突如其來 + 日本工作的性質

前日拉麵店打電話黎,
叫我今日十點半到舖頭,
不過冇講做咩事。
就算佢請我,
呢邊都仲有好多顧慮,
因為我為左易入職,
要求嗰方面寫左時薪800yen,
一星期番25小時以上。

如果照咁計,
一個月四星期的話,
人工只有八萬yen。
月租33000yen, +生活費約30000yen,
淨出黎o既錢唔多。

唔理點都好,
十點四就到左舖頭,

都仲未開門=.=

等到十點八左右,
例牌睇舖嗰一男一女先出現。
男o既姓進藤(三十幾?),
女o既姓加藤(二十五)。

一入舖, 進藤已經問我著衫著咩碼......
我呆左三秒, 答佢大碼,
佢就拎左件店o既polo shirt俾我。
我拎住件衫, 以呆滯o既語氣問
「而家開始打工架嗱?」

於是, 我係日本打o既第一份工正式開始......

呢間店開門o既時間有啲特別,
上晝開十一點至兩點,
晚上開六點至一點,
唔計事前準備, 成十個小時。

同埋店淨係休星期一,
再加自選休多一日,
即係話一星期工作50小時(唔計事前準備),
一個月160000yen!?

不過詳情真係唔清楚,
我問 進藤洗唔洗簽contract呀咁,
佢話日本打part-time**冇啲咁o既野.....

感覺好似俾人賣豬仔咁.......

講番份工,
一開始梗係預備開舖啦,
抺枱抺凳掃地擺招牌就梗架喇。
然後就係洗廁所啦,
不過個廁所都唔係好污糟,
所以都冇乜厭惡性。

十一點開店,
一開店就有個男人黎幫襯。
咁我就傍邊邊睇邊學咁啦。
似乎第一日係學出拉麵時要放o既配菜、醬油之類啦,
難唔係難o既, 不過係多野放,
成日都漏一樣半樣咁啦。

十二點幾, 人開始多,
話多, 其實都只係八個人在場=.=
終於到我開始接待客人。

而家真係好慶幸當年參加左日文學校搞嗰啲無聊活動,
係入面我係負責做侍應,
當然係用日文溝通啦,
左以都記左幾句例牌必講說話。
老實講, 你問一個學左日問五年o既人,
佢都未必知收錢o既時候要講咩!!!

因為菜單唔係複雜,
所以落單都唔係問題,
只係寫漏枱號呀人數咁啫=.=

上晝三個鐘,
黎左十零廿個客左右啦。

午飯, 呢間店包埋食!!!太好了!!!
其實, 店主唔係度,
做細o既我地食埋佢隻車都冇人知架啦。

係拉麵店, 做有咩好食丫,
黎一個豬骨湯拉麵丫唔該!

係咪真係好食我唔識分丫,
但起碼食得出個湯底唔係用粉溝出黎架先啦。

兩點半, 食完暫時收工,
因為我住得超近,
行三分鐘就番到宿舍,
睇左陣動畫, 訓個晏覺,
五點半再番舖。

晚上更離譜,
加埋都唔夠十個客......
好在間店有電視,
結果我同加藤小姐成晚睇電視,
進藤就訓下覺, 煲下煙咁。

我想話, 我part-time**都800yen一個鐘,
隔離嗰兩條藤似乎係正職, 人工應該唔止。
照我睇人均消費750yen左右,
今日都唔夠三十個客......
大家明我講咩架啦......

經營o既野就唔關我事啦,
不過開始覺得,
做著呢間野都唔錯,
又唔會完全冇野做,
但多數時間都係hea,
咁就逗幾百, 唔錯丫。
黑心啲講, 冇咁多人黎仲好!
反正十一月先新開舖,
一頭幾個月內應該唔會執笠。

晚上收拾埋,
零晨點半放工。
其實今日都仲有啲有趣野o既,
不過現在已經夜深,
聽日又要番十點半,
所以留番聽日再講啦。



**
日本工作性質其實分得好細,
由散至長, 少福利到多福利可分:
1) アルバイト (A-RU-BAI-TO)
2) パート (Part-time)
3) 派遣
4) 契約社員
5) 正社員

1 中文唔知點譯,
但一般指一砌散工,
包括只有幾日o既短工,
定其一星期番一定日數o既工等,
彈性非常大, 工時亦都短,
所以好多日本人都選擇假日做アルバイト黎過。

2 唔洗多講啦,
就同香港o既part-time差唔多,
講清楚一星期番幾多日,
幾點番到幾點。

3 就好似agent公司咁啦,
獲派遣o既工多數都係正式、或專門一啲o既,
預定o既工作期間都會較多,
半年至一年不等。
不過似乎agent公司都會提供陪訓等等,
詳細運作小弟就唔清楚喇。

4 同5 唔洗講都明啦下話。