大晦日

大晦日(OO-MISO-KA)。
「晦」者, 為陰歷每月最後一日。
古語有云「晦日月兵, 兵法所忌」,
即古人認為, 月尾打仗乃大忌。
日本人借用意思, 大晦日即為一年最後一日。

雖然係除夕, 但小弟仍然要番工。
不過冇所謂啦, 獨在異郷,
過唔過節日對我黎講都冇所謂。

打個比喻, 我搬左上火星,
咁我應該365地球日慶祝一次新年,
定係687 地球日慶祝一次新年?
( 687 地球日為火星公轉一周需時)

不過今朝番工, 有啲特別。
差唔多行到去門口o既時候,
見到有個女仔企大係門口,
而咁啱, 嗰兩孖藤(進藤+加藤)到達,
開門俾嗰個女仔入去。

原來嗰個女仔係新黎o既part-time,
睇個勢淨係番上午。
我冇主動問, 不過聽個女仔同孖藤交談,
得知個女仔叫安竹 茜(音譯),
正值水靈靈的17歲。
男仔最關心o既梗係靚唔靚啦。
靚就唔算靚架喇,
勝在夠青春啫, 不過小弟冇乜興趣...

於是, 中午最忙o既時候,
係比較輕鬆o既情況下渡過。

因為琴晚比較夜訓啦,
所以今日有啲眼訓。
中午, 上左陣網,
訓左個零鐘晏覺。

平日晚上都唔多人幫襯架啦,
何況今日係除夕,
黎o既得三四個=.=

於是機乎成晚都係度睇電視同雜誌~

講到日本年尾o既電視,
就一定係紅白歌合戰!
今年水樹奈奈第三年獲繳參加,
終於可以係日本睇直播!!!

不過由進藤口中聽到一個惡耗,
老闆話今晚開到凌晨五點,
俾啲人初詣で完有地方食野。
Oh Fxxk!!!

初詣で(HATSU-MOU-DE),
為日本人新年去神社寺廟祈福o既習俗,
類似香港o既黃大仙上香咁上下啦。
雖然今晚要番工, 冇得去參與,
不過小弟已經計劃左聽日去其中一個寺廟,
希望仲有野睇啦。

十二點幾, 老闆們(兩個)仲要黎店飲番杯=.=

兩位老闆都唔係齋黎搞事o既,
拜完年之後, 每人俾左一封お年玉(O-TOSHI-DAMA)俾小弟。
お年玉亦即係新年利是。
不過同中國人唔同,
佢地唔會係又派唔係又派,
而只會派俾較熟o既人,
但每封面額都比中國大。
事後拆お年玉, 兩封都有3000yen。

正當我仲閉翳緊要開店到五點o既時候,
我被告知我可以落場, 孖藤繼續睇住。
YES!!!

番房之前, 係對面o既超市買番少少應節野啦,
就係一盒蕎麦麵, 一杯日本酒, 再加包薯片。
日本同中個東北有類似o既習慣,
就係過年食麵, 意為長壽麵,
叫年越し蕎麦(TOSHI-KOSHI-SOBA)。

沖埋涼打埋日記,
我o既2011年就完結左喇......