十二月飛霜 + 見工

今日再戰居酒屋interview,
同冇追開日記o既朋友講番下。
今次呢一間係上個星期六,
我係我嗰區掃街o既時候問o既,
問左三間o既其中一間。
當然老闆唔係度,
所以我留左contact就走人。

一直都冇打電話俾我,
所以我都以為係唔洗諗架喇,
點知前日打電詁黎,
叫我今日去面試。

不過隔咁耐先叫我去面試,
即係話佢地唔係好等人用啦,
所以我都冇乜抱好大期望......

就正正係我差唔多要出門口o既時候,
出面落雨。
不過夾雜住啲噼噼啪啪聲,
打開窗睇, 原來落緊雹。

因為聽住大阪o既日本老師講大阪唔會落雪,
而且我係香港都未見過落雹,
所以即刻拎相機影低。

因為臨時臨急,
影得唔係好清楚,
地下白色一粒粒嗰啲就係。
因為只係一開始落左幾十秒,
同埋好快就溶,
所以都冇機會補飛喇。

仲有隻曱甴添~

不過話時話,
點解要係我臨出門口先黎搞啲咁o既野......
琴日又係, 出門口撞著黑貓,
你話《我妹》嗰隻黑貓就話啫......
(宅內容, 唔明可以唔洗理會)

去到, 間舖準備中, 未開門。
敲門入內, 有個大我少少o既女仔招呼我,
然後就見到個三十零四十歲o既大舊男人。
個男人正正係當日留我contact 嗰個,
睇佢啲氣勢, 似係話事人之一。

佢叫我坐低等下,
因為社長未番。



又叉開少少講,
成日聽到日本人話課長、部長、社長、會長,
究辦邊個打邊個呢。

簡單黎講, 課長即係部門仔o既主管,
我諗類似香港o既主任咁啦。
部長就係部門o既主管, 即經理左右。
社長就已經係管理層級,
即係總經理咁上下。
而會長, 就係成間工司楂fit嗰個。

當然,
細細間食店就冇分咁多級o既,
我諗嗰個「社長」已經係話事人。



等o既時候,
睇下menu呀, 同埋啲格局咁啦。
原來呢間並唔係屋酒屋, 而係拉麵店。
間野都幾光鮮新淨。
大概廿個位左右啦。

餐牌好簡單, 只係豬骨拉麵、
叉燒拉麵、炒飯咁上下,
加埋都唔夠十樣野。
價錢中等, 拉麵600-800yen之間。

等左一陣,
嗰個大舊男人走黎,
話社長唔黎, 由佢in我。

今次呢個interview比琴日嗰個logical好多,
起碼一黎就問我想番幾多個鐘,
同埋人工想要幾多。
琴日嗰個我唔問都唔記得講。

我唔敢講得太高啦,
話800yen算,
每星期想番25小時以上咁啦。
(我都想番多啲, 但一開始唔可以講咁高,
 如果唔係對方meet唔到, 直頭唔請我)
起碼咁樣, 每個月都係80000yen,
夠交租同生活費, 仲有一兩萬yen淨。

講原最基本o既野之後,
都變左唔係interview, 而係傾偈。
當然都係圍繞我為主啦,
但佢都有自爆啲野。
原來間野都係上個月中先開,
唔怪得咁新淨啦。

傾完之後, 佢拎住我份履歷,
話咁樣應該冇問題。
然後問準備緊嗰個女仔有冇咩想問我。
結果個女仔只不過係加把口黎傾偈,
又再傾多幾分鐘。

今次見工o既反應, 係咁多次最好。
起碼兩個人都好appreciate我o既日文,
又話工作好簡單, 唔會有咩問題。
而且睇完我份履歷之後,
個男人好滿意咁話冇問題。
兩位仁兄又好似對我冇反感。
希望今次真係得啦。

我諗如果個「社長」唔係同中國人有咩血海深仇,
又或者係經濟問題的話,
應該冇問題掛。
結果係未來一兩日自有分曉。

當然啦,
見左咁多份,
我都學會唔好太樂觀。
所我已經決定聽日再去遠啲搵工。

琴日見嗰份居酒屋?
我冇提, 就梗係冇打電話黎啦。

好,
聽日繼續努力!

題外話,
成家人六月去完日本旅行之後,
我呀媽條旅行隱俾我挑起左,
拎左六千蚊之後,
而家走左去北京玩,
得番我老豆同我個妹係香港XD

好似係第一次聖誕+新年屋企係唔齊人