居酒屋見工

今日掙扎左好耐,
搭唔搭地鐵出市中心搵工好。
因為六點鐘就要番黎interview。

不過講真嗰句,
時間係其中一個考慮,
但車錢先係最大問題,
無啦啦要搭五百幾六百yen來回,
都係嗰句,
無事出街勁破財......

結果磨下磨下,
都係算。



話唔出街唔出街,
差啲都唔記得左要拎今日出o既求職報......
好在附近便利店有,
唔洗一定要去到車站。



不過事實上,
攞唔攞結果都係差唔多。
唔知點解今期,
我嗰區o既招聘廣告少到喊  T_T
之前都有六七版紙,
然後每頁都有一兩單近我住嗰度。
今次得兩版......
仲要請o既都係接客呀、接電話嗰啲......
就算小弟夠薑走去見,
人地都唔請啦。
你會唔會請個廣東話唔鹹唔淡o既鬼佬去cool-call丫~



黎左日本發現, 有時有啲招聘廣告有句野幾得意,
「女性staff活躍中」、「20-40代大活躍」等,
其實係暗喻緊佢要請咩性別, 又或者係幾多歲。



好喇, 講番今日o既主題,
去居酒屋見工。

六點去到, 都冇乜客,
同櫃面打聲招呼之後,
就被安排左去其中一個客房度等。



等左一陣,
一個自稱係店長o既人黎,
如果我冇聽錯, 佢好似係叫佐藤。
我諗佢都係大我三四年左右,
一個好有中氣, 好陽光o既男人。

都係叫我埋form咁啦。
不過佢又問左我都幾多野,
問我邊度黎, 我話香港。
又問我香港係咪講普通話,
我話唔係, 係廣東話,
但睇黎佢完全唔知點係廣東話。

又問我廣東話同普通話有咩分別。
點講你知呀大佬。
咪話發音複雜啲, 同埋文法有啲唔同咁囉。

又問我點解黎日本 (WORKING HOLIDAY囉),
又問我點解揀日本 (因為想活用日文, 同想去京都),
又問我點解會揀居酒屋 (唔通我會答話因為人工高, 又近我住)
又問我第時番香港諗住做咩 (都係答住佢話科研醫藥咁啦, 我自己都未知)

雖然問左好多野,
但感覺俾我唔係討厭。
唯一有o既問題,
只係佢比較重關西口音,
聽佢啲問題聽得好辛苦=.=
好在小弟睇咁多動話都唔係廢的,
加上小弟反而比較鐘意關西腔,
所以就算自己唔識講,
聽埋聽埋都比正常學日文o既人聽得多。
唔多唔少都明內容講咩o既~



又講少少日本野啦。
一個國家咁大,
實有唔同o既方言架喇,
日本方言大概可以分為:
標準語、西日本方言(關西腔)、
九州方言、東北方言(東北腔)、
琉球方言(沖繩一帶)、北海道方言。
當然仲可以細分。

http://ja.wikipedia.org/wiki/%E3%83%95%E3%82%A1%E3%82%A4%E3%83%AB:Japanese_dialects-ja.png

標準語亦即係我地平時學o既日文,
(如果個老師讀得啱的話=.=)
是為全國通用o既官方語言口音。

關西腔主要係大阪、京都一帶,
語調高低上落比較多,
但聽落比較柔順圓滑。
日本o既相聲, 傳統上都會用關西腔黎演出。

東北方言比較粗豪,
而北海道同琉球,
因為地理同歷史關係,
比起日本本州o既方言更加廻異,
不過點唔同小弟就唔知喇。



講番番黎,
個面試用左半個鐘左右啦,
個人表現係點?
我就覺得一般啦, 冇乜特別。
不過同之前IN過o既唔同o既係,
佢今次收埋我份履歷走(之前嗰兩間都係話正式請先收),
不過佢都係叫我等電話,
好就好在話聽日會打俾我,
唔洗等咁耐, 正。
我鐘意呢啲, 快人快語。

anyway,
唔可以放大多希望,
都係要繼續搵工先......

今日o既買半額便當時,
順手買左兩個蘋果,
因為小弟覺得自己再唔食番啲生果,
就快壞血病死。
(唔知咩叫壞血病即刻同老子番去重讀初中!)

原來蘋果係咁o既味道,
呢種味道, 已經係記憶深處被埋藏左好幾個世紀,
差啲已經遺忘了......