話晒機場啲凳都唔係預你訓o既。
琴晚點零鐘瞓,
訓到五點起身,
當中梗係實會俾人嘈醒幾次架喇。
話晒都係機場過過兩次夜,
都有經驗架喇。
起身, 用帶黎o既紙杯刷牙,
然後去Air!ndia o既櫃位check in。
先係咋咋帝問個地勤,
「係咪話呢, 寄倉行里唔知話咩可以extend到30 kg架?」
結果係真架,
好野, 慳番筆, 事關我估我個行里都成三十幾kg。
不過......
「先生, 你個行里過左32kg (33.7 kg),
跟據國際慣例, 機場職員有權唔同你寄運...」
SHIT, 點解之前打電話問航空公司,
嗰個條友話冇上限=.=
仲要, 每過一kg唔係收$50, 而係$70幾,
雖然都唔係貴, 但再一次質疑接電話條友做乜事......
拎番自己個行里埋一邊,
睇下可以將啲咩野放入個背囊度,
但大拿拿成1.7 KG喎...
而且我個背囊本身都七成滿T_T
但又估唔到,
執完之後變左31.5 kg。
太好了。
成功衝關, 入到閘先記起,
佢連我超額嗰1.5 kg都冇收我錢......賺左?
0710登機前,
俾我睇到香港最後一個日出,
噢, 正確黎講,
係小弟係香港睇o既最後一個日出。
登機,
之前訂機票又話冇晒平機票,
仲以為會有好多人,
點知.......
機艙結構分左中右三part,
每part三個位,
結果係,
每一個乘客都可以平均分佈,
訓晒三個位=.=
開始有啲擔心呢間航空公司o既安全性......
(就係一年幾之後,
呢間航空公司發生左機長、副機長去左瞓覺,
得番一個空姐係駕駛艙渣飛機o既醜聞......)
機艙臭又唔係好臭o既,
感覺就好似坐巴士時,
前兩個位有個印度人咁上下。
香港時間0730起飛,
日本時間1150到達關西空港。
搭JR南海線到 天王寺,
轉地鐵到喜連瓜破,
再行五分鐘就到我住嗰度。
只係個喼重到hi hi,
拖慢左步行速度......
1430到達。
租金28000yen,
另加按金25000yen,
水瓜打狗......
咁平係因為我住雙人房,
但好好采,
暫時冇人同我share!!!
獨霸!!!
五點左右,
搞掂晒啲手續, 執埋啲行里,
就出去附近, 睇下啲超市呀、食肆係邊。
附近有兩間超市連百貨店,
近啲嗰間叫LIFE, 睇落好似平啲,
另一間係AEON, 好似貴啲, 但啲野齊啲。
話時話未食中午飯,
買兩個飯團食住先,
然後再買啲零食呀、日用品呀咁。
番房, 食完兩個飯團,
唔知係咪有安眠藥, 爆眼訓。
打算瞓一陣, 八點鐘再去超市,
事關到左八點, 啲超市會將啲飯盒平價出售。
點知, 一瞓醒已經係八點半orz
去到LIFE, 已經被人搶購一空...我o既晚餐呀...
去AEON, 因為AEON多啲飯盒同食物。
亦都係一個戰爭完結後滿目瘡痍o既景象,
不過呢度似乎唔只一次打折,
因為我見到「半額神」又出動貼半價貼紙!!!
捕住佢, 一貼到心目中o既便當, 就即刻擁抱入懷!
然後再去買多三件20% OFF o既炸牛肉薯餅,
都只不過係320yen,
食完飽到反肚! 正!
沒有留言:
張貼留言