡,
於是打算上去打個轉。
不過一行入山路就見到「熊出沒注意」......
仲有大網蛇添。
旅遊地圖話行呢個course,
要3個小時。
不過小弟用左20分鐘唔夠就上到山頂o既山吹城跡.....
唔係小弟心急,
而係沿路爆多烏蠅呀蚊呀等等飛埋黎,
如果一停低的話就飛到你成身都係,
唯有一口氣係咁行......
不過你唔好話,
真係辛苦到嘔,
又熱又曬, 條路又斜又難行,
虧張簡介仲話行山o既路完備......
話就話係山吹城跡,
不過上到黎, 連跡都冇,
只係一土片草叢......
都唔知邊個咁冇常識,
係啲咁o既死人地方起個城......
對唔住, 對面山頭都仲有兩個@_@
不過好似話呢個山吹城,
係毛利氐爭羸銀山o既攻防戰中一個重要o既地點。
上圖show對面山頭,
見唔見左手邊第一個山峰有細細粒野突出黎,
嗰個就係其中一個城跡。
冇野睇, 走人。
用左25分鐘過落到山腳,
同一般遊步道匯合。
結果3個小時o既路程,
用左唔夠45分鐘就行完=.=
好喇好喇, 到戲玉喇。
龍源寺間步, 入場400yen,
外個人半價優惠200yen。
龍源寺間步係銀山第二大間步,
全長600m, 不過基於路程、坑內狀況等,
係入口之後四分一o既位開左一條新o既出口,
於是可以遊覽o既長度得番1/4。
雖然係咁, 呢1/4 o既長度,
已經包括晒排水坑、通風口等o既坑洞。
有光同水就會有植物!!!
上圖係進入餘下3/4 o既通道,
不過已經封閉唔入得。
比起頭先遊光o既坑道,
明顯窄好多, 只係夠一個瘦o既人過,
LY先生的話一定過唔到卡住係中間。
然後另一邊就係新o既坑道&出口。
行完。
係呀, 行完喇。
其實入面黑漆漆, 除左窿之外都係窿,
所以事實上冇乜野睇。
除非閣下識日文,
係新o既出口坑道設有介紹o既燈箱,
有啲史料睇下咁,
如果唔係真係行完都唔知咩事。
係出口o既管理亭,
好唔起眼咁放置左兩舊銀礦石,
如果唔係有導遊行過介紹,
小弟都未必會留意到。
閃下閃下嗰啲應該係銀掛。
其實仲有最大規模嗰條大久保間步,
不過比較遠, 要參觀的話,
要五日之前預約, 每日四班, 專車連導賞。
小弟初初都諗過預約的,
不過俾3000幾yen, 好似好貴咁......
結果都係放棄左。
沿路行番出去,
途中經過佐毘売山神社,
好似話以山神社黎講係全日本最大的。
不過係小弟眼中,
只係一間日久失修o既神社。
細心啲睇,
其實路旁間唔中都會有啲細坑洞。
上圖係石見銀山五間步之一o既福神山間步,
不過唔入得。
冇乜野睇,
唯有影下啲花花草草。
有泥鯭的,
合共800yen可以出番JR大田市駅,
不過小弟一條魷,
巴士都只係670yen啫。
冇喇,
今日行程係咁多喇,
不過因為登左上個死人山吹城,
攰到hihi, 所以早少少撤退番酒店。
總括呢幾日黎講,
鳥取砂丘係值得睇的,
不過除左呢個之外,
鳥取就冇乜其他好有睇頭o既野。
而出雲大社一帶,
其實如果真係要行晒,
所有同神話故事有關o既景點、神社的話,
可能要花四日以上,
不過小弟冇咁多時間同財力,
唯有去最出名嗰個出雲大社就算。
至於今日o既石見銀山。
冇乜特別原因的話可以唔洗特登黎,
因為睇到o既野唔係多,
睇到o既都只係得番啲遺跡,
睇唔出啲乜野野,
行過經過可以睇下o既,
但唔洗特登黎。
以上
沒有留言:
張貼留言