外國人登錄

有人話好o既開始係成功o既一半,

咁我可以好大聲咁講...

我已經失敗左一半......

明明較左個鐘9點,

而且個鐘係會重響嗰隻,

但唔知點解,

我拍熄左個鐘一次,

然後起身o既時候已經係11點=.=

起身刷牙洗面出門口,

雖然日本o既緯度比香港高,

但都唔係凍好多, 9-12度左右,

所以短袖衫加件外套就夠。

由宿舍向北行兩公里左右,

就係我住嗰區o既市役所(類似香港o既民政事務處啦),

途中經過一條街, 樹葉都已經變黃

又經過一個公園,

第一次親眼見到日本o既公園,

果然係同漫畫一樣!

對唔住, 小弟比較大驚小怪。

行到去平野區市役所都差唔多十二點,

仲擔心會唔會放飯,

冇人同我辦手續,

但好采佢地仲有人做野。

係市役所做外國人登錄,

即係類似申請行街紙咁啦。

都唔係好麻煩,

不過係等左一陣,

搞左差唔多大半個鐘先搞掂...

諗住行去平野JR站,

明明睇左路邊o既地圖方向冇錯丫,

但唔知點解行左好耐都唔見有,

唔緊要, 小弟身上帶有指南針,

只要向住西北方向就冇死。

行到點幾鐘, 開始有啲肚餓,

於是開始留意路邊o既食肆,

見到平即刻衝入去。

皇天不負有心人,

見到有380yen牛肉飯,

叫特盛(加大)都係480yen。

小弟o既目標係每一餐控制係500yen內!

食完飯, 投石問路,

終於搵到JR車站(東站市場前),

雖然比我之前搵嗰個站相差兩三公里,

不過算啦。

搭車去難波, 打算去嗰度o既新生銀行開戶口,

點解揀呢間?係因為睇書話,

其他銀行唔係好接受外國人開戶,

呢間接受之外, 仲會即刻出提款咭,

唔洗等, 所以揀呢間。

因為唔係好記得確實位置,

所以周圍問人,

但問幾個人都唔知難波附近有新生銀行,

唔通係我記錯?

開唔到戶口, 手機就唔洗諗啦,

都係暫時撤退, 番去從長計議。

番到房只係四點左右,

但日本天黑得好快,

四點幾太陽已經落山......

番房check google map,

明明難波就係有新生銀行!

今次醒目, 用相機影低google map,

聽日再去探索。

係房睇左一陣動畫, 差唔多八點,

係時候去買半額便當!

去到LIFE, 雖然未出半額便當,

但發覺佢o既種類都唔係好多,

所以都係去AEON。

去到發現AEON o既半額神原來係比較遲出動,

雖然貼左貼紙, 但唔係半額,

而係前哨戰o既20% OFF。

貧窮o既我當然唔會出手住啦,

不過發現眾多20% OFF當中,

有一盒廣島炸蠔貼左特價,

而個價錢咁啱係原價o既一半(199yen)。

唔通貼錯!?

唔理, 納左先算。

等左好耐半額神都未出動,

趁機睇下超市啲野。

就咁, 一個正正常常o既生菜都要百幾yen,

真係自己做飯,

又要買埋開門七件事,

煮得黎, 不如買半額便當仲化算!!!

等左成粒鐘, 見到半額神開始準備,

而賣飯盒o既凍櫃亦都開始聚集人群!

原來好似我咁等半額便當o既人都唔少......

半額神開始貼半價貼紙!

與此同時, 有個男人拎住幾個一早揀左o既便當,

埋去半額神度俾佢貼半價貼紙......

原來呢個行為唔係淨係漫畫先有=.=

不過咁做好似有啲cheap。

小弟話晒都等左成粒鐘,

要邊個便當一早睇中左,

當半額神一貼貼紙,

小弟就即刻排除萬難,

係人群中保護重要資產離開。

雖然唔似漫畫《便・當》咁要打到頭崩額裂,

但都真係要一早鎖定目標, 搵好企位,

同埋要手長!

於是今日o既晚餐係

長崎炸蠔(8隻) 199yen

便當                  199yen

飯團兩個            83yen

唔洗500yen就夠飽,

又飽口福。

聽日試下炸豬扒先。