鐵路買飛 & 銀行開戶

九點幾起身刷牙洗面出門口,
去 昭和町 o既郵政局兼ゆうちょう銀行(日本郵局兼辦o既銀行)開戶。



順便係度講下係日本買地鐵飛o既程序。

售票機上高,多數都有個幅鐵路圖,
睇就個個都識睇架喇,
搵到想去o既車站, 記住個價錢,
然後去售票機買。



但好多香港人(包括我)埋到去售票機,
都會係咁篤係咁篤起勢咁篤,
都唔見可以揀價錢...........





其實日本o既售票機,
係要先入錢的!!!



例如大阪地鐵咁(其實JR都係咁上下),
售票機螢幕下面有一排好唔顯眼o既黑色方塊,
如果我先放300yen入去,
黑色方塊就會著燈,
各個方塊顯示200, 230, 270 300。
然後先去篤你想要嗰個價錢方塊。

上星期係天王寺站,
就見到有班香港人圍住個售票機係咁篤。
回想起自己第一次係名古屋買票o既尷尬,
就搭左句咀「入左錢先篤」。

點解我唔買儲值卡?
因為我想計住自己用左幾多錢,
況且我又唔係趕時間。



講番番黎,
去到 昭和町,
一出閘, 個閘就著燈,
然後閘住唔俾我出。
(日本o既票閘係長開的)

上左咁耐日文班都唔係流,
都記得第一個香港人日文老師o既分享。
咁o既情況係因為張票o既票價少於我可以到嗰個站要俾o既錢。
簡單講即係俾少左錢買飛。

呢個時候就要去「改札」,
亦即係去窻口度俾番個差額。



好在呢個站冇咩人出,
如果唔係俾個閘閘住係一件超瘀o既事。
事關你唔只受全場觸目,
仲會頂住後面出閘o既人。

明明我睇到係230yen架,
點解實際上係270yen呢?
睇錯!?



算,
出左地鐵站,
明明記得郵局係係西南方,
但搵左成個鐘都搵唔到......



本來打算放棄,
行兩公里到天王寺分部架喇,
臨終前問一個路人,

原來間郵局係大街後面=.=.............................

點解起得咁隱閉......



係郵局開戶都唔算煩,
不過因為多人利用郵局,
所以成個手續等左好Q耐......

話多人用, 其實都唔多過十個,
櫃面連後台都有成八個人。
只見嗰八個人成日拎住啲紙走黎走去,
又講幾句, 又影印,
搞成十分鐘先叫個客埋,
做一兩個手續, 又叫個客等,
然後又跑黎跑去。
但睇起黎真係好忙架喎!

係咪真係有咁多程序呀!



結果我搞左成粒幾鐘先開到戶.......
《我的朋友很少》book 2 都睇左兩個chapter喇......



番宿舍途中,
當然要去拎, 逄星期一出版o既求職小冊子。
番到去, 先醫五臟廟。

買左一舊豬肉, 一包芽菜同三包鳥冬,
中午係湯鳥冬,
夜晚係炒鳥冬,
一石二鳥, 有菜有肉,
都只係三百幾yen。

不過呢幾日食烏冬都成得比較多,
事關19yen一包,
好難唔買嘛.........



食過午飯(都成三點),
打電話去求職。
打左七、八個電話,
全部都係話已經請左人,
請左人登廣告做乜Q呀!!%^&*()#

有一個未請,
但佢話一係請韓國人,
一係請識煮韓國菜o既人......
我就算吹話我對煮野食好有自信都唔buy......



正當萬念俱灰, 往生極樂o既時候,
收到個電話, 個號碼係未見過的。
(我打過o既求職電話都會save低個店名,
 以防打番番黎o既時候我聽唔清楚係邊間野打黎)

懷住戰戰兢兢o既心情聽電話,
%$$^&*&$%^@#@#NAKAU%&@*^#()*#&,
把口一面答住佢先, 一面諗係邊個打黎。
諗左幾秒, 終於記得係上星期六,
我摸上門問請唔請人嗰間牛丼店,
約我聽日15:00見工。



聽電話時, 對方俾我o既感覺都唔錯,
因為好明顯佢係就住我,
用比較清楚同慢o既日文同我confirm interview。

於是呢個就成為我第一個機會。



唔好意思啦,
呢排都冇乜心機影相。
搵到工之後影番多啲補數~~~